រាជធានីភ្នំពេញ ៖ សម្ដេចក្រឡាហោម ស ខេង នាយករដ្ឋមន្ត្រីស្តីទីបានថ្លែងអះអាងថា ចាប់តាំងពីឆ្នាំបោះឆ្នោតដំបូង១៩៩៣ រហូតដល់បច្ចុប្បន្នដែលរៀបចំដោយអង្គការសហប្រជាជាតិ កម្ពុជាមានសន្តិភាព និងមានលទ្ធិប្រជាធិបតេយ្យពិតប្រាកដដែលធ្វើឲ្យកម្ពុជាឆ្ពោះទៅរកការអភិវឌ្ឍន៍នូវសេដ្ឋកិច្ចជាតិ…
រាជធានីភ្នំពេញ ៖ សម្ដេចក្រឡាហោម ស ខេង នាយករដ្ឋមន្ត្រីស្តីទីបានថ្លែងអះអាងថា ចាប់តាំងពីឆ្នាំបោះឆ្នោតដំបូង១៩៩៣ រហូតដល់បច្ចុប្បន្នដែលរៀបចំដោយអង្គការសហប្រជាជាតិ កម្ពុជាមានសន្តិភាព និងមានលទ្ធិប្រជាធិបតេយ្យពិតប្រាកដដែលធ្វើឲ្យកម្ពុជាឆ្ពោះទៅរកការអភិវឌ្ឍន៍នូវសេដ្ឋកិច្ចជាតិ កាន់តែខ្លាំងឡើងថែមទៀត ។
ថ្លែងក្នុងសន្និបាតបូកសរុបការងារបោះឆ្នោតជ្រើសរើសក្រុមប្រឹក្សា អាណត្តិទី៣ ឆ្នាំ២០១៩ និងការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០១៩ នៅថ្ងៃទី៣ ខែកក្កដានេះនាខេត្តបាត់ដំបង សម្ដេចបានលើកឡើងថា តាមមេរៀន និងបទពិសោធន៍ដែលកម្ពុជាឆ្លងកាត់ ចាប់តាំងពីកាលបោះឆ្នោតជាតិលើកទី១ ឆ្នាំ១៩៩៣ ដែលបានរៀបចំដោយអង្គការសហប្រជាជាតិរហូតមកដល់បច្ចុប្បន្ន ។ យើងចាត់ទុកថា សន្តិភាពលទ្ធិប្រជាធិបតេយ្យ ការបោះឆ្នោតនិងការអភិវឌ្ឍន៍សេដ្ឋកិច្ចសង្គមជាដំណើរការ ដែលមានទំនាក់ទំនងផ្សារភ្ជាប់គ្នា និងជះឥទ្ធិពលឲ្យគ្នាទៅវិញទៅមក មិនអាចកាត់ផ្ដាច់បានឡើយ សម្រាប់ភាពលូតលាស់ ភាពរុងរឿង ភាពថ្លែថ្នូរ និងផលប្រយោជន៍ដ៏ឧដុងឧត្ដមនៃប្រជាជាតិ និងប្រជាជនយើង ។
សម្ដេចបានបញ្ជាក់ថា «រាជរដ្ឋាភិបាលមានប្ដេជ្ញាចិត្តយ៉ាងម៉ុតមាំក្នុងការធានាឲ្យដំណើរការស្នូរ បន្តបោះជំហ៊ានទៅមុខកាន់តែមានភាពរឹងមាំបន្ថែមទៀត» ។ ជាមួយគ្នានោះដែរនាយករដ្ឋមន្ត្រីស្តីទីក៏បានអំពាវនាវដល់ប្រជាពលរដ្ឋទូទាំងប្រទេស និងភាគីពាក់ព័ន្ធទាំងអស់រួមគ្នាថែរក្សាសុខសន្តិភាព លទ្ធិប្រជាធិបតេយ្យ ការបោះឆ្នោត សម្រាប់ការអភិវឌ្ឍន៍សេដ្ឋសង្គមដែលជាអនាគតដ៏បវររុងរឿងនៃប្រជាជាតិកម្ពុជាទាំងមូលផងដែរ ។
សូមជម្រាបថា ការបោះឆ្នោតចាប់អាណត្តីទី១ រដ្ឋសភាមកកម្ពុជាបានដំណើរការដោយគោរពតាមលទ្ធិប្រជាធិបតេយ្យ ដោយសារមានគណបក្សនយោបាយចូលរួមច្រើន ។ ប៉ុន្តែការបោះឆ្នោតក៏មានភាពរកាំរកូសខ្លះដែរ ដោយករណីបក្សប្រឆាំងមិនទទួលលទ្ធផលបោះឆ្នោត ដូចជាអាណត្តិ៥ រដ្ឋសភានៃការបោឈ្នោះឆ្នាំ២០១៣កន្លងមក៕ កែសម្រួលដោយ ៖ សុឃាក់
ចែករំលែកព័តមាននេះ