រាជធានីភ្នំពេញ ៖ កញ្ញាស៊ឹម ថៃណា ដែលជាតារាចម្រៀងលេចធ្លោប្រចាំផលិតកម្មអឹមកាលពីច្រើនឆ្នាំមុន ស្រាប់តែស្រអាប់ពណ៌ បន្តិចម្តងៗព្រោះតែនាងជួបរឿងមួយចំនួនក្នុងជីវិត ។ ទោះជាយ៉ាងណាក្តីក្រោយមកនាងព្យាយាមជម្នះបញ្ហា ហើយពង្រឹងអាជីពឡើងវិញដោយច្រៀងពេលយប់ និងបង្កើតបទថ្មីដោយខ្លួនឯង ។
ក្រោយចាកចេញពីផលិតកម្មM ស៊ឹម ថៃណា បានក្លាយជាតារាចម្រៀងឯករាជ្យ ដោយ ផលិតបទចម្រៀង Original Song បង្ហោះនៅលើយូធូប ក្នុងឆាណែលផ្ទាល់ខ្លួន « Thaina Official » ។ កាលពីពេល ថ្មីៗកន្លងមកតារាស្រីដែលធ្លាប់ជាប់ឈ្មោះស្រឡាញ់ស្រីដូចគ្នារូប នេះបានឲ្យដឹងថា នាងបានចាកចេញពី ផលិតកម្មរយៈពេលយូរមកហើយ ចាប់តាំងពី ម្ដាយនាងបានទទួលអនិច្ចកម្មមកម្ល៉េះ។ ហេតុផលត្រូវកញ្ញាថៃណា អះអាង ថា ដោយសារចង់ស្វែងរកអ្វីដែលខ្លួនចង់ធ្វើ មិនរងអារម្មណ៍ពីបុគ្គលណាម្នាក់ ។
ស៊ឹម ថៃណា និយាយថា «ធ្វើជាតារាចម្រៀងឯករាជ្យសក្ដិសមជាងតារាចម្រៀងជាប់កិច្ចសន្យា ព្រោះនាងខ្ញុំជាមនុស្សចូលចិត្តធ្វើការងារតាមអារម្មណ៍ ដូច្នេះបើមានបទចម្រៀងចង់ច្រៀងពេលណាក៏ចេញ ជាសិទ្ធិសេរីភាពមួយដែលនាងខ្ញុំចង់បាន»។ បទថ្មីដែលស៊ឹម ថៃណា បានផលិតមានចំណងជើង ថា « កុំខ្លាចការបាត់បង់ » ទទួលបានការចាប់អារម្មណ៍ច្រើន ប៉ុន្ដែក៏ជួបការ លំបាកខ្លះដែរ ដោយសារក្រុមការងាររបស់ខ្លួន សុទ្ធតែសកម្ម និងខ្នះខ្នែងធ្វើបទចម្រៀងថ្មី បែបមនោសញ្ចេតនាមួយនេះឡើង មានលាយ បញ្ចូលភ្លេងបុរាណ និង ឧបករណ៍ភ្លេង SAXOPHONE ដើម្បីឱ្យកាន់ប្លែកត្រចៀក អាច អង្រួនចិត្តអ្នកគាំទ្របានមិនខាន ។
ស៊ឹម ថៃណា បញ្ជាក់ថា នេះជាការខិតខំ ប្រឹងប្រែងដំបូងក្នុងការផលិតបទដោយខ្លួនឯង បើទោះបីជាមិនទាន់ទទួលបានការគាំទ្រខ្លាំង ក៏ ពិតតែ តែនាងក៏ទទួលបានកម្លាំងចិត្តច្រើនពីអ្នកគាំទ្រ នៅលើបណ្ដាញសង្គម ។ ការគាំទ្រនេះធ្វើឱ្យ ថៃណា មានទឹកចិត្តផលិតបទថ្មីបន្ដ ទៀត ។
ឆ្លើយតបនឹងមានអ្នកនិយាយថា នាងស្រឡាញ់ស្រីដូចគ្នានោះ ស៊ឹម ថៃណា ថា «អូខេ ចរិតរបស់នាងខ្ញុំម៉ឺងម៉ាត់ រឹងមាំ មិនចេះតក់ស្លុតអ្វី ងាយៗមានតែប្រឹងប្រែងដោះស្រាយ ។ ប៉ុន្តែចរិតមួយនេះមិនអាចម៉ៃថានាងខ្ញុំស្រឡាញ់ស្រីនោះទេ គឺយកប្តី តែដោយសារបុរសជាគូគាប់មិនទាន់ជួបទើបនាងខ្ញុំត្រូវរស់នៅជានារីអាយុច្រើន ងារជាក្រមុំចាស់ ធ្វើម៉េចបើមិនទាន់ដល់គូ ហើយរងតែពាក្យខាងលើឡើងស៊ាំទៅហើយ »។ ស៊ឹម ថៃណា គ្រោងឡើងឆាកសម្តែងវិញនាពេលខាងមុខនេះ ៕ (កែសម្រួលដោយ ៖ បុប្ផា)
ចែករំលែកព័តមាននេះ