រាជធានីភ្នំពេញ ៖ ព្រឹត្តិការណ៍រត់ម៉ារ៉ាតុងអន្តរជាតិ-ចក្រភពខ្មែរលើកទី៦នៅតំបន់អង្គរខេត្តសៀមរាបដែលគ្រោងធ្វើឡើងនៅថ្ងៃ៤ ខែសីហា ខាងមុខនេះ គណៈកម្មាធិការជាតិអូឡាំពិកកម្ពុជា(NOCC)បានធ្វើការអំពាវនាវដល់ពលរដ្ឋខ្មែរចុះឈ្មោះឱ្យបានរួសរាន់ឡើង ខណៈពេលនេះភ្ញៀវបរទេសមកចុះឈ្មោះរត់កើនឡើងជិត២០០០នាក់ហើយ ។ នេះបើតាមការឱ្យដឹងពីលោក វ៉ាត់…
រាជធានីភ្នំពេញ ៖ ព្រឹត្តិការណ៍រត់ម៉ារ៉ាតុងអន្តរជាតិ-ចក្រភពខ្មែរលើកទី៦នៅតំបន់អង្គរខេត្តសៀមរាបដែលគ្រោងធ្វើឡើងនៅថ្ងៃ៤ ខែសីហា ខាងមុខនេះ គណៈកម្មាធិការជាតិអូឡាំពិកកម្ពុជា(NOCC)បានធ្វើការអំពាវនាវដល់ពលរដ្ឋខ្មែរចុះឈ្មោះឱ្យបានរួសរាន់ឡើង ខណៈពេលនេះភ្ញៀវបរទេសមកចុះឈ្មោះរត់កើនឡើងជិត២០០០នាក់ហើយ ។ នេះបើតាមការឱ្យដឹងពីលោក វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការគណៈកម្មាធិការជាតិអូឡាំពិកកម្ពុជា ក្នុងឱកាសធ្វើសន្និសីទសារព័ត៌មានមួយកាលពីព្រឹកថ្ងៃទី២៦មិថុនា នៅទីស្នាក់ការគណៈកម្មាធិការជាតិអូឡាំពិកកម្ពុជា។
លោក វ៉ាត់ ចំរើន បានមានប្រសាសន៍បន្តថា ទិវារត់ប្រណាំងចម្ងាយ៤២គីឡូម៉ែត្រនេះ ជាគោលដៅរបស់ក្រសួងទេសចរណ៍ ដោយទទួលបានការអនុញ្ញាតពីរាជរដ្ឋាភិបាលកម្ពុជា ដើម្បីធ្វើការទាក់ទាញភ្ញៀវទេសចរក្នុងរដូវកាលធ្លាក់ភ្លៀង ដែលចំនួនភ្ញៀវមានការធ្លាក់ចុះ ។
លោករំពឹងថា ព្រឹត្តិការណ៍កីឡាទេសចរណ៍ ប្រចាំឆ្នាំមួយនេះនឹងរួមចំណែកបានច្រើន ជាមួយវិស័យទេសចរណ៍ ក៏ដូចជារួមចំណែកលើកកម្ពស់ជីវភាពប្រជាពលរដ្ឋ និងអាជីវករនៅខេត្តសៀមរាបផងដែរ ។ លោកបញ្ជាក់ថា រហូតមកទល់ពេលនេះ មានអ្នកមកចុះឈ្មោះសរុបជិត២០០០នាក់ហើយ ភាគច្រើនជាជនបរទេសមកពីប្រមាណ៣៨ប្រទេសនៅជុំវិញពិភពលោក ក្នុងនោះភាគច្រើនជាភ្ញៀវចិន ភ្ញៀវអឺរ៉ុបមិនសូវមាននោះទេ ។ ចំណែកប្រជាពលរដ្ឋខ្មែរមិនសូវមាននោះទេ ព្រោះអីភ្ញៀវខ្មែរច្រើនមានទម្លាប់មួយទាល់តែជិតដល់ថ្ងៃរត់ទើបមកចុះឈ្មោះ ។
ហេតុ ដូច្នេះហើយទើបគណៈកម្មាធិការជាតិអូឡាំពិកកម្ពុជាបានអំពាវនាវទៅដល់ពលរដ្ឋខ្មែរសូម រួសរាន់មកចុះឈ្មោះឱ្យបានលឿនដើម្បីងាយ ស្រួលដល់គណៈកម្មការក្នុងការរៀបចំ ។ ចំពោះតម្លៃនៃការចុះឈ្មោះវិញនោះ រត់ចម្ងាយ៤២គីឡូម៉ែត្រខ្មែរ២០ដុល្លារ ឯភ្ញៀវបរទេស៦៥ដុល្លារ, រត់ចម្ងាយ២១គីឡូម៉ែត្រខ្មែរ១៥ដុល្លារ ភ្ញៀវបរទេស៥៥ដុល្លារ, រត់ចម្ងាយ១០គីឡូម៉ែត្រ ខ្មែរ១២ដុល្លារ ភ្ញៀវបរទេស៥០ដុល្លារ និងរត់កំសាន្តសប្បាយចម្ងាយ៣គីឡូម៉ែត្រ ខ្មែរ៥ដុល្លារ ភ្ញៀវបរទេស២០ដុល្លារ។ ចំណែកពេលវេលាឈប់ទទួលការចុះឈ្មោះនៅថ្ងៃទី១ សីហា មុនថ្ងៃរត់រយៈពេល៣ថ្ងៃ ៕ (កែសម្រួលដោយ ៖ បុប្ផា)
ចែករំលែកព័តមាននេះ