ប្រទេសជប៉ុន ៖ បណ្ដានាវានេសាទជប៉ុនកាលពីថ្ងៃទី១កក្កដា បានចាប់ត្រីបាឡែនបាន២ក្បាលក្នុងដែនទឹកជប៉ុន ដែលនោះជាការសម្ពោធបើកឡើងវិញនាថ្ងៃនោះ ការចាប់ត្រីបាឡែនធ្វើពាណិជ្ជកម្មក្រោយពីផ្អាក៣១ឆ្នាំមកហើយ។
ការងាកមកកាន់សមុទ្រវិញរបស់បណ្ដានាវាចាប់ត្រីបាឡែនជប៉ុន ក្នុងគោលបំណងធ្វើពាណិជ្ជកម្ម គឹបន្ទាប់ពីការសម្រេចមួយកាលពី៦ខែមុនរបស់រដ្ឋាភិបាលជប៉ុន ចាកចេញពីគណៈកម្មាធិការបាឡែនអន្តរជាតិ។ ត្រីបាឡែន២ក្បាលត្រូវបានចាប់ដោយបណ្ដានាវា ដែលចេញដំណើរនាថ្ងៃទី១កក្កដានោះពីកំពង់ផែគូសរ៉ូលើកោះហុកកៃដូបន្ទាប់ពីពិធីមួយ ដោយនាឱកាសនោះគេទាមទារភាពស្របច្បាប់នៃប្រពៃណីចាប់ត្រីបាឡែនរបស់ជប៉ុន។
បណ្ដាអ្នកកាសែតកត់សម្គាល់ឃើញនាវា១គ្រឿងក្នុងចំណោមនាវាចាប់ត្រីបាឡែន បានវិលត្រឡប់មកកំពង់ផែវិញ នាវេលារសៀល ជាមួយត្រីបាឡែនមួយក្បាល ដែលដឹកបន្តតាមរថយន្តកាំមីញ៉ុង១គ្រឿងនាំវាយកទៅកាប់លក់។ ត្រីបាឡែនដែលចាប់បានហើយដឹកយកទៅកាប់នោះ មានប្រវែងដល់ទៅ៨,៣ម៉ែត្រដែលដឹកចេញទាំងស្ថិតក្នុងសំណាញ់។
ការចាប់ត្រីបាឡែនធ្វើពាណិជ្ជកម្ម មានចាប់តាំងពីជាង៤០០ឆ្នាំមកហើយនៅជប៉ុន។ ត្រីបាឡែនធំនោះចាប់បានក្នុងដែនទឹកចម្ងាយ៤២គីឡូម៉ែត្រពីកំពង់ផែគូស៊ីរ៉ូ។ នាវារោងចក្រត្រីNASSIN MARU ជានាវាធំនៃកងនាវាចាប់ត្រីបាឡែនជប៉ុន និងនាវាជាច្រើនគ្រឿងទៀត ក៏ចាកចេញពីកំពង់ផែSHIMONOSEKI ភាគនិរតីជប៉ុន ដើម្បីទៅចាប់ត្រីបាឡែនដែរ។ មុននេះជប៉ុនបានចាប់ត្រីបាឡែនក្នុងគោលដៅវិទ្យាសាស្ត្រប៉ុណ្ណោះ ហើយតែងជួបប្រទះការប្រឆាំងយ៉ាងខ្លាំងក្លា ពីសំណាក់់បណ្ដាអង្គការការពារបរិស្ថាន៕ (កែសម្រួលដោយ ៖ បុប្ផា)
ចែករំលែកព័តមាននេះ