ខេត្តត្បូងឃ្មុំ ៖ ក្រសួងកសិកម្ម រុក្ខាប្រមាញ់ និងនេសាទ បានចេញប្រកាសមួយបញ្ជាក់ឲ្យដឹងអំពីករណីនៃការផ្ទុះ ករណីជំងឺប៉េស្តជ្រូកអាហ្រិ្វក នៅភូមិចំនួនពីរ នៃស្រុកអូរាំងឪ ខេត្តត្បូងឃ្មុំ…
ខេត្តត្បូងឃ្មុំ ៖ ក្រសួងកសិកម្ម រុក្ខាប្រមាញ់ និងនេសាទ បានចេញប្រកាសមួយបញ្ជាក់ឲ្យដឹងអំពីករណីនៃការផ្ទុះ ករណីជំងឺប៉េស្តជ្រូកអាហ្រិ្វក នៅភូមិចំនួនពីរ នៃស្រុកអូរាំងឪ ខេត្តត្បូងឃ្មុំ នាថ្ងៃទី០២ ខែកក្កដានេះ ។
បើយោងតាមប្រកាសរបស់ក្រសួងចុះថ្ងៃទី២ ខែកក្កដានេះ ស្តីពី «ការកំណត់តំបន់ផ្ទុះជំងឺប៉េស្តជ្រូកអាហ្រិក» បានបញ្ជាក់ឲ្យដឹងថា ត្រូវបានកំណត់តំបន់ផ្ទុះជំងឺប៉េស្តជ្រូកអាហ្វ្រិកចំនួនពីរកន្លែង ស្ថិតនៅភូមិកំពង់សេរី និងភូមិសោយ ឃុំមាន ស្រុកអូរាំងឪ ខេត្តត្បូងឃ្មុំ ។
ប្រភពដដែលបានបញ្ជាក់ថា អគ្គនាយកដ្ឋានសុខភាពសត្វ និងផលិតកម្មសត្វត្រូវចាត់វិធានការបសុព្យាបាលជាបន្ទាន់នៅតំបន់ ផ្ទុះករណីជំងឺប៉េស្តជ្រូកអាហ្រិ្វក តាមរយៈ ១- បំផ្លាញចោលចំពោះសត្វជ្រូកគ្រប់ប្រភេទក្នុងតំបន់ផ្ទុះជំងឺទៅតាមវិធានការបសុព្យាបាល ២- ផ្អាកលើការទិញលក់ដូរ និងការដឹកជញ្ជួនសត្វជ្រូក សាច់ជ្រូក និងផលិតផលមានដើមកំណើតពីសត្វជ្រូក គ្រប់ប្រភេទចូល ចេញ ឬឆ្លងកាត់ក្នុងរង្វង់កាំប្រែង៣ គីឡូម៉ែត្រ និងពីចំណូចផ្ចិតនៃតំបន់ផ្ទុះជំងឺ ។
យ៉ាងណាមិញ ក្រសួងជំនាញបានបញ្ជាក់ថា «ជំងឺប៉េស្តជ្រូកអាហ្រិ្វក មិនឆ្លងនិងប៉ះពាល់ដល់មនុស្សទេ ប៉ុន្តែជំងឺនេះបណ្តាលឲ្យជ្រូកឈឺ និងងាប់មានអត្រាខ្ពស់រហូតដល់ ១០០ភាគរយ ដែលបង្កការខាតបង់ធ្ងន់ធ្ងរដល់អ្នកចិញ្ចឹមជ្រូកតែប៉ុណ្ណោះ» ។
សូមបញ្ជាក់ថាករណីទី១ នៃការផ្ទុះជំងឺប៉េស្តជ្រូកអាហ្រិ្វក ត្រូវបានមន្ត្រីជំនាញរកឃើញថា មានផ្ទុះឡើងនៅស្រុកអូរយ៉ាដាវ ខេត្តរតនគិរី កាលពីចុងខែមីនា និងបានឆ្លងរាលដល់ស្រុកអូរជុំ កាលពីមុនពិធីបុណ្យចូលឆ្នាំខ្មែរ ដែលធ្វើឲ្យសត្វជ្រូកដែលប្រជាពលរដ្ឋបានចិញ្ចឹមតាមផ្ទះជាច្រើនរយក្បាល បានងាប់ និងដុតកម្ទេចចោលជាបន្តបន្ទាប់ ៕ កែសម្រួលដោយ ៖សុឃាក់
ចែករំលែកព័តមាននេះ