ខេត្តបាត់ដំបង ៖ តុលាការកំពុងសាកសួរជនសង្ស័យ៤នាក់បន្តទៀតនៅព្រឹកថ្ងៃទី០១ កក្កដា ពាក់ព័ន្ធនឹងសំណុំរឿងជួញដូរថ្នាក់ញៀន ដែលកម្លាំងជំនាញកងរាជអាវុធហត្ថឃាត់ខ្លួនកាលពីចុងសប្ដាហ៍មុននេះ។ នេះបើតាមការបញ្ជាក់ប្រាប់ពីសំណាក់លោក សំ វិឡុង មេបញ្ជាការមូលដ្ឋានកងរាជអាវុធហត្ថក្រុងបាត់ដំបង។…
ខេត្តបាត់ដំបង ៖ តុលាការកំពុងសាកសួរជនសង្ស័យ៤នាក់បន្តទៀតនៅព្រឹកថ្ងៃទី០១ កក្កដា ពាក់ព័ន្ធនឹងសំណុំរឿងជួញដូរថ្នាក់ញៀន ដែលកម្លាំងជំនាញកងរាជអាវុធហត្ថឃាត់ខ្លួនកាលពីចុងសប្ដាហ៍មុននេះ។ នេះបើតាមការបញ្ជាក់ប្រាប់ពីសំណាក់លោក សំ វិឡុង មេបញ្ជាការមូលដ្ឋានកងរាជអាវុធហត្ថក្រុងបាត់ដំបង។
លោកសំ វិឡុង បានប្រាប់ថា ជនសង្ស័យទាំង៤នាក់ ត្រូវឃាត់ខ្លួននោះ ១-ឈ្មោះ បាត់ សាម៉ាន់ ភេទប្រុស អាយុ១៨ឆ្នាំ ២-ឈ្មោះ វ៉ាន សារៀន ភេទប្រុស អាយុ១៤ឆ្នាំ ៣-ឈ្មោះ ប៊ុន វិបុល ភេទប្រុស អាយុ៣០ឆ្នាំ និង៤-ឈ្មោះ ប៊ុន សារីម ភេទប្រុស អាយុ១៩ឆ្នាំ ហើយក្រុមនេះរស់នៅភូមិព្រៃកូនសេក សង្កាត់អូរម៉ាល់ ក្រុងបាត់ដំបង។
លោកមេបញ្ជាការរូបនេះបានបញ្ជាក់ថា ក្រុមនេះត្រូវកម្លាំងជំនាញរបស់លោកឃាត់ខ្លួនពីបទជួញដូរគ្រឿងញៀន កាលពីម៉ោង៣រសៀល ថ្ងៃទី២៩ មិថុនា ខណៈដែលពួកគេកំពុងភ្ជួរដីនៅត្រង់ចំណុចខាងក្នុងបរិវេណ «មជ្ឈមណ្ឌលសុភមង្គល» ដែលស្ថិតក្នុងភូមិសាលាបាឡាត់ សង្កាត់អូរម៉ាល់ ក្រុងបាត់ដំបង។
ពាក់ព័ន្ធនឹងការឃាត់ខ្លួនជនទាំង៤នាក់នេះ បើយោងតាមរបាយការណ៍ឲ្យដឹងថា សមត្ថកិច្ចបានដកហូតវត្ថុតាងមួយចំនួនមាន ១.សារធាតុញៀនប្រភេទម្សៅក្រាមពណ៌សរឹងថ្លា ICE (ម៉ាទឹកកក) ចំនួន២កញ្ចប់ មានទម្ងន់០,៤២ក្រាម ២.ត្រាក់ទ័រ១គ្រឿង ម៉ាក KUBOTA ពណ៌ទឹកក្រូច ៣.ទូរស័ព្ទដៃ៣គ្រឿង។
មន្ត្រីជំនាញបញ្ជាក់ថា ក្រុមនេះបានប្រមូលផ្ដុំគ្នាប្រព្រឹត្តបទល្មើសគ្រឿងញៀននៅកន្លែងដែលពួកគេកំពុងបើកត្រាក់ទ័រភ្ជួរដីនៅចំណុចខាងលើ ទើបត្រូវកម្លាំងជំនាញឃាត់ទាំងមនុស្ស ដកហូតទាំងសម្ភារ: ដើម្បីកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវីធីតែម្ដង ហើយពេលនេះតុលាការកំពុងសាកសួរជនទាំង៤នាក់នៅឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ