រាជធានីភ្នំពេញ ៖ បុរសម្នាក់ដោយសារតែស្រឡាញ់ទុកចិត្តប្រពន្ធខ្លាំងពេក ពេលត្រឡប់មកពីធ្វើការវិញបាត់ប្រពន្ធ ថែមទាំងយកទ្រព្យសម្បត្តិទៅជាមួយអស់ជិត៣ពាន់ដុល្លារបង្កឱ្យមានការភ្ញាក់ផ្អើលកាលពីម៉ោង៧និង២០នាទីយប់ ថ្ងៃទី៣ ខែកក្កដា ឆ្នាំ២០១៩ នៅផ្ទះជួល ស្ថិតក្នុងភូមិជ្រៃកោង…
រាជធានីភ្នំពេញ ៖ បុរសម្នាក់ដោយសារតែស្រឡាញ់ទុកចិត្តប្រពន្ធខ្លាំងពេក ពេលត្រឡប់មកពីធ្វើការវិញបាត់ប្រពន្ធ ថែមទាំងយកទ្រព្យសម្បត្តិទៅជាមួយអស់ជិត៣ពាន់ដុល្លារបង្កឱ្យមានការភ្ញាក់ផ្អើលកាលពីម៉ោង៧និង២០នាទីយប់ ថ្ងៃទី៣ ខែកក្កដា ឆ្នាំ២០១៩ នៅផ្ទះជួល ស្ថិតក្នុងភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ ។
ស្ត្រីដែលបាត់ខ្លួនខាងលើឈ្មោះ ខែត ស្រីទូច អាយុ២៦ឆ្នាំ មុខរបរនៅផ្ទះ ស្នាក់នៅបន្ទប់ជួលជាមួយប្តីនៅភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ មានស្រុកកំណើតនៅភូមិដូនឪ ឃុំស្នាយអញ្ជិត ស្រុកជំគិរី ខេត្តកំពត ចំណែកប្តីឈ្មោះ ភី ប្រុស ហៅវណ្ណ: អាយុ៣១ឆ្នាំ មុខរបរបុគ្គលិកហ្គាសទាន់សម័យម្តុំផ្សារថ្មី មានស្រុកកំណើតនៅភូមិដំណាក់ឈើក្រំ ឃុំស្នាយអញ្ជិត ស្រុកជំគិរីខេត្តកំពត ។ រីឯសម្ភារៈដែលប្រពន្ធយកទៅរួមមាន ខ្សែ.កមាសរបស់ប្តីទម្ងន់៥ជីមួយខ្សែ ខ្សែដៃមាសរបស់ប្រពន្ធមួយខ្សែទម្ងន់៣ជី និងកងដៃឈុត១៤កង ជិត១ពាន់ដុល្លារ និងកងជើង២ខ្សែប្លាកទីនជាង១លានរៀល រួមនឹងលុយឱ្យប្រពន្ធទុក៨០០ដុល្លារ សរុបទាំងអស់ប្រមាណ៣ពាន់ដុល្លារ ។
តាមការរៀបរាប់ពីបុរសជាប្តីប្រាប់ថា ប្រពន្ធគាត់នឹងគាត់រៀបអាពាហ៍ពិពាហ៍ត្រឹមត្រូវជាង១ឆ្នាំមកហើយមិនទាន់មានកូនទេ ចំណែករូបគាត់នឹងប្រពន្ធពុំដែលមានជំលោះនឹងគ្នាធ្ងន់ធ្ងរឡើយ គឺស្រឡាញ់គ្នាជាធម្មតាដោយឱ្យប្រពន្ធនៅតែផ្ទះដាំបាយឲ្យគាត់ហូបតែ១ពេលក្នុង១ថ្ងៃ ។ ហើយនៅមុនកើតហេតុគាត់ឆ្ងល់បន្តិចផងដែរ ព្រោះនៅពេលព្រឹកថ្ងៃកើតហេតុនោះ ប្រពន្ធតឿនឱ្យគាត់ប្រញាប់ទៅធ្វើការប្លែកជាងរាល់ថ្ងៃ។ លុះគាត់ត្រឡប់មកពីធ្វើការវិញមិនឃើញប្រពន្ធ បន្ទាប់មកអ្នកជិតខាងប្រាប់ថា ឃើញស្ត្រីជាប្រពន្ធរបស់គាត់ចេញទៅក្រៅតាំងពីថ្ងៃត្រង់មកម្ល៉េះ ។
ចំណែកបងស្រីបង្កើតរបស់ស្ត្រីបាត់ខ្លួនដែលរស់នៅបន្ទប់ជិតគ្នាប្រាប់ប្អូនថ្លៃទាំងទឹកភ្នែកផងដែរថា នៅមុនកើតហេតុ គាត់ត្រឡប់មកពីធ្វើការនៅពេលថ្ងៃត្រង់ឃើញប្អូនស្រីខ្លួនរៀបចំខ្លួន ហើយគាត់សួរប្អូនស្រី តែប្អូនស្រីគាត់ប្រាប់ថា «គាត់ទៅលេងម៉ែពុកនៅស្រុក» ។ ហើយគាត់សួរទៀតថា «តេប្រាប់ប្តីនៅ» ប្អូនស្រីឆ្លើយតបទៀតថា «អត់បានប្រាប់ប្តីគាត់ទេ» ហើយចេញទៅបាត់ លុះនៅម៉ោងកើតហេតុគាត់តេសួរទៅម៉ែពុកនៅស្រុកពួកគាត់មិនដឹងឡើយ ។
បើតាមការមើលទឹកមុខបងស្រីស្ត្រីដែលបាត់ខ្លួន មើលទៅដូចជាដឹងរឿងរាវផងដែរ ហើយបដិសេធថា រូបគាត់មិនដឹងរឿង ។ ទាក់ទិននឹងករណីនេះ បុរសជាប្តីបានត្រឹមអោបរូបថត សូមឱ្យប្រពន្ធរបស់គាត់ត្រឡប់មកវិញ គាត់មិនរករឿងអ្វីទេ ព្រោះខ្លាចចាញ់ការលួងលោមពីនាក់ដទៃ៕ (កែសម្រួលដោយ ៖ បុប្ផា)
ចែករំលែកព័តមាននេះ