រាជធានីភ្នំពេញ៖ ព្រឹទ្ធាចារ្យផ្នែកសិល្បៈបុរាណលោកអៀង ស៊ីធុល កំពុងព្យាបាលជំងឺចាស់របស់លោកដែលបានរើឡើងវិញនៅទឹកដីសហរដ្ឋអាមេរិកអស់រយៈពេលជាច្រើនថ្ងៃមកហើយ ។ ការចេញទៅព្យាបាលនៅក្រៅប្រទេសរបស់លោកអៀង ស៊ីធុល បន្ទាប់ពីជំងឺបេះដួងដ៏រ៉ាំរ៉ៃរបស់លោកបានធ្វើទុក្ខជាថ្មី ជាហេតុធ្វើឲ្យលោកប្រញាប់ស្វែងរកការព្យាបាលជាបន្ទាន់មួយ ។…
រាជធានីភ្នំពេញ៖ ព្រឹទ្ធាចារ្យផ្នែកសិល្បៈបុរាណលោកអៀង ស៊ីធុល កំពុងព្យាបាលជំងឺចាស់របស់លោកដែលបានរើឡើងវិញនៅទឹកដីសហរដ្ឋអាមេរិកអស់រយៈពេលជាច្រើនថ្ងៃមកហើយ ។ ការចេញទៅព្យាបាលនៅក្រៅប្រទេសរបស់លោកអៀង ស៊ីធុល បន្ទាប់ពីជំងឺបេះដួងដ៏រ៉ាំរ៉ៃរបស់លោកបានធ្វើទុក្ខជាថ្មី ជាហេតុធ្វើឲ្យលោកប្រញាប់ស្វែងរកការព្យាបាលជាបន្ទាន់មួយ ។
មិនដឹងលោកអៀង ស៊ីធុល ចេញទៅព្យាបាលជំងឺនៅអាមេរិកនាពេលណានោះឡើយ ប៉ុន្តែរូបភាពដេកនៅលើគ្រែទទួលការព្យាបាលនោះ ត្រូវលោកបង្ហោះតាមហ្វេសប៊ុកកាលពីថ្ងៃទី១៦ ខែមិថុនា ២០១៩ ។ ជាមួយរូបភាពទាំងនោះលោកអៀង ស៊ីធុល បានភ្ជាប់សារបញ្ជាក់ពីអាការជំងឺរបស់លោកថា «មួយរយៈនេះជម្ងឺចាស់មានបញ្ហាបន្តិចឡើវិញ បេះដូងដើលឿន ជាតិទឹកឡើងខ្ពស់ ទន់ជើងដើមិនបាន ហត់ដេកមិនលក់។ មួយយប់ទល់ភ្លឺពេទ្យគេល្អណាស់ចេញចូល តាមដានរហូត ។ អគុណពេទ្យសង្ឃឹមថាបានចេញទៅជួបជុំគ្រួសារឆាប់ៗ»។
តារាចម្រៀងលោកសុះ ម៉ាច ដែលបានតាមដាន និងសួរនាំពីអាការជំងឺរបស់លោក អៀង ស៊ីធុល បានបញ្ជាក់ថា ក្រោយពីទទួលបានការព្យាបាលពីក្រុមគ្រួពេទ្យនៅអាមេរិកជំងឺរបស់លោកអៀង ស៊ីធុល បានគ្រាន់បើបន្តិចហើយ ។ បច្ចុប្បន្នលោកអៀង ស៊ីធុល កំពុងមានវត្តមានបន្តការព្យាបាលនៅអាមេរិកនៅឡើយទេ ដោយនៅសប្តាហ៍ក្រោយពិនិត្យឆ្អឹងជើងដែលប្រេះ ខណះពេលដែលខែក្រោយត្រូវឆែកបេះដូងដែលបានដាក់ទុយោបើកឈាម ។
បើតាមលោកសុះ ម៉ាច ជំងឺរបស់លោក អៀង ស៊ីធុល អាចនឹងត្រូវពេលវេលាច្រើនទៀត ដើម្បីពិនិត្យ និងព្យាបាល ហើយលោកសង្ឃឹមថា ជំងឺរបស់លោកអៀង ស៊ីធុល នឹងឆាប់បានជាស្រះស្បើយឡើងវិញ ដើម្បីបង្ហាត់បង្រៀន ក៏ដូចជាការសម្តែងលើទម្រង់សិល្បៈបុរាណ ផ្សេងៗ ដល់យុវវ័យជំនាន់ក្រោយ ។
លោកអៀង ស៊ីធុល គឺជាប្រធានសមាគម«មរតកកុមារបាសាក់» ដែលបានបង្កើតឡើងតាំងពីឆ្នាំ២០០១ ដោយបានបណ្ដុះបណ្ដាលជំនាញសិល្បៈបុរាណដូចជាតន្ត្រីបុរាណ ចម្រៀងប្រពៃណី របាំប្រជាប្រិយ និងរបាំប្រពៃណីជាដើម ។ បច្ចុប្បន្នសមាគមកំពុងបណ្ដុះបណ្ដាល និងទទួលខុសត្រូវលើការរស់នៅ និងរៀនសូត្ររបស់យុវជនភាគច្រើនមានប្រភពចេញពីតំបន់សំណង់អនាធិបតេយ្យ ៕ (កែសម្រួលដោយ ៖ បុប្ផា)
ចែករំលែកព័តមាននេះ