រាជធានីភ្នំពេញ ៖ គ្រោះអគ្គិភ័យដែលបានបំផ្លាញឃ្លាំងស្តុកគីបខោអាវជជុះអស់រាប់ពាន់គីប និងធ្វើឱ្យផ្ទះចំនួន៧ល្វែងរងការខូចខាតយ៉ាងធ្ងន់កាលពីយប់ថ្ងៃទី១ ខែកក្កដា នៅក្បែរសាលាទួនហ្វា ក្នុងសង្កាត់អូឡាំពិក ខណ្ឌបឹងកេងកងនោះ កម្លាំងសមត្ថកិច្ចបានប្រើប្រាស់រថយន្តពន្លត់អគ្គិភ័យ និងគ្រឿងចក្រជាច្រើនគ្រឿងទៅធ្វើអន្តរាគមន៍បាញ់ទឹកពន្លត់អស់រយៈពេលជាង១៣ម៉ោង ។ ក្នុងគ្រោះអគ្គិភ័យនេះ ថៅកែនិងជាម្ចាស់ឃ្លាំងស្តុកគីបខោអាវជជុះបានខាតបង់អស់ទ្រព្យសម្បត្តិច្រើនជាងគេ ដែលគិតជាទឹកប្រាក់រហូតទៅដល់ជាង១លានដុល្លារ ចំណែកឯគ្រួសារ២ទៀត ក៏រងការបាត់បង់ផ្ទះសម្បែងនិងទ្រព្យសម្បត្តិអស់ទាំងស្រុងដែរ ។
«ថ្វីបើរងការខូចខាតអស់ទ្រព្យសម្បត្តិយ៉ាងច្រើនសន្ធឹកបែបនេះក្តី ប៉ុន្តែគាត់មិនធ្វើការប្តឹងប្តល់អ្នកណាម្នាក់ឡើយ» នេះបើយោងតាមការអះអាងរបស់លោក ឡេង ឆ័យលី ជាថៅកែខោអាវជជុះខាងលើ នាព្រឹកថ្ងៃទី៣ ខែកក្កដា ។ លោក ឡេង ឆ័យលី អាយុ៧៧ឆ្នាំ បានរៀបរាប់ថា ករណីអគ្គិភ័យកាលពីយប់ថ្ងៃទី១ ខែកក្កដានោះ បានបំផ្លាញអស់ឃ្លាំងធ្វើពីដែកប្រក់ស័ង្កសីទំហំ១០ម៉ែត្រ គុណនឹង១៤ម៉ែត្រមួយខ្នង ដែលមានស្តុកគីបខោអាវជជុះជាច្រើនគីបនៅខាងក្នុងនោះទាំងស្រុង ។ ភ្លើងបានឆេះរាលដាលមកដល់ផ្ទះគាត់៣ល្វែងទៀតមានទំហំរួម១២ម៉ែត្រគុណនឹង១២ម៉ែត្រ ជាផ្ទះស្នាក់នៅរបស់គាត់ ស្ថិតនៅតាមមាត់ប្រឡាយបណ្តាលឲ្យខូចខាតអស់ទាំងស្រុង រួមទាំងខោអាវជាច្រើន គីបដែលស្តុកទុកនៅជាន់ខាងក្រោមផង ។
មិនតែប៉ុណ្ណោះ ភ្លើងបានឆេះរាលដាលទៅដល់ផ្ទះរបស់គាត់៤ល្វែងទៀត ដែលនៅខាងមុខជាប់នឹងផ្លូវលេខ១៧៣ បណ្តាលឲ្យខូចខាតអស់មួយចំនួនធំមិនអាចជញ្ជូនយកចេញបាន និងគីបខោអាវមួយចំនួនទៀត ។
លោក ឡេង ឆ័យលី រៀបរាប់ទៀតថា ករណីអគ្គិភ័យនេះ បានឆេះបំផ្លាញខោអាវរបស់គាត់រាប់ពាន់
គីប ។ ផ្ទះ៣ល្វែងនៅខាងក្រោយដែលគាត់ស្នាក់នៅនិងមានស្តុកខាអាវជាច្រើនគីបនៅខាងក្រោមនោះ គឺខូចខាតទាំងស្រុងមិនអាចរស់នៅបន្តទៀតបានឡើយ គឺមានតែវាយកម្ទេចចោលនិងសាងសង់ថ្មីប៉ុណ្ណោះ ។ ចំណែកផ្ទះ៤ល្វែងនៅខាងមុខ ត្រូវភ្លើងឆេះរោលផ្នែកខាងក្រោយបណ្តាលឲ្យខូចខាតយ៉ាងធ្ងន់ដែរ ដែលបើគិតជាទឹកប្រាក់គឺរហូតទៅដល់ជាង១លាន់ដុល្លារឯណ្ណោះ ។
ហេតុការណ៍គ្រោះអគ្គិភ័យនេះ គឺឆេះផ្តើមចេញពីផ្ទះលេខ៣៥ ហើយឆេះរាលដាលមកដល់ឃ្លាំងស្តុកគីបខោអាវជជុះរបស់គាត់ និងឆេះរាលដាលផ្ទះដែលនៅក្បែរខាងជាបន្តបន្ទាប់ តែគាត់នឹងមិនធ្វើការប្តឹងប្តល់អ្នកណាម្នាក់ទេ ព្រោះពួកគាត់សុទ្ធតែជាញាតិមិត្តជិតខាង ធ្លាប់រស់នៅរាប់អានគ្នាតាំងពីឆ្នាំ២០០០មកម្លេ៉ះ ។ ដូច្នេះហើយ ពួកគាត់មិនចាំបាច់ខ្លាចក្រែង ឬរត់គេចខ្លួនទៅណាទេ ចំណែកឯបញ្ហាគំនរខោអាវជជុះរបស់គាត់ដែលត្រូវបានភ្លើងឆេះទាំងអស់នេះវិញ គាត់នឹងចាត់ចែងរកជួលរថយន្តគេមកដឹក ។
ស្ត្រីឈ្មោះ អ៊ុង ណាវី អាយុ៥៤ឆ្នាំ ជាម្ចាស់ផ្ទះលេខ៣៥ ដែលផ្តើមឆេះដំបូងគេ រៀបរាប់ថា មុនពេលកើតហេតុ រូបគាត់និងប្តីបានបើករថយន្តដឹកអីវ៉ាន់យកទៅឱ្យគេនៅម្តុំត្រពាំងផ្លុង ក្នុងខេត្តត្បូងឃ្មុំ ដោយមានតែកូនប្រសាស្រី២នាក់ និងចៅតូចៗ៣នាក់នៅផ្ទះ ហើយប្តីៗរបស់ ពួកគេក៏រវល់ចេញទៅរកស៊ីខាងក្រៅអស់ មិននៅផ្ទះដែរ ។ ផ្ទះរបស់គាត់ដែលត្រូវភ្លើងឆេះអស់នេះ គឺជាប្រភេទផ្ទះធ្វើអំពីថ្មខាងក្រោមឈើលើ និងប្រក់ហ្វ៊ីប្រូស៊ីម៉ង់ត៍ មានទំហំ៦ម៉ែត្រគុណនឹង៦ម៉ែត្រ ហើយមូ៉តូធំរបស់គាត់ចំនួន២គ្រឿង រួមទាំងទ្រព្យ សម្បត្តិមួយចំនួនទៀតឆេះអស់គ្មានសល់ ដែលពេលនេះនៅសល់តែខោអាវមួយចង្កេះជាប់នឹងខ្លួនប៉ុណ្ណោះ។
អ្នកស្រី អុ៊ង ណាវី ក៏បានថ្លែងអំណរគុណយ៉ាងជ្រាលជ្រៅចំពោះ លោក ឡេង ឆ័យលី ម្ចាស់ផ្ទះល្វែងស្តុកគីបខោអាវដែលមិនធ្វើការប្តឹងប្តល់រករឿងដល់ក្រុមគ្រួសារគាត់ ។ បុរសម្នាក់ឈ្មោះ គង់ រិទ្ធី អាយុ២៩ឆ្នាំ ជាម្ចាស់ផ្ទះលេខ៣៥ស្ទួន ដែលរងគ្រោះដែរនោះ និយាយថា ផ្ទះគាត់មួយខ្នងធ្វើអំពីថ្មក្រោមឈើលើ ប្រក់ស័ង្កសី ទំហំ៥ម៉ែត្រគុណនឹង១១ម៉ែត្រ ត្រូវភ្លើងឆេះអស់ទាំងស្រុង រួមទាំងម៉ូតូចំនួន៣គ្រឿង ឧបករណ៍លក់ប្រហិតចៀនសម្រាប់រកស៊ី និងទ្រព្យសម្បត្តិមួយចំនួនទៀត ក៏ត្រូវបានភ្លើងឆេះអស់គ្មានសល់ដែរ ។ ក្រោមដំបូលផ្ទះតែមួយនេះ មានការរស់នៅចំនួន៥គ្រួសារ និងមានសមាជិកប្រុស ស្រី ក្មេងចាស់ រហូតដល់១៧នាក់ តែពេលនេះផ្ទះរបស់គាត់ត្រូវភ្លើងឆេះអស់គ្មានសល់ ចំណែកពួកគាត់ក៏ខ្វះជម្រកស្នាក់នៅ និងកំពុងតែមានការខ្វះខាតចំណីអាហារហូបចុកផង ។
គាត់បានធ្វើការអំពាវនាវសុំទៅដល់រាជរដ្ឋាភិបាល កាកបាទក្រហមកម្ពុជា និងអាជ្ញាធរ មេត្តាផ្តល់ជំនួយដល់ក្រុមគ្រួសារពួកគាត់ទាំង៥គ្រួសារដែលរងគ្រោះកំពុងខ្វះខាតនេះផង ។ ពាក់ព័ន្ធទៅនឹងករណីអគ្គិភ័យនេះដែរ ក្រុមគ្រួសារគាត់ក៏មិនបានធ្វើប្តឹងប្តល់ក្រុមគ្រួសារខាងផ្ទះដើមហេតុឡើយ ព្រោះពួកគាត់សុទ្ធតែជាអ្នករស់នៅក្បែរខាង និងរាប់អានគ្នាជាយូរមកហើយ ។
គួរបញ្ជាក់ថា ករណីអគ្គិភ័យខាងលើបានកើតឡើងកាលពីវេលាម៉ោងប្រមាណ១១និង២៥នាទីយប់ថ្ងៃទី១ ខែកក្កដា ហើយរហូតដល់រសៀលថ្ងៃទី២ ខែកក្កដា ទើបកម្លាំងសម្ថកិច្ចធ្វើការពន្លត់បានទាំស្រុង ។ ក្នុងហេតុការណ៍នេះ គេឃើញ កម្លាំងមានកម្លាំងសមត្ថកិច្ចរាប់សិបនាក់ និងរថយន្តពន្លត់អគ្គិភ័យជាង៤០គ្រឿង ធ្វើការបាញ់ទឹកពន្លត់អស់ទឹករហូតដល់ជាង២៥០រថយន្ត និងមានគ្រឿងចក្រចំនួន៣គ្រឿងមក
ជួយឈូសឆាយ និងកាយកម្ទេចខោអាវជជុះដែលឆេះផងដែរ ៕ (សម្រួលដោយ៖ ស្រីណា)
ចែករំលែកព័តមាននេះ