ខេត្តស្វាយរៀង ៖ ប្រជាពលរដ្ឋមានការព្រួយបារម្ភយ៉ាងខ្លាំងអំពីសន្តិសុខសណ្តាប់ធ្នាប់ ដោយប៉ុន្មានសប្តាហ៍ចុងក្រោយនេះ មានករណីចោរធ្វើសកម្មភាពបំពុលសត្វឆ្កែងាប់ជាបន្តបន្ទាប់ហើយចូលគាស់បន្ទប់ក្រោមផ្ទះ លួចយកម៉ូតូរបស់ប្រជាពលរដ្ឋអស់ជាច្រើនគ្រឿង ទើបមានការព្រួយបារម្ភពីសុវត្ថិភាពសន្តិសុខនៅតាមមូលដ្ឋាន។
បើតាមសមត្ថកិច្ចបានឲ្យដឹងថា នៅម៉ោង១យប់រំលងអធ្រាត្រឈានចូលថ្ងៃទី១ កក្កដា ២០១៩ មានចោរមួយក្រុមធ្វើសកម្មភាពបំពុលឆ្កែងាប់អស់ជាច្រើនក្បាល ហើយចូលលួចគាស់យកម៉ូតូរបស់ប្រជាពលរដ្ឋអស់២គ្រឿងយកទៅបាត់ដោយសុវត្ថិភាព ករណីនេះកើតឡើងនៅក្នុងភូមិត្រោក ឃុំគ្រួស ស្រុកស្វាយជ្រំ។
បើតាមសមត្ថកិច្ចបានឲ្យដឹងថា ជនរងគ្រោះឈ្មោះ កុសល់ និងប្រពន្ធឈ្មោះ គារ មានទីលំនៅភូមិ-ឃុំកើតហេតុខាងលើ ហើយបានត្រូវក្រុមចោរធ្វើសកម្មភាពបំពុលឆ្កែងាប់អស់ចំនួន៩ក្បាល រួចចូលគាស់សោបន្ទប់ក្រោមផ្ទះយកម៉ូតូអស់ចំនួន២គ្រឿងម៉ាកហុងដាសេ១២៥ ទៅបាត់ដោយសុវត្ថិភាព។ លុះព្រឹកឡើងទើបសមត្ថកិច្ចចុះទៅផ្ទះកើតហេតុធ្វើការសាកសួរ ដើម្បីស្រាវជ្រាវរកជនល្មើសមកផ្តន្ទាទោសតាមច្បាប់។
បើតាមម្ចាស់ផ្ទះឲ្យដឹងថា ពួកគាត់ចូលដេកនៅវម៉ោង១០យប់ ដូច្នេះគាត់សន្និដ្ឋានថា ក្រុមចោរធ្វើសកម្មភាពប្រហែលជាម៉ោង១១យប់ទៅម៉ោង១យប់ លុះគាត់ចុះមកមើលជុំវិញផ្ទះស្រាប់តែឃើញឆ្កែរបស់គាត់កំពុងតែពុល និងងាប់ជាបន្តបន្ទាប់ ហើយពេលនោះគាត់ទៅមើលទ្វារបន្ទប់ក្រោមផ្ទះដែលជាកន្លែងដាក់ម៉ូតូ ស្រាប់តែឃើញមានកាត់សោ ហើយលួចយកម៉ូតូរបស់គាត់បាត់ទាំងពីរគ្រឿងទៅបាត់ ហើយក៏ប្តឹងសមត្ថកិច្ចភ្លាមៗដែរ។ (កែសម្រួលដោយ ៖ បុប្ផា)
ចែករំលែកព័តមាននេះ