រាជធានីភ្នំពេញ ៖ រថយន្តហ៊ីយ៉ាន់ដាយធន់យក្សដឹកត្រី១គ្រឿង ខណៈបើកបរបត់ស្តាំមិនមើលមុខមើលក្រោយក៏បានជ្រុលទៅកៀររថយន្តម៉ាកកូរ៉ូឡា១គ្រឿងទៀតដែលកំពុងបើកនៅទន្ទឹមគ្នាខាងស្ដាំខ្លួន ហើយគាបជាប់គ្នាបណ្តាលឲ្យរថយន្តកូរ៉ូឡានោះរងខូចខាតផ្នែកខាងមុខខាងឆ្វេងយ៉ាងដំណំ ប៉ុន្តែជាសំណាងល្អមិនបានបណ្ដលឲ្យមានគ្រោះថ្នាក់ដល់អ្នកបើកបរឬអ្នកជិះនៅក្នុងនោះឡើយ ។
ឧប្បត្តិហេតុនោះបានកើតឡើងកាលពីវេលាម៉ោង១០និង៤៥នាទីព្រឹកថ្ងៃទី០១ ខែកក្កដា ឆ្នាំ២០១៩ នៅលើកំណាត់ផ្លូវជាតិលេខ៤ ត្រង់ចំណុចមុខសាលាសង្កាត់ចោមចៅ៣ ស្ថិតនៅក្នុងភូមិថ្នល់បំបែក សង្កាត់ចោមចៅ៣ ខណ្ឌពោធិ៍សែនជ័យ ។
តាមប្រភពព័ត៌មានបានឲ្យដឹងថា រថយន្តធុនយក្សខាងលើម៉ាកហ៊ីយ៉ាន់ដាយ ពណ៌ស ពាក់ផ្លាកលេខ ព្រះសីហនុ 3A-1600 ជារថយន្តទ្រុងដឹកត្រី បើកបរដោយបុរសមិនស្គាល់ឈ្មោះម្នាក់ ហើយនៅមុនពេលកើតហេតុរថយន្តេះបានបើកបរធ្វើដំណើរតាមផ្លូវជាតិលេខ៤ ក្នុងទិសដៅពីលិចទៅកើត
លុះពេលទៅដល់ត្រង់ចំណុចកើតហេតុខាងលើបានបត់ស្តាំចូលតាមផ្លូវភូមិថ្នល់បំបែក និងក្នុងភូមិព្រៃព្រីងខាងត្បូងឆ្ពោះឡើងទៅផ្លូវជាតិលេខ៣ ប៉ុន្តែអត់មើលមុខមើលក្រោយក៏ជ្រុលទៅកៀររថយន្តកូរ៉ូឡាពណ៌ស្លែ ពាក់ផ្លាកលេខ ភ្នំពេញ 2G-0426 ដែលកំពុងបើកស្របទិសគ្នានិងនៅទន្ទឹមគ្នានៅខាងស្តាំដៃបណ្តាលឲ្យគាបជាប់គ្នា និងរងការខូចខាតយ៉ាងដំណំតែម្ដង ។
ប្រភពដដែលបានបន្តថា ខណៈនោះសំណាងហើយដែលគ្មានអ្នករងគ្រោះហើយក្រោយពេលកើតហេតុកម្លាំងនគរបាលបានចុះទៅសម្រួលរាចរមិនឲ្យមានការកកស្ទះ បន្ទាប់មកឲ្យភាគីទាំង២សម្របសម្រួលគ្នាមួយសន្ទុះទើបត្រូវរ៉ូវគ្នាដោយខាងម្ចាស់រថយន្តដឹកត្រីសុខចិត្តចេញសំណងថ្លៃជួសជុលទៅឲ្យម្ចាស់រថយន្តកូរ៉ូឡាជាការបញ្ចប់រឿង ៕
កែសម្រួលដោយ ៖ សំណាង
ចែករំលែកព័តមាននេះ