ខេត្តបន្ទាយមានជ័យ ៖ កម្លាំងនគរបាលជំនាញព្រហ្មទណ្ឌកំរិតស្រាល នៃស្នងការដ្ឋាននគរបាលខេត្តបន្ទាយមានជ័យបានបញ្ជូនជនសង្ស័យម្នាក់ ដែលបានប្រើហិង្សាដោយចេតនាធ្វើសកម្មភាពយកពូថៅកាប់ទៅលើជនរងគ្រោះម្នាក់ ខណៈពេលដែលជនរងគ្រោះកំពុងជិះម៉ូតូម្នាក់ឯងចេញពីភូមិតាមផ្លូវលំឆ្លងកាត់ភូមិប៉ោយតែប៉ែន ឃុំព្រះនេត្រព្រះ ស្រុកព្រះនេត្រព្រះ ខេត្តបន្ទាយមានជ័យ ហេតុការណ៍នេះបានកើតឡើងនៅរសៀលថ្ងៃទី០២ ខែកក្កដានេះ ។
ជនសង្ស័យឈ្មោះខេត ប៊ុនឈីញ ភេទប្រុស អាយុ២៧ឆ្នាំ នៅភូមិប៉ោយតាប៉ែន ឃុំព្រះនេត្រព្រះ ស្រុកព្រះនេត្រ ប្រើហិង្សាដោយចេតនាធ្វើសកម្មភាពយកពូថៅកាប់ទៅលើជនរងគ្រោះម្នាក់ឈ្មោះ ចាន់ សែម ភេទប្រុស អាយុ៣២ឆ្នាំ នៅភូមិគោកលុន ឃុំជប់វារី ស្រុកព្រះនេត្រព្រះ បណ្តាលឲ្យរងរបួសដៃខាងស្តាំ ខណៈពេលដែលជនរងគ្រោះកំពុងជិះម៉ូតូម្នាក់ឯងចេញពីភូមិតាមផ្លូវលំឆ្លងកាត់ភូមិប៉ោយតែប៉ែន ខេត្តបន្ទាយមានជ័យ ។
លោកវរសេនីយ៍ឯក ខែម សុភ័ណ នាយការិយាល័យ នគរបាលព្រហ្មទណ្ឌកំរិតស្រាលបានឲ្យដឹងថាតាមការឲ្យដឹងពីនគរបាលមូលដ្ឋានបានឲ្យដឹងថា មុនពេលកើតហេតុជនរងគ្រោះឈ្មោះចាន់ សែម ភេទប្រុសអាយុ៣២ឆ្នាំ នៅភូមិគោកលុន ឃុំជប់វារី នៅវេលាម៉ោង៥និង១៥នាទីល្ងាច ថ្ងៃទី០១ ខែកក្កដានេះបានជិះម៉ូតូម៉ាកហុងដាឌ្រីម ពណ៌ខ្មៅ សេរី២០១៩ ម្នាក់ឯងចេញពីភូមិពេលមកដល់ចំណុចផ្លូវលំ ក្នុងភូមិប៉ោយតាប៉ែន ឃុំព្រះនេត្រព្រះ ត្រូវបានជនសង្ស័យឈ្មោះ ខេត ប៊ុនឈីញ បានយកពូថៅកាប់ត្រូវដៃខាងស្តាំ ជនរងគ្រោះភ័យក៏ផ្តួលម៉ូតូចោលរត់គេចខ្លួន ពេលនោះជនសង្ស័យបានកាប់ទៅលើម៉ូតូ បណ្តាលឲ្យខូចខាតយ៉ាងដំណំផងដែរ បន្ទាប់មកជនរងគ្រោះក៏បានប្តឹងនគរបាលមូលដ្ឋាន ហើយក៏ឈានដល់ចាប់ខ្លួនជនសង្ស័យមកធ្វើការសាកសួរ ។
នៅចំពោះមុខសមត្ថកិច្ចជនសង្ស័យបានឆ្លើយសារភាពថា ខ្លួនគេបានពិតជាបានកាប់ទៅលើជនរងគ្រោះនិងម៉ូតូមែន មុនពេលកើតហេតុខ្លួនបានកាន់ពូថៅដេញកាប់ឆ្កែឆ្កួតមិនបាន ស្របពេលជនរងគ្រោះជិះម៉ូតូមកដល់ក្បែរខ្លួនក៏កាប់ជនរងគ្រោះនោះ និងម៉ូតូដែលគេផ្តួលចោលកុំឲ្យស៊យដៃ ។
លោកនាយការិយាល័យបានបញ្ជាក់ថា ផ្អែកលើបណ្តឹងជនរងគ្រោះ និងចម្លើយសារភាពជនប្រព្រឹត្តល្មើស រួមទាំងវត្ថុតាងជាក់ស្តែងស្នាមរបួស កម្លាំងនគរបាលជំនាញព្រហ្មទណ្ឌកំរិតស្រាលបានរៀបចំសំណុំរឿងបញ្ជូនជនសង្ស័យទៅសាលាដំបូងខេត្តចាត់ការតាមនីតិវិធីហើយផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ