រាជធានីភ្នំពេញ ៖ កុមារចំនួន១៤.៤២៣នាក់ មានជំងឺគ្រុនឈាមធ្ងន់ ត្រូវបានដាក់ឲ្យសម្រាកព្យាបាលនៅមន្ទីរពេទ្យគន្ធបុប្ផា ដែលចំនួននេះកើនឡើង៥,៥%ច្រើនជាងឆ្នាំ២០១៨ ក្នុងរយៈពេល៦ខែ គិតពីខែមករាដល់ខែមិថុនា ឆ្នាំ២០១៩ ។ នេះបើយោងតាមរបាយការណ៍របស់មន្ទីរពេទ្យគន្ធបុប្ផា ។
រយៈពេល៦ខែនេះដែរ មន្ទីរពេទ្យគន្ធបុប្ផាមានកុមារឈឺចំនួន៤៧៦.៦៦០នាក់ ត្រូវបានពិនិត្យនៅផ្នែកពិគ្រោះជំងឺក្រៅ ។ កុមារមានជំងឺធ្ងន់ចំនួន៩៧.៥១០នាក់ ត្រូវបានដាក់ឲ្យសម្រាកព្យាបាលនៅក្នុងមន្ទីរពេទ្យ(កើន៣៧%ច្រើនជាងក្នុងឆ្នាំ២០១៨) ហើយកុមារចំនួន១២.៨៧៧នាក់បានទទួលកាវះកាត់ ។ ការ
វះកាត់បេះដូង និងព្យាបាលភ្ជិតប្រហោងបេះដូងតាមសរសៃរឈាម បានចំនួន៤០៣នាក់ ។
ក្នុងផ្នែកសម្ភពនៃមន្ទីរពេទ្យជ័យវរ្ម័នទី៧ ស្ត្រីមានផ្ទៃពោះចំនួន៧៧.១៥០នាក់ បានមកពិនិត្យតាមដានផ្ទៃពោះ និងព្យាបាលនៅក្នុងផ្នែកពិគ្រោះជំងឺក្រៅនៃមន្ទីរសម្ភព ។ សម្រាលកូនបានចំនួន១១២.៧១៣នាក់។
ទាក់ទិននឹងការផ្ទុះជំងឺគ្រុនឈាមនេះ លោកសាស្ត្រាចារ្យមួយរូបនៃមន្ទីរពេទ្យគន្ធបុប្ផាទី៤ បានឲ្យដឹងថា ករណីផ្ទុះជំងឺគ្រុនឈាមនៅឆ្នាំនេះបានកើនឡើងជាង៥ដង បើធៀបទៅនឹងឆ្នាំ២០១៨ ។ ឆ្នាំនេះជាវដ្តរដូវកាលដែលបណ្តាលឲ្យផ្ទុះជំងឺគ្រុនឈាម ក្នុងនោះមន្ទីរពេទ្យគន្ធបុប្ផា បានទទួលកុមារជំងឺគ្រុនឈាមប្រមាណ២០០នាក់ជារៀងរាល់ថ្ងៃដើម្បីព្យាបាល ។ ក្នុងខែកក្កដានេះ ជំងឺគ្រុនឈាមនិងមានការកើន
ឡើង ហើយរហូតដល់ខែតុលាទើបថយចុះមកវិញ ។ ប្រសិនបើខែកក្កដានេះ ជំងឺគ្រុនឈាមមានចំនួនដដែលមិនកើនឡើង នោះខែសីហា កញ្ញា និងតុលាគឺនឹងចាប់ផ្តើមថយចុះ ។
លោកសាស្ត្រាចារ្យបានសំណូមពរថា ដើម្បីការពារសុខភាព ជៀសផុតពីការឆ្លងជំងឺគ្រុនឈាមដោយសារមូសខ្លាខាំ ពិសេសដើម្បីបង្ការការឈឺនិងស្លាប់ដោយសារជំងឺគ្រុនឈាមឲ្យកាន់តែមានប្រសិទ្ធភាពនោះ ប្រជាពលរដ្ឋទូទៅត្រូវនាំគ្នាស្វែងយល់អំពីវិធានការការពារពាក់ព័ន្ធនឹងជំងឺគ្រុនឈាមនេះ ដោយរួមគ្នាលុបបំបាត់ជម្រកមូសទីតាំងនៅជុំវិញផ្ទះឲ្យមានអនាម័យស្អាតកុំឲ្យមាទឹកដក់ ពីព្រោះមូសខ្លាជាប្រភពចម្លងដ៏សំខាន់នៃជំងឺគ្រុនឈាម ។ មួយវិញទៀត ត្រូវពាក់អាវដៃវែងនិងស្លៀកខោជើងវែងនៅពេលថ្ងៃ និងសម្រាន្តក្នុងមុងជាប់ជាប្រចាំ ។
ជាពិសេស លោកបានសំណូមពរដល់អាជ្ញាធរមូលដ្ឋាន ភូមិ ឃុំ សង្កាត់ ជួយសហការ អប់រំទៅដល់អ្នក
ធ្វើអាជីកម្ម ដែលពាក់ព័ន្ធនឹងការផ្ទុកសម្បកកង់រថយន្ត កង់ម៉ូតូ ដែលជាប្រភពចម្លងយ៉ាងចម្បងបំផុត ជាភ្នាក់ងារចម្លងធំ ដែលបង្កើតជម្រកមូសខ្លា ហើយបង្កើតជាបញ្ហានៃជំងឺគ្រុនឈាមនេះ ៕ (សម្រួលដោយ៖ ស្រីណា)
ចែករំលែកព័តមាននេះ