រាជធានីភ្នំពេញ ៖ អតីតប្រធានគណបក្សសង្គ្រោះជាតិ លោក កឹម សុខា ដែលកំពុងស្ថិតនៅក្នុងផ្ទះមិនអាចចេញទៅណាបាននោះ បានអះអាងថា លោកមិនស្តាយក្រោយឡើយក្នុងការធ្វើនយោបាយ ហើយនៅតែរក្សាជំហរក្នុងការផ្សះផ្សាជាតិ ។ ការលើកឡើងរបស់អតីតមេបក្សប្រឆាំងរូបនេះ ស្របពេលដែលខួប កំណើតរបស់គម្រប់៦៦ឆ្នាំឈានចូល៦៧ឆ្នាំ ។
លោក កឹម សុខា បានសរសេរលើបណ្តាញសង្គម នៅថ្ងៃទី២៧ ខែមិថុនាថា «ទឹកចិត្ត និងសេចក្តីនឹករឭករបស់ជនរួមជាតិ បានផ្តល់ដល់រូបខ្ញុំនូវកម្លាំងចិត្តដែលជាថាមពលជំរុញឲ្យរូបខ្ញុំបន្តនូវស្មារតីសេ្នហាជាតិ បើទោះជារូបកាយខ្ញុំត្រូវបានបាត់បង់សេរីភាពអស់ជិត២ឆ្នាំមកហើយ»។ លោក កឹម សុខា គូសបញ្ជាក់ថា «មិនមានអ្វីឡើយដែលអាចរារាំងមនោសញ្ចេតនារបស់ខ្ញុំដែលមានចំពោះប្រជាជាតិមួួយនេះ ។
ទោះបីខ្ញុំមិនអាចជួបជុំប្រជាពលរដ្ឋដូចកាលពីមុន ទោះបីខ្ញុំមិនអាចស្តាប់ឮដោយផ្ទាល់នូវទុក្ខកង្វល់របស់បងប្អូន ទោះបីមានឧបសគ្គយ៉ាងណា បើដរាបណាព្រះអាទិត្យនៅតែរះ សូមប្រជាជាតិខ្មែរជឿចុះថា ខ្ញុំ
កឹម សុខា នៅតែភ្ញាក់ឡើងទន្ទឹងរង់ ចាំថ្ងៃដែលបានជួបជុំនិងបម្រើជាតិខ្មែរតទៅទៀត»។
ជាមួយគ្នានេះ លោក កឹម សុខា ក៏បានលើកឡើងថា មិនថារងទុក្ខឬការធ្វើបាបតាមរូបភាពណា វាគ្មានទេពាក្យថាស្តាយក្រោយសម្រាប់ កឹម សុខា ដែលបានបូជាជូនជាតិ ប្រជាពលរដ្ឋដើម្បីលទ្ធិប្រជាធិបតេយ្យ សិទ្ធិសេរីភាព អធិបតេយ្យភាព និងការផ្សះផ្សាជាតិ»។លោកបានបង្ហាញអារម្មណ៍យ៉ាងដូច្នេះថា «សេចក្តីប្រាថ្នាសម្រាប់ខ្ញុំព្រះករុណា ខ្ញុំក្នុងឱកាសថ្ងៃខួបកំណើតនេះ គឺសេចក្តីសុខ សន្តិភាព សិទ្ធិសេរីភាពវឌ្ឍនភាព និងយុត្តិធម៌ សម្រាប់ប្រជាពលរដ្ឋខ្មែរគ្រប់ស្រទាប់» ។
សូមរំឭកថា លោក កឹម សុខា បានត្រូវសមត្ថកិច្ចឃាត់ខ្លួនកាលពីវេលាម៉ោងជាង១២រំលងអធ្រាត្រឈានចូលថ្ងៃទី៣ ខែកញ្ញា ឆ្នាំ២០១៧ និងបាននាំទៅឃុំខ្លួននៅពន្ធនាគារត្រពាំងផ្លុង ក្នុងខេត្តត្បូងឃ្មុំអស់រយៈពេល១ឆ្នាំ មុននឹងអនុញ្ញាតឱ្យមកស្នាក់នៅក្នុងគេហដ្ឋានរបស់លោក កាលពីថ្ងៃ១០ ខែកញ្ញា ២០១៨។
បើគិតមកដល់ពេលនេះជាង២ឆ្នាំហើយ លោកមិនមានសេរីភាពក្នុងការជួបជុំសកម្មជននោះទេ ។ លោក
កឹម សុខា ត្រូវបានចោទពីបទសន្ទិដ្ឋិភាពជាមួយបរទេស តាមបញ្ញាត្តិមាត្រា៤៤៣នៃក្រមព្រហ្មទណ្ឌ ៕
ចែករំលែកព័តមាននេះ