រាជធានីភ្នំពេញ ៖ បន្ទាប់ពីសារព័ត៌មានអនឡាញមួយចំនួន និងបណ្តាញសង្គមបង្ហោះដោយចោទប្រកាន់លើលោកឧត្តមសេនីយ៍ត្រី ចាន់ សាហ៊ុត ជាអនុប្រធាននាយកដ្ឋានព័ត៌មានវិទ្យានៃអគ្គលេខាធិការដ្ឋានក្រសួងមហាផ្ទៃ ជាអ្នកកាងដីឱ្យលោកឧកញ៉ា ង៉ាន់ វណ្ណា…
រាជធានីភ្នំពេញ ៖ បន្ទាប់ពីសារព័ត៌មានអនឡាញមួយចំនួន និងបណ្តាញសង្គមបង្ហោះដោយចោទប្រកាន់លើលោកឧត្តមសេនីយ៍ត្រី ចាន់ សាហ៊ុត ជាអនុប្រធាននាយកដ្ឋានព័ត៌មានវិទ្យានៃអគ្គលេខាធិការដ្ឋានក្រសួងមហាផ្ទៃ ជាអ្នកកាងដីឱ្យលោកឧកញ៉ា ង៉ាន់ វណ្ណា ព្រមទាំងយករូបលោក មានពាក់ឯកសណ្ឋាន
មកបង្ហោះនោះ ធ្វើឱ្យលោកមានប្រតិកម្មខឹងយ៉ាងខ្លាំង ចំពោះព័ត៌មានដែលមិនមែនជាការពិត ។
លោកឧត្តមសេនីយ៍ត្រីចាន់ សាហ៊ុត បានឱ្យដឹងថា កាលពីថ្ងៃទី២៨ មិថុនា មានសារព័ត៌មានអនឡាញមួយចំនួន បានយករូបរបស់លោក ពាក់ជាឯកសណ្ឋាននគរបាល និងរូបអង្គុយលើអង្រឹងស្លៀកពាក់ស៊ីវិលពាក់មួក ពាក់វែនតា ចេញពីគណនីហ្វេសប៊ុករបស់លោកមកដាក់លើអត្ថបទរបស់ខ្លួន ដោយមានខ្លឹមសារថា លោកផ្កាយ១ ចាន់ សាហ៊ុត ក្លាយជាអ្នកកាងដីឧកញ៉ាល្បីឈ្មោះរំលោភដីពលរដ្ឋង៉ាន់ វណ្ណា ព្រមទាំងប្រើស្លាកលេខរថយន្តនគរបាល2-3221 ជាការកំញើញគំរាមចិត្តសាស្ត្រ ដល់ពលរដ្ឋស្លូតត្រង់នៅភូមិ៥ សង្កាត់លេខ៤ ក្រុងព្រះសីហនុ ដែលកំពុងមានវិវាទដីធ្លីជាមួយឧកញ៉ាល្បីប្លន់ដីពលរដ្ឋ ង៉ាន់វណ្ណាយ៉ាងក្តៅគគុក ។
លោកចាន់ សាហ៊ុត មានប្រតិកម្មថា ចំពោះខ្លឹមសារខាងលើនោះ បានធ្វើប៉ះពាល់ដល់កិត្តិយស និងសេចក្តីថ្លៃថ្នូររបស់លោក រួមនិងអង្គភាពយ៉ាងធ្ងន់ធ្ងរ ។ ក្នុងន័យនេះ ដើម្បីកុំឲ្យសាធារណជន និងអ្នកលេងបណ្ដាញទំនាក់ទំនងសង្គម មានការភាន់ច្រឡំ ដូច្នេះ ខ្ញុំសូមធ្វើការបកស្រាយថា៖១-ក្នុងនាមបងប្អូនរាប់អានស្រឡាញ់គ្នាជាមួយនឹងបងវណ្ណា គាត់ហៅទៅលេងពីរនាក់គាត់ តើខ្ញុំអាចទៅលេងបានទេ ឬមួយអស់លោកឃាត់ខ្ញុំដែរ ។ សូមបងប្អូននិងសាធារណៈជនតាមដានពិចារណាមើលពាក្យថាកាងដីគេនោះតើមនុស្សត្រូវធ្វើអ្វីខ្លះ? មួយវិញទៀតថាខ្ញុំ ចាន់ សាហ៊ុត និងបក្សពួក នៅទីនោះកាងដីរំលោភដីគេចុះ ហេតុអ្វីថតមិនឃើញ,កាមេរ៉ាជិត10គ្រឿង ហេតុអី្វក៏ឃើញតែខ្ញុំម្នាក់ឯង? ។ ២-ខ្ញុំបាទមានរថយន្តផ្ទាល់ខ្លួនតែមួយគ្រឿងគត់ សម្រាប់ធ្វើការរាល់ថ្ងៃ គឺម៉ាកឡិចស៊ីស 470 ពណ៌ខ្មៅស៊េរីឆ្នាំ 2003 ពាក់ស្លាកលេខ 2L-05 99 ហើយពុំដែលបានខ្ចីឡានគេជិះទេ។ ៣-នៅពេលលោក នួន សុខាវី សមាជិកឧត្តមក្រុមប្រឹក្សាពិគ្រោះយោបល់ និងផ្ដល់យោបល់ដឹកនាំអ្នកសារព័ត៌មានចំនួនប្រហែលជិត១០នាក់ សម្រុកចូលទៅក្នុងរោងចាំដីរបស់បងវណ្ណា រូបខ្ញុំបានឈរនៅទីនោះដែរ ដោយក្រុមគាត់បានសួររកតែលោកវណ្ណាទេ ហើយយកកាមេរ៉ាថតខ្ញុំតាមចិត្តដោយគ្មានការអនុញ្ញាត មួយសន្ទុះ ខ្ញុំក៏បើកទូរស័ព្ទដៃថតវិញពេលនោះ ក្រុមអ្នកសារព័ត៌មាននិងបក្សខពួក ដែលមានកាមេរ៉ាគ្រប់ដៃចំនួនប្រហែលជិត10នាក់នោះសួរខ្ញុំថា លោកឯងសូរិយោដីមែនទេ ហេតុអីថតអ្នកសារព័ត៌មាន ខ្ញុំឆ្លើយថា លោកឯងថតខ្ញុំបាន ខ្ញុំក៏មានសិទ្ធិថតលោកឯងវិញដែរ ។
លោកថា ខ្ញុំក៏មិនដឹងថា គាត់ថតយកទៅបង្ហោះវាយប្រហារមួលបង្កាច់បរិហារកេរ្តិ៍ មើលងាយមើលថោក និងធ្វើឲ្យអ្នកដទៃរើសអើងខ្ញុំដូចពេលនេះសោះ។ ដូច្នេះ សូមឱ្យអ្នកសារព័ត៌មានមួយចំនួន ជួយធ្វើការកែតម្រូវនិងចុះផ្សាយឡើងវិញ ដើម្បីកុំឲ្យសាធារណជនភាន់ច្រឡំ បើមិនដូច្នេះទេ លោកនឹងចាត់វិធានការតាមផ្លូវច្បាប់ហើយ ។ (សម្រួលដោយ៖ ស្រីណា)
ចែករំលែកព័តមាននេះ