បាត់មុខមួយរយៈជើងខ្លាំងកម្ពុជា ត្រឡប់វិញប៉ះជើងខ្លាំងថៃថ្ងៃនេះហើយ
- ភ្នំពេញ
រាជធានីភ្នំពេញ ៖ បាត់មុខពីសង្វៀនតែមួយរយៈ ពេលនេះ កីឡាករជើងខ្លាំងវ័យក្មេង បាង កាយ៉ាក របស់កម្ពុជា ត្រូវគេឃើញមាន មុខឡើងប្រកួតជាមួយកីឡាករថៃ…
រាជធានីភ្នំពេញ ៖ បាត់មុខពីសង្វៀនតែមួយរយៈ ពេលនេះ កីឡាករជើងខ្លាំងវ័យក្មេង បាង កាយ៉ាក របស់កម្ពុជា ត្រូវគេឃើញមាន មុខឡើងប្រកួតជាមួយកីឡាករថៃ កោថាប់ វ.ស៊ូងនិន ដែលជាជើងខ្លាំងមិនធម្មតានៅក្នុងប្រទេសថៃ ដែរនោះ ។
មួយគូនេះ ត្រូវគេរំពឹងថា ពិតជាធ្វើឱ្យរញ្ជួយសង្វៀននាថ្ងៃសៅរ៍ទី២៩ មិថុនា ក្នុងព្រឹត្តិការណ៍ TV5 Knock out Serie by K-Cement ដែលជាព្រឹត្តិការណ៍សំខាន់ ស្ថិតក្នុងដំណាក់កាលកាន់តែកៀកនឹងឈានទៅជ្រើសរើសជើងឯកនៅប៉ុស្តិ៍លេខ៥ ព្រែកកំពិសផង។
ការប្រកួតដែលនឹងចាប់ផ្ដើមពីម៉ោង៦ល្ងាចស្អែកនេះ ត្រូវគេឃើញមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែងគឺព្រឹត្តិការណ៍ដំណើរការចំពេលល្ងាចថ្ងៃសម្រាក ដែលជាថ្ងៃមនុស្សម្នានៅតំបន់ព្រែកកំពិសនិយមមកទស្សនាកកកុញ ស្របគ្នាដែលនៅតំបន់ប៉ុស្ដិ៍លេខ៥ក៏មានកំណើនអ្នករស់នៅច្រើនឡើង ក្រោយមានវត្តមានសំណង់បុរីព្រោងព្រាតប្រដេញគ្នា ។
កីឡាករកម្ពុជា ត្រូវបានគេចាប់អារម្មណ៍ហួសប្រមាណក្រោយពីមានការប្រកាសថា តម្រូវឱ្យស្វាគមន៍ជើងខ្លាំងមកពីប្រទេសថៃ កោថាប់ វ.ស៊ូងនិន ដែលអ្នកណាៗក៏ស្គាល់ថាជាជើងខ្លាំង ធ្លាប់ប្រកួតឈ្នះកីឡាករកម្ពុជាកន្លងមក ។
លោក សេង កដិកា អ្នករៀបចំការប្រកួត បញ្ជាក់ថា សមាសភាពខាងកម្ពុជា សម្រាប់ការប្រកួតជាមួយថៃ លោកជឿជាក់ខ្លាំងលើកីឡាករ បាង កាយ៉ាក ដ្បិតថាគេមិនសូវមានឱកាសឡើងប្រកួតអន្តរជាតិ ។ លោកសម្រេចដាក់ឱ្យប្រកួតជាលក្ខណៈអន្តរជាតិ គឺដោយសារតែកីឡាកររូបនេះគេមានសមត្ថភាពខ្លាំងជាយូរមកហើយ និងទទួលបានការចាប់អារម្មណ៍នៅក្នុងវិស័យប្រដាល់ ។
លោកប្រកាសថា វត្តមានចុះមករបស់កីឡាករ កោថាប់ វ.ស៊ូងនិន លោកចង់ផ្ដល់ឱកាសឱ្យបាង កាយ៉ាក ដោយសារតែអ្នកទាំងពីរសុទ្ធតែជាម្ចាស់ជើងឯកដូចគ្នា ទើបលោកហ៊ានសម្រេចផ្គូផ្គង បើទោះជាមានអ្នកគាំទ្រភាគច្រើនថាកីឡាករកម្ពុជាអាចនឹងពិបាកទប់ជាមួយកីឡាករថៃ ព្រោះគេស្ងាត់ប្រកួតមួយរយៈក្ដី ។ លោកក៏បានកំណត់ឱ្យកីឡាករកម្ពុជា ហ្វឹកហាត់ជាប់លាប់មិនតិច ជាង១សប្ដាហ៍ផងដែរមុនពេលផ្គូផ្គង ទើបលោកយល់ថា សមាសភាពរបស់កីឡាករកម្ពុជារូបនេះ គ្រប់គ្រាន់សម្រាប់ឱ្យប៉ុស្តិ៍លេខ៥ដាក់ប្រកួតជាលក្ខណៈអន្តរជាតិ នៅថ្ងៃសៅរ៍នេះ។
លោកថា កីឡាករកម្ពុជា និងថៃ សុទ្ធតែត្រូវបានអះអាងថាមានការត្រៀមខ្លួនច្បាស់លាស់ ដោយសារតែភាគីម្ខាងៗចង់ឈ្នះការប្រកួតរៀងខ្លួន និងមិនចង់បាត់បង់ក្រេឌីតក្រោយពេលប៉ះគ្នា ។ លោក សេង កដិកា បន្តថា ជំនួបអន្តរជាតិដែលបានធ្វើឡើងនៅប៉ុស្តិ៍លេខ៥ មិនមែនសុទ្ធតែរន្ថើនព្រឹត្តិការណ៍ជើងឯកឱ្យអ្នកទស្សនាកាន់តែមានអារម្មណ៍កញ្ជ្រោលនោះទេ ប៉ុន្តែសម្រាប់ជំនួបរវាងកីឡាករទាំង២ លោកជឿជាក់ថានឹងកក្រើក ដោយសារកីឡាករថៃលោកស្គាល់ថ្វីដៃច្បាស់ហើយថា មិនធម្មតា ហើយសម្រាប់កីឡាករកម្ពុជា វិញ ក៏ល្អស្ថិតក្នុងទំនុកចិត្តលោក តាំងពីមុនផ្គូផ្គង ៕ (កែសម្រួលដោយ ៖ បុប្ផា)
ចែករំលែកព័តមាននេះ