មេរៀនមួយដែលមនុស្សចូលចិត្តរិះលុយគួរតែដឹង និងទទួលស្គាល់ គឺការរិះលុយមិនប្រាកដថា អាចជួយឲ្យអ្នកសន្សំលុយបានច្រើនទេ ។ ទំនិញដែលត្រូវបានដាក់បញ្ចុះតម្លៃ គឺជាជម្រើសល្អ ប្រសិនបើទំនិញនេះជាទំនិញដែលមានគុណភាពខ្ពស់ប៉ុណ្ណោះ ប៉ុន្តែមនុស្សជាច្រើនបែរជាធ្លាក់ចូលក្នុងអន្ទាក់របស់អ្នកលក់ និងទិញ…
មេរៀនមួយដែលមនុស្សចូលចិត្តរិះលុយគួរតែដឹង និងទទួលស្គាល់ គឺការរិះលុយមិនប្រាកដថា អាចជួយឲ្យអ្នកសន្សំលុយបានច្រើនទេ ។ ទំនិញដែលត្រូវបានដាក់បញ្ចុះតម្លៃ គឺជាជម្រើសល្អ ប្រសិនបើទំនិញនេះជាទំនិញដែលមានគុណភាពខ្ពស់ប៉ុណ្ណោះ ប៉ុន្តែមនុស្សជាច្រើនបែរជាធ្លាក់ចូលក្នុងអន្ទាក់របស់អ្នកលក់ និងទិញ លើសពីអ្វីដែលពួកគេត្រូវការ ឬទិញផលិតផលដែលមិនមានគុណភាពល្អ ព្រោះតែមានការលក់បញ្ចុះតម្លៃ ។ ក្រៅពីឧទាហរណ៍ខាងលើហើយ នៅមានទន្លាប់អ្នករិះលុយមួយចំនួនទៀត បែរជាបង្កឲ្យពួកគេចាយវាយខ្ជះខ្ជាយទៅវិញ ។
ទី១- ការមិនទិញធានារ៉ាប់រង ធានារ៉ាប់រងមានជាច្រើនប្រភេទ ហើយវាពិតជាងាយស្រួលណាស់ ក្នុងការជ្រើសយកកញ្ចប់ដែលមិនផ្តល់អត្ថប្រយោជន៍មកវិញច្រើន ព្រោះអ្នកត្រូវបង់វាទាបជាងកញ្ចប់ដទៃ ។ ប៉ុន្តែប្រសិនបើអ្នក ឬមនុស្សដែលអ្នកស្រលាញ់ជួបនឹងបញ្ហាអ្វីមួយពិតមែននោះ គឺខ្លួនអ្នកទេដែលខាតបង់ ។ អ្នកត្រូវចងចាំថា ជំងឺនិងឧបទ្ទវហេតុអាចកើតមានឡើងជារៀងរាល់ថ្ងៃ ដូច្នេះប្រសិនបើអ្នកមិនរៀបចំទុកដាក់អនាគតឲ្យបានច្បាស់លាស់ទេនោះ អ្នកអាចបង្កបញ្ហាដល់មនុស្សជុំវិញខ្លួន ។
ទី២- ការត្រួតពិនិត្យសុខភាពជាប្រចាំ មនុស្សជាច្រើនក្នុងប្រទេសកម្ពុជាមិនមានទម្លាប់ត្រួតពិនិត្យសុខភាពជាប្រចាំឡើយ ដើម្បីសន្សំថវិកាសម្រាប់គោលដៅផ្សេងៗ ។ វេជ្ជបណ្ឌិតតែងតែផ្តល់យោបល់ឲ្យមនុស្សគ្រប់រូបធ្វើការត្រួតពិនិត្យសុខភាពជាប្រចាំ ព្រោះវាជួយឲ្យអ្នកដឹងពីជំងឺដែលអ្នកមាន មុនពេលវាធ្ងន់ធ្ងរឡើង ។ ការដែលមិនចំណាយពេលវេលានិងថវិកា ដើម្បីពិនិត្យសុខភាពជាប្រចាំនេះអាចបង្កហានិភ័យដល់សុខភាពអ្នក និងពេលខ្លះបង្កឲ្យអ្នកចំណាយថវិកាកាន់តែច្រើនទៀត ក្នុងការព្យាបាលជម្ងឺដែលធ្ងន់ធ្ងរ ។
ទី៣-ការទិញឧបករណ៍ប្រើប្រាស់ក្នុងផ្ទះ ឧបករណ៍ប្រើប្រាស់ក្នុងផ្ទះដូចជា ទូរទឹកកក ចង្ក្រានបាយ ម៉ាស៊ីនបូមធូលី ឬម៉ាស៊ីនឆុងកាហ្វេផ្សេងៗជាទំនិញដែលត្រូវបានកំណត់តម្លៃយោងតាមគុណភាពនិងភាពធន់មាំរបស់វា ។ ឧបករណ៍ដែលមានតម្លៃថ្លៃខ្លះថែមទាំងអាចជួយឲ្យអ្នកកាត់បន្ថយការចំណាយលើអគ្គិសនីផងដែរ ព្រោះពួកវាប្រើប្រាស់ចរន្តអគ្គិសនីតិច ។
អ្នកគួរតែចំណាយពេលច្រើនក្នុងការស្វែងរកឧបករណ៍ប្រើប្រាស់ដែលមានគុណភាពខ្ពស់ និងចំណាយថវិកាខ្ពស់បន្តិច ដើម្បីទិញវា ព្រោះពួកវាប្រៀបដូចជា ការវិនិយោគដែរ ។ ជៀសវាងការទិញផលិតផលដែលមានគុណភាពមិនល្អ (ដូចជា ផលិតផលចិនមួយចំនួន) ឬផលិតផលដែលគេប្រើរួច ព្រោះពួកវាភាគច្រើនឆាប់ខូច ។
ទី៤-ការទិញទំនិញលក់បញ្ចុះតម្លៃព្រោះតែមានការលក់បញ្ចុះតម្លៃមិនប្រាកដថា អ្នកត្រូវតែទិញវាទេ ។ អ្នកមិនគួរទិញអ្វីដែលអ្នកមិនត្រូវការឡើយ បើទោះជាវាកំពុងមានការបញ្ចុះតម្លៃពិតមែនក្តី ។ មនុស្សជាច្រើនធ្លាក់ក្នុងអន្ទាក់របស់អ្នកលក់ និងទិញផលិតផលដែលពួកគេមិនប្រើ ឬត្រូវការ ៕
កែសម្រួលដោយ ៖ សំណាង
ចែករំលែកព័តមាននេះ