រាជធានីភ្នំពេញ ៖ នៅថ្ងៃសៅរ៍ទី២៩មិថុនា ស្អែកនេះ សង្វៀនអន្តរជាតិរបស់ទូរទស្សន៍ស៊ីអិនស៊ី នឹងបន្តបើកឱ្យកីឡាករកម្ពុជា២រូបគឺ ឡុង ជិន មកពីក្លិបខ្លារខិនមានរិទ្ធ និងរឿង សោភ័ណ្ឌ មកពីក្លិបពុទ្ធសេរីវង្សពោធិសែនជ័យ ឡើងប្រកួតដណ្ដើមប្រាក់លានជាមួយកីឡាករបរទេស ។ អ្នកនិយមទស្សនាកីឡាប្រដាល់កំពុងតែទន្ទឹងរង់ចាំមើលថាតើកីឡាករកម្ពុជាទាំង២រូបនេះអាចសម្រេចគោលដៅដណ្ដើមប្រាក់លានបានដែរឬយ៉ាងណា ខណៈកីឡាករបរទេសដែលពួកគេត្រូវជួបនាពេលនេះហាក់មានសមត្ថភាពខ្លាំងពិបាកផ្ដួលអ៊ីចឹងនោះ។
កីឡាករឡុង ជិន ត្រូវបានគេផ្គូផ្គងឱ្យជួបប្រកួតជាមួយកិឡាករថៃ ភិតងិនថង ប្រាណសង ហុក ក្នុងប្រភេទទម្ងន់៦០គីឡូក្រាម ចំណែក រឿង សោភ័ណ្ឌ ប្រកួតជាមួយកីឡាករប្រេស៊ីល ឈ្មោះPaulo Sergioក្នុងប្រភេទទម្ងន់៧០គីឡូក្រាម។
ឡុង ជិន ជាអ្នកប្រដាល់ជើងខ្លាំងម្នាក់ដែលមានបទពិសោធន៍ប្រកួតនៅលើសង្វៀនយូរគ្រាន់បើ ប៉ុន្តែមួយរយៈចុងក្រោយនេះមិនសូវឃើញលេចមុខនៅលើសង្វៀនញឹកញាប់ដូចមុនទេ ។ អ្នកប្រដាល់ជើងចាស់ម្នាក់នេះ មានស្នៀតកែងនិងជង្គង់ល្អគួរសមគ្រាន់តែចិត្តរាងតូចបន្តិច ។ លើកនេះត្រូវមកប៉ះអ្នកប្រដាល់ជើងខ្លាំងថៃដែលធ្លាប់មកប្រកួតនៅស្រុកខ្មែររាប់ភ្លេច ថែមទាំងធ្លាប់យកឈ្នះអ្នកប្រដាល់ជើងខ្លាំងកម្ពុជាមិនតិចនាក់ទេ ។ ចាំមើល ឡុង ជិនមានសំណាងដណ្ដើមប្រាក់លានលើកនេះបានឬអត់។
រឿង សោភ័ណ្ឌ សង្ឃឹមច្រើនក្នុងការដណ្ដើមប្រាក់លានលើកនេះ ព្រោះអីគេប៉ះជាមួយកីឡាករប្រេស៊ីលដែលពុំធ្លាប់មកប្រកួតនៅលើសង្វៀនស្រុកខ្មែរពីមុនមកទេ ។ បើទោះជាគេមិនធ្លាប់ស្គាល់ពីប្រវត្តិប្រកួតច្បាស់លាស់ក៏ដោយ ក៏គេមិនសូវជាបារម្ភនោះដែរ ដោយសារ តែគេដឹងច្បាស់ថា រាល់លើកដែលមានវត្តមានកីឡាករប្រេស៊ីលមកប្រកួត មិនដែលឆ្លងផុតពីទឹកទី៣ឡើយ គឺតែងសន្លប់ក្រោមកណ្ដាប់ដៃរឿង សោភ័ណ្ឌ រហូត ។
ក្រៅពីគូដណ្ដើមប្រាក់លានក៏មានគូប្រកួតមិត្តភាពអមផងដែរដូចជាកីឡាករ ធី ម៉ានិត មកពីក្លិបអេភូថងកីឡា ប្រកួតជាមួយកីឡាករ ផាន់ សុផាត មកពីក្លិបពុទ្ធសេរីវង្សពោធិសែន ជ័យ និងកីឡាករ សែត ពិសិដ្ឋ មកពីក្លិបរស្មីភូមិគាបខេត្តបន្ទាយមានជ័យ ប្រកួតជាមួយកីឡាករ លីន សេងហុង មកពីក្លិបបុរីរាជសីហ៍មានរិទ្ធ។
រីឯសមាសភាពគូប្រកួតអ្នកតស៊ូគុនខ្មែរគោជល់វិញប្រមូលផ្ដុំទៅដោយអ្នកប្រដាល់ជើងខ្លាំងខ្មែរនិងបរទេសចំនួន៣គូ ។ កីឡាករ មុត ខ្លឹមខ្មៅ មកពីក្លិបមកុដរាជសីហ៍ ប្រកួតជាមួយកីឡាករប្រស៊ីល Adayiton ក្នុងប្រភេទទម្ងន់៦០គីឡូក្រាម ។ កីឡាករ អេលីត សាន់ មកពីក្លិបឆ្មាសសែនសុខគុនខ្មែរ ប្រកួតជាមួយអ្នកប្រដាល់ជើងខ្លាំងមកពីថៃ ឃុំភិឈិត គាតបានឌីត យីម ក្នុងប្រភេទទម្ងន់៥៧គីឡូក្រាម ។ កីឡាករ ឡៅ ចិត្រា មកពីក្លិបកងទ័ពពិសេសឆត្រយោង៩១១ ប្រកួតជាមួយកីឡាករថៃ យ៉តកុងស៊ុន ច.ថាក់វិឆ័យ ក្នុងប្រភេទទម្ងន់៦០គីឡូក្រាម ។
ចំណែកគូចុងក្រោយកីឡាករ ហេង ពៅ មកពីក្លិបកងពលតូចលេខ៧០ ប្រកួតជាមួយកីឡាករ ខាំ សាបាន មកពីក្លិបរ៉ាហាប់ស្វាយប៉ាក ៕ (កែសម្រួលដោយ ៖ បុប្ផា)
ចែករំលែកព័តមាននេះ