រាជធានីភ្នំពេញ ៖ រដ្ឋមន្ត្រីសហប្រតិបត្តិបត្តិការអភិវឌ្ឍន៍ និងពាណិជ្ជកម្មអន្តរជាតិនៃប្រទេសហ្វាំងឡង់បានបញ្ជាក់ថា ហ្វាងឡង់អាចជួយគ្រប់គ្រងកាកសំណល់នៅកម្ពុជា ហើយនឹងមកបណ្តាក់ទុនលើកវិស័យផ្សេងៗនៅពេលខាងមុននេះ ។ ការបញ្ជាក់ថា របស់លោកវិល ស្គីនណារី (Ville Skinnari) រដ្ឋមន្ត្រីសហប្រតិបត្តិបត្តិការអភិវឌ្ឍន៍ និងពាណិជ្ជកម្មអន្តរជាតិនៃប្រទេសហ្វាំងឡង់ធ្វើឡើងក្នុងជំនួបពិភាក្សាជាមួយសម្តចតេជោ ហ៊ុន សែន នាយករដ្ឋមន្ត្រី កាលពីថ្ងៃទី៣ ខែកក្កដានេះ ។
នៅក្នុងជំនួបលោករដ្ឋមន្ត្រីបានគួសបញ្ជាក់ថា ទំនាក់ទំនងរវាងហ្វាំងឡង់ និងកម្ពុជានៅមានកម្រិត ហើយដើម្បីជំរុញការងារទំនាក់ទំនងនេះហ្វាំងឡង់កំពុងតែស្វែងរកកុងស៊ុលកិត្តិយស ដើម្បីជួយលើកតម្កើងដល់ទំនាក់ទំនងរវាងហ្វាំងឡង់ និងកម្ពុជានាពេលខាងមុខ ។ លោកក៏បានអបអរសាទរ និងកោតសរសើរចំពោះកំណើនសេដ្ឋកិច្ចកម្ពុជាដែលជាកំណើន សេដ្ឋកិច្ចដ៏ល្អ ។ លោកបានគូសបញ្ជាក់ថា «ខ្ញុំ ពិតជារីករាយដែលឃើញក្រុមហ៊ុនរបស់ហ្វាំងឡង់ចុះកិច្ចព្រមព្រៀងលក់ម៉ាស៊ីនភ្លើងដល់ប្រទេសកម្ពុជាដែលជាម៉ាស៊ីនភ្លើងបញ្ចេញផ្សែងពុលកម្រិតទាបបំផុត» ។
លោកបានបញ្ជាក់ទៀតថា«ប្រទេសហ្វាំងឡង់អាចជួយគ្រប់គ្រងកាកសំណល់ ហើយក៏ចាប់ អារម្មណ៍លើវិស័យផ្សេងៗទៀតផងដែរ ។ ខ្ញុំយល់ថា ក្រុមហ៊ុនរបស់ហ្វាំងឡង់អាចនឹងមកបណ្តាក់ទុនរកស៊ីនៅកម្ពុជានាពេលខាងមុខ» ។ ក្នុងជំនួបនោះដែរសម្តេចតេជោនាយករដ្ឋមន្ត្រី បានគូសបញ្ជាក់ថា សម្តេចធ្លាប់បានអញ្ជើញបំពេញទស្សនកិច្ចនៅប្រទេសហ្វាំងឡង់ កាលពីឆ្នាំ២០០៦ ក្នុងក្របខណ្ឌកិច្ចប្រជុំអាស៊ី-អឺរ៉ុប ដែលហ្វាំងឡង់ធ្វើជាម្ចាស់ផ្ទះ ។
តាមរយៈលោករដ្ឋមន្ត្រីសម្តេចតេជោ ហ៊ុន សែន បានបង្ហាញក្តីរំពឹងថា មេដឹកនាំប្រទេសហ្វាំងឡង់នឹងអញ្ជើញចូលរួមកិច្ចប្រជុំកំពូលអាស៊ី-អឺរ៉ុប នាឆ្នាំ២០២០ នៅរាជធានីភ្នំពេញ ។ សម្តេចតេជោ ហ៊ុន សែន សង្ឃឹមផងដែរថា ប្រទេសហ្វាំងឡង់នឹងគាំទ្រកម្ពុជាធ្វើជាម្ចាស់ផ្ទះកិច្ចប្រជុំអាស៊ី-អឺរ៉ុបនេះ ។ សម្តេចតេជោបានគូសបញ្ជាក់ដែរថា ការលក់ម៉ាស៊ីនភ្លើងដែលមានអាចផលិតថាមពលរហូតដល់២០០មេហ្គាវ៉ាត់នេះជាការធ្វើពាណិជ្ជកម្មមួយដ៏សំខាន់ដោយសារកន្លងទៅកម្ពុជាខ្វះអគ្គិសនី ។ អ្វីដែលកម្ពុជាចង់ជំរុញ គឺធ្វើយ៉ាងណាឱ្យការបញ្ជូនម៉ាស៊ីនភ្លើង មកដល់កម្ពុជាឱ្យបានឆាប់ៗនាពេលខាងមុខ ។
សម្តេចតេជោ ហ៊ុន សែន បានថ្លែងអំណរគុណនាយករដ្ឋមន្ត្រីហ្វាំងឡង់ ដែលបានលក់ម៉ាស៊ីនភ្លើងដល់ប្រទេសកម្ពុជាកន្លងទៅ ។ ជាពិសេសការគាំទ្រដល់វិស័យថាមពលនៅកម្ពុជា ។ ពាក់ព័ន្ធកាកសំណល់វិញដែលជារឿងរសើបមួយនៅកម្ពុជានោះសម្តេចតេជោបានស្នើហ្វាំងឡង់ពិនិត្យវិនិយោគ ប្រសិនបើមានការចាប់អារម្មណ៍ ។ សម្តេចតេជោបានបញ្ជាក់ថា រឿងគ្រប់គ្រងកាកសំណល់មិនមែនជារឿងដាច់ដោយឡែករបស់កម្ពុជានោះទេ តែវាក៏ជារឿងក្នុងតំបន់របស់អាស៊ានផងដែរ ។
សម្តេចតេជោ ហ៊ុន សែន ក៏បានបង្ហាញពីបទពិសោធន៍របស់សម្តេចក្នុងការដឹកនាំប្រទេសក្នុងនាមជានាយករដ្ឋមន្ត្រីតាំងពីទសវត្សរ៍ឆ្នាំ៨០ ដែលមកដល់ពេលនេះមានរយៈពេលជាង៣៤ឆ្នាំហើយ ។ សម្តេចតេជោនាយករដ្ឋមន្ត្រីបានគូសបញ្ជាក់ថា សម្តេចបានឆ្លងកាត់នូវបទពិសោធន៍យ៉ាងច្រើនពាក់ព័ន្ធការវិនិយោគលើកាកសំណល់នេះ ។ សម្តេចតេជោបានបញ្ជាក់ថា ក្រុមហ៊ុនចង់វិនិយោគលើការគ្រប់គ្រងកាកសំណល់នេះត្រូវតែគោរពទៅតាមគោលនយោបាយ និងជំហររបស់រាជរដ្ឋាភិបាលកម្ពុជា គឺមិនឱ្យមានការនាំចូលកាកសំណល់ពីក្រៅប្រទេស ហើយកាកសំណល់ក្នុងប្រទេសត្រូវផលិតទៅជាថាមពល ឬផលិតក្រដាសជាដើម ។
នៅក្នុងជំនួបនេះឯកឧត្តមរដ្ឋមន្ត្រីហ្វាំងឡង់ក៏បានលើកឡើងដែរថា បច្ចុប្បន្នប្រទេសហ្វាំងឡង់មានការចាប់អារម្មណ៍ខ្ពស់ទៅលើការប្រែប្រួលអាកាសធាតុ ជាពិសេសការគាំទ្រដល់បញ្ហាបរិស្ថាន ។ បញ្ហាបរិស្ថាននេះហ្វាំងឡង់ធ្លាប់បានជួយមកដល់ប្រទេសកម្ពុជាតាមរយៈសហភាពអឺរ៉ុបផងដែរ តែមិនដែលបានជួយដោយផ្ទាល់នោះឡើយ ។ ចុងក្រោយនៃជំនួបពិភាក្សានេះសម្តេចតេជោ ហ៊ុន សែន ក៏បានអញ្ជើញឯករដ្ឋមន្ត្រីហ្វាំងឡង់មកបំពេញទស្សនកិច្ចនៅកម្ពុជា ដើម្បីស្វែងយល់ពីកម្ពុជា និងរកឱកាសសម្រាប់កិច្ចសហប្រតិបត្តិការក៏ដូចជា ការវិនិយោគ ៕ កែសម្រួលដោយ ៖ សុឃាក់
ចែករំលែកព័តមាននេះ