ខេត្តមណ្ឌលគិរី៖ របត់សង្គមបច្ចុប្បន្នបានផ្លាស់ប្តូររបៀបរស់នៅរបស់មនុស្សទូទាំងសាកលលោក ខណៈបច្ចេកវិទ្យាបានផ្សាភ្ជាប់ក្នុងជីវិតប្រចាំថ្ងៃមិនអាចខ្វះបាន តែទោះជាយ៉ាងណា ជនជាតិភាគតិចនៅខេត្ត មណ្ឌលគិរីនៅតែរក្សាប្រពៃណីទំនៀមទម្លាប់វប្បធម៌ពួកគាត់ និងយកមកអនុវត្តជារឿយៗ។ ជាក់ស្តែង ថ្មីៗកន្លងទៅនេះ គ្រួសារដែលមានដើមកំណើតជាជនជាតិដើមភាគតិចព្នង១គ្រួសារ…
ខេត្តមណ្ឌលគិរី៖ របត់សង្គមបច្ចុប្បន្នបានផ្លាស់ប្តូររបៀបរស់នៅរបស់មនុស្សទូទាំងសាកលលោក ខណៈបច្ចេកវិទ្យាបានផ្សាភ្ជាប់ក្នុងជីវិតប្រចាំថ្ងៃមិនអាចខ្វះបាន តែទោះជាយ៉ាងណា ជនជាតិភាគតិចនៅខេត្ត មណ្ឌលគិរីនៅតែរក្សាប្រពៃណីទំនៀមទម្លាប់វប្បធម៌ពួកគាត់ និងយកមកអនុវត្តជារឿយៗ។ ជាក់ស្តែង ថ្មីៗកន្លងទៅនេះ គ្រួសារដែលមានដើមកំណើតជាជនជាតិដើមភាគតិចព្នង១គ្រួសារ នៅក្រុងសែនមនោរម្យ បានធ្វើពិធីសែនព្រេនលើករាសីយ៉ាងអធិកអធម និងមានការចូលរួមពីសំណាក់ជនជាតិព្នងរាប់រយនាក់ ។
លោក ណយ ច័ន្ឋដារ៉ា ជាម្ចាស់កម្មវិធីសែនព្រេនមានឈាមជ័រជាជនជាតិព្នង និងជាមន្ត្រីរាជការមួយរូប
ក្នុងខេត្តមណ្ឌលគិរីបានប្រាប់ថា នេះជាពិធីសែនព្រេនលើករាសីកាប់ក្របីនិងផឹកស្រា ជនជាតិព្នងដែលធ្វើពិធីនេះ គឺចង់រំឮកគុណដល់ដូនតា និងអន្ទងហៅវិញ្ញាណក្ខន្ធដូនតាម្ចាស់ទឹកម្ចាស់ដីមកទទួលយកការសែន ព្រេន បន្តថែរក្សាជួយជ្រោម ជ្រែងកូនចៅជំនាន់ក្រោយឲ្យជោគជ័យបន្ថែមទៅមុខទៀត ។ពិធីនេះគេធ្វើម្ដងម្កាលមិនចាំបាច់ធ្វើរៀងរាល់ឆ្នាំនោះទេ ប៉ុន្តែប្រសិនយើងចង់ធ្វើពិធីនេះ គឺអាចធ្វើប៉ុន្មានដងក៏បានក្នុងមួយឆ្នាំ ។
លោក ណយ ច័ន្ឋដារ៉ា បន្តថា ការសែនព្រេនក្នុងពិធីលើករាសីនេះ តម្រូវឲ្យមានបូជាសត្វក្របី១ក្បាល ជ្រូក១ ក្បាល មាន់៣ក្បាល និងស្រា៣ពាង ក្នុងនោះមានស្រាពាងរលូង១ពាង ជាស្រាពាងបូរាណ ដែលជនជាតិដើមភាគតិចព្នង គោរពសម្រាប់ផឹកស្បថស្បែ ឬសន្យាអ្វីមួយ មិនហ៊ានបំពានពាក្យនោះទេ ។
ក្រៅពីការសែនព្រេននោះ ក្នុងពិធីនេះ ក៏តម្រូវឲ្យមានការច្រៀងរាំរែកជាមួយរបាំប្រពៃណី ដូចជារបាំដាំស្រូវ របាំបេះផ្លៃឈើ និងរបាំជាច្រើនទៀត ។ ពិធីនេះដែរ ពីបុរាណគេប្រារព្ធ៣ថ្ងៃ ថ្ងៃទី១សែនសុំបើកផ្លូវ ថ្ងៃទី២ជាថ្ងៃពិសេសមានការកាប់ក្របីជ្រូកមាន់ ចំណែកថ្ងៃទី៣គឺសែនបញ្ចប់កម្មវិធីផ្កាប់ពាងស្រា ប៉ុន្តែមកដល់បច្ចុបន្នពុំសូវបានធ្វើគ្រប់៣ថ្ងៃនោះទេ គឺធ្វើតាមលទ្ធភាពដែលអាចធ្វើទៅបាន ។
ប្រធានមន្ទីរវប្បធម៌និងវិចិត្រសិល្បៈខេត្តមណ្ឌលគិរី លោក សី ទូច បានឲ្យដឹងដែរថា ការធ្វើពិធីសែនព្រេនលើក រាសីនេះ លោកសង្កេតឃើញថា គេបានធ្វើជារឿយៗ និងជារឿងល្អមួយដែលជនជាតិព្នងនៅតែប្រកាន់ភ្ជាប់ជាមួយ ប្រពៃណីបានយ៉ាងល្អ ។
លោកកត់សម្គាល់ថា ជនជាតិព្នងភាគច្រើននៅខេត្តមណ្ឌលគិរីបានអនុវត្តតាមសាសនាប្រពៃណីរបស់
ពួកគាត់បានល្អ លើកលែងជនជាតិដើមមួយចំនួនដែលចូលសាសនាផ្សេង គឺមិនអនុវត្តតាមប្រពៃណីទៀតទេ ៕ (សម្រួលដោយ៖ ស្រីណា)
ចែករំលែកព័តមាននេះ