ខេត្តស្វាយរៀង ៖ យុវជនម្នាក់បានយកដែកកេសដុតម៉ូតូខ្លួនឯងចោល ដើម្បីផ្គើនប៉ូលិស ព្រោះតែរូបគេខឹងនឹងប៉ូលិសជិះម៉ូតូដេញតាមប្រាប់ថា «កុំឲ្យជិះម៉ូតូលឿនពេក ប្រយ័ត្នបង្កគ្រោះថ្នាក់ដល់អ្នកដទៃ» ប៉ុន្តែជននេះនៅតែមិនបន្ថយល្បឿន ហើយសមត្ថកិច្ចដេញតាមបម្រុងឃាត់ខ្លួនយកមកអប់រំ បែរជាឈប់ហើយផ្តួលម៉ូតូនៅក្រោមស្ពានយកដែកកេសដុតម៉ូតូចោលឌឺដាក់ប៉ូលីស ខ្លាំងអី! ជាប់ខ្នោះ។
ហេតុការណ៍នេះបានកើតឡើងកាលពីម៉ោង១១និង៣០នាទីព្រឹក ថ្ងៃទី២ ខែកក្កដា ឆ្នាំ២០១៩នៅខាងក្រោមស្ពានតាហោ(ផ្លូវវាង) ស្ថិតក្នុងភូមិក្បាលស្ពាន សង្កាត់ពោធិ៍តាហោ ក្រុងស្វាយរៀង។
បើតាមសមត្ថកិច្ចបានឲ្យដឹងថា មុនកើតហេតុ គេឃើញយុវជនម្នាក់មិនស្គាល់អត្តសញ្ញាណជិះម៉ូតូម៉ាកហុងដាវ៉េវ ពណ៌ក្រហម គ្មានស្លាកលេខ ពីលិចទៅកើតយ៉ាងលឿន លុះធ្វើដំណើរមកដល់ចំណុចកើតហេតុខាងលើ ក៏ត្រូវសមត្ថកិច្ចជិះម៉ូតូដេញតាមពីក្រោយទាន់ ហើយប្រាប់យុវជនខាងលើឲ្យឈប់ និងកុំបើកបរលឿនពេក ព្រោះស្ពានគេកំពុងជួសជុល ខ្លាចបង្កគ្រោះថ្នាក់ដល់អ្នកដទៃ។
ប្រភពដដែលបន្តថា គ្រាន់តែឮបែបនេះ ស្រាប់តែយុវជនរូបនោះនិយាយរបៀបអ្នកស្រវឹងថា «គេបើកតែគេ បើគ្រោះថ្នាក់ គឺគ្រោះថ្នាក់តែគេដែរ គ្មានអីពាក់ព័ន្ធទេ» បន្ទាប់មកពេលទៅដល់ខាងក្រោមស្ពានជននេះ ឈប់ម៉ូតូហើយក៏ផ្តួលម៉ូតូទាញយកដែកកេសមកដុតម៉ូតូចោលឆេះយ៉ាងសន្ធោរសន្ធៅរហូតសល់តែគ្រោងឆ្អឹង រទចដើរចេញទៅធ្វើមិនដឹង។
ប្រភពដដែលបន្តថា បន្ទាប់ពីដុតម៉ូតូរួច សមត្ថកិច្ចក៏ឃាត់ខ្លួនជននោះនាំទៅកាន់ស្នងការដ្ឋាននគរបាលខេត្តស្វាយរៀង ដើម្បីសាកសួរ និងធ្វើតេស្តទឹកនោមក្រែងមានសាធាតុញៀន។
ទាក់ទិនករណីនេះដែរ សមត្ថកិច្ចពុំទាន់ផ្តល់អត្តសញ្ញាណជនទំនើងនេះនៅឡើយទេ ហើយលទ្ធផលធ្វើតេសទឹកនោមក៏ពុំទាន់ដឹងថា យ៉ាងណានោះទេ រហូតដល់ម៉ោង៤និង២០នាទីល្ងាចនេះ៕ (កែសម្រួលដោយ ៖ បុប្ផា)
ប្រភពវីដេអូពីហ្វេសប៊ុក ៖ ABC FB
ចែករំលែកព័តមាននេះ