រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានលើកឡើងថា ការយកពន្ធលើអង្ករកម្ពុជាដែលនាំទីផ្សារសហភាពអឺរ៉ុបពីសំណាក់សហភាពអឺរ៉ុប គឺជាភាពអយុត្តិធម៌សម្រាប់កម្ពុជា ។ ការលើកឡើងរបស់សម្តេចតេជោហ៊ុន សែន បានលើកឡើងក្នុងជំនួបពិភាក្សាជាមួយលោកវិល ស្គីនណារី (Ville Skinnari) រដ្ឋមន្ត្រីសហប្រតិបត្តិការអភិវឌ្ឍន៍ និងពាណិជ្ជកម្មអន្តរជាតិនៃប្រទេសហ្វាំងឡង់ កាលពីថ្ងៃទី៣ ខែកក្កដានេះ ។
យោងតាមបណ្តាញសង្គមហ្វេសប៊ុក របស់សម្តេចតេជោបានឲ្យដឹងថា នៅក្នុងជំនួបសម្តេចតេជោ ហ៊ុន សែន បានលើកឡើងអំពីការនាំចេញអង្កររបស់កម្ពុជាមកកាន់ទីផ្សារសហគមន៍អឺរ៉ុបផងដែរ ។ សម្តេចបានស្នើប្រទេសហ្វាំងឡង់គាំទ្រនូវគោលជំហររស់នៅកម្ពុជាក្នុងការលក់អង្ករ ដោយសារកម្ពុជាមានអង្ករចំណាត់ថ្នាក់លេខ១នាំចេញមកអឺរ៉ុប ។ សម្តេចតេជោ ហ៊ុន សែន ក៏បានលើកឡើងផងដែរថា ចំពោះការយកពន្ធលើអង្ករកម្ពុជា ។ សម្តេចបញ្ជាក់ថា ៖«ការយកពន្ធនេះមិនយុត្តិធម៌សម្រាប់កម្ពុជានោះឡើយ ក្នុងការប្រកួតប្រជែងលើទីផ្សារសេរីនេះ ។ អាស៊ាន និងសហភាពអឺរ៉ុបជាដៃគូយុទ្ធសាស្ត្រជាមួយគ្នា ។ វាជារឿងសំខាន់ណាស់សម្រាប់តំបន់ទាំងពីរនេះក្នុងការធ្វើការជាមួយគ្នាទាំងពេលកន្លងទៅក៏ដូចជាពេលខាងមុខ» ។
ជាមួយគ្នានោះដែរសម្តេចតេជោ បានបញ្ជាក់ទៅរដ្ឋមន្ត្រីហ្វាំងឡង់ថា ឥឡូវនេះភាគីទាំងពីកំពុងចរចារិះរកវិធីធ្វើជំរុញការធ្វើពាណិជ្ជកម្មសេរីរវាងតំបន់ទាំងពីរ ។ សម្តេចតេជោ ហ៊ុន សែន បានស្នើហ្វាំងឡង់ជំរុញគណៈប្រតិភូវិនិយោគមកកាន់កម្ពុជា ដើម្បីសិក្សាស្វែងយល់លើវិស័យដែលអាចវិនិយោគជាមួយគ្នាបាន ។ លើសពីនេះទៀតសម្តេចតេជោ ក៏បានគូសបញ្ជាក់ថា ក្រៅពីវិស័យថាមពលអាចមានវិស័យផ្សេងៗទៀតដែលប្រទេសហ្វាំងឡង់ និងក្រុមហ៊ុនរបស់ហ្វាំងឡង់អាចសិក្សាវិនិយោគ រួមលើសហគ្រាសធុនតូច និងធម្យមផងដែរ ។
សម្តេចតេជោបានសង្កត់ធ្ងន់ថា សម្តេចចង់ឃើញក្រុមហ៊ុនហ្វាំងឡង់វិនិយោគនៅកម្ពុជាដោយអាចកែច្នៃនៅកម្ពុជាហើយនាំចេញទៅហ្វាំងឡង់ និងប្រទេសផ្សេងៗទៀត ។ សម្តេចតេជោគូសបញ្ជាក់ថា កម្ពុជាត្រូវការអ្នកវិនិយោគពីហ្វាំងឡង់ ហើយក៏ត្រូវការពង្រីកទីផ្សារជាមួយហ្វាំងឡង់ផងដែរសម្រាប់ផលិតផលរបស់កម្ពុជា ។ សម្តេចតេជោបានគូសបញ្ជាក់ទៀតថា នៅពេលនេះ ប្រទេសកម្ពុជាបានទិញ និងនាំចូលផលិតផលពីហ្វាំងឡង់ច្រើនជាងប្រទេសហ្វាំងឡង់ទិញ ឬនាំចូលផលិតផលរបស់កម្ពុជាទៅហ្វាំងឡង់ ។
សម្តេចតេជោបានមានប្រសាសន៍ប្រាប់រដ្ឋមន្ត្រីហ្វាំងឡង់ថា សម្តេចចង់ឃើញទំហំពាណិជ្ជកម្មកម្ពុជា និងហ្វាំងឡង់មានការកើនឡើងនាពេលខាងមុខ ។ សម្តេចតេជោនាយករដ្ឋមន្ត្រីបានលើកឡើងថា កម្ពុជាមានធនធានធម្មជាតិដូច្នេះហ្វាំងឡង់ចូលរួមវិនិយោគ និងកែច្នៃសម្រាប់នាំចេញ ៕កែសម្រួលដោយ ៖សុឃាក់
ចែករំលែកព័តមាននេះ