ខេត្តព្រៃវែង ៖ កម្លាំងនគរបាលខេត្ត បានឃាត់ខ្លួនជនសង្ស័យ២នាក់ប្តីប្រពន្ធ ពាក់ព័ន្ធនឹងករណីកេងបន្លំលុយនៅគ្រឹះស្ថានមីក្រូហិរញ្ញវត្ថុ AMK សាខាព្រៃវែង កាលពីថ្ងៃទី២៧ ខែមិថុនា នៅភូមិលេខ៤…
ខេត្តព្រៃវែង ៖ កម្លាំងនគរបាលខេត្ត បានឃាត់ខ្លួនជនសង្ស័យ២នាក់ប្តីប្រពន្ធ ពាក់ព័ន្ធនឹងករណីកេងបន្លំលុយនៅគ្រឹះស្ថានមីក្រូហិរញ្ញវត្ថុ AMK សាខាព្រៃវែង កាលពីថ្ងៃទី២៧ ខែមិថុនា នៅភូមិលេខ៤ សង្កាត់កំពង់លាវ ក្រុងព្រៃវែង ។ សមត្ថកិច្ចបានឱ្យដឹងថា ការឃាត់ខ្លួនជនសង្ស័យទាំង២នាក់ខាងលើ គឺយោងតាមពាក្យបណ្តឹងរបស់ដើមចោទឈ្មោះ ប៉ុក គង្គារិទ្ធ ភេទ ប្រុស អាយុ៣៤ឆ្នាំ ជាប្រធានសាខាAMK ព្រៃវែង ។ ជនសង្ស័យជាប្រពន្ធឈ្មោះ សោម អង្គា អាយុ២៨ឆ្នាំ ជាប្រធានហិរញ្ញិកAMK ចំណែកបុរសជាប្ដីឈ្មោះ សុខ សុភារ៉ា អាយុ៣០ឆ្នាំ មុខរបរលក់គ្រឿងម៉ាស៊ីននៅភ្នំពេញ និងជាអ្នករៀបចំគម្រោងឲ្យប្រពន្ធបន្លំលួចយកលុយពីកន្លែងធ្វើការ។
សមត្ថកិច្ចបានឲ្យដឹងទៀតថា ជនសង្ស័យទាំង២នាក់ប្តីប្រពន្ធ បានបន្លំលួចយកលុយជាច្រើនដង តែប្រធាន AMK សាខាក្រុងព្រៃវែងចាប់មិនបាន រហូតដល់លើកចុងក្រោយពេលដែលត្រូវចាប់បានគឺជនសង្ស័យលួចយកអស់ចំនួន១១៥.៤០០ដុល្លារ ។
តាមចម្លើយសារភាពរបស់ជនសង្ស័យជាប្រពន្ធ បានឲ្យដឹងថា មូលហេតុដែលរូបនាងលួចលុយពីកន្លែង
ធ្វើ ការ គឺដោយសារតែប្ដីលេងល្បែងនៅភ្នំពេញ ហើយចាញ់អស់លុយ អត់មានលុយស្រង់ដើម ទើបរៀបគម្រោងឲ្យនាងជាប្រពន្ធលួចលុយពីកន្លែងធ្វើការ យកទៅលេងបន្តហើយដោយសារពេលលួចបាន២ទៅ៣ដងគេចាប់មិនបាន ទើបចេះតែលួចបន្តរហូតត្រូវចាប់បានតែម្ដង។ជនសង្ស័យទាំង២នាក់ប្តីប្រពន្ធ ត្រូវបានសមត្ថកិច្ចឃាត់ខ្លួនបណ្តោះអាសន្ននៅអធិការដ្ឋាននគរបាលក្រុងព្រៃវែង ដើម្បីកសាងសំណុំរឿងបញ្ជូនទៅសាលាដំបូង ។ ល្បែងស៊ីសងបានបំផ្លាញអនាគតប្តីប្រពន្ធវ័យក្មេងនេះគ្មានថ្ងៃងើបមុខរួចនោះទេ។
គេបានគិតថា បើប្តីមិនវង្វេងនឹងល្បែងហើយប្រកបរបររបស់ខ្លួនក៏គ្មានហានិភ័យដែរ ចំណែកប្រពន្ធបានធ្វើការងារនៅគ្រឹះស្ថានហិរញ្ញវត្ថុមួយក៏ប្រហែលមិនបាត់បង់ការងារដែរ ។ ទោះបីជាបែបណា ការស្តាយ ក្រោយ មិនអាចវិលត្រឡប់ថយក្រោយបានទេ ៕ (សម្រួលដោយ៖ ស្រីណា)
ចែករំលែកព័តមាននេះ