ខេត្តបាត់ដំបង ៖ «ប្រាសាទឯកភ្នំ»ជាប្រាសាទដែលមានវ័យចំណាស់មួយ ក្នុងចំណោមប្រាសាទជាច្រើន ដែលត្រូវបានកសាងឡើងក្នុងរជ្ជកាលព្រះបាទសូរ្យវរ្ម័នទី១ នាសត្សវត្តទី១១ អំឡុងឆ្នាំ(១០០២_១០៥០)ក្នុងសម័យមហានគរនៅតាមតំបន់វាលទំនាបស្រែមាត់បឹងនៃទឹកទន្លេសាបក្នុងភូមិចាស់ធម្មជាតិ ដែលមានប្រជាជនរស់នៅពីយូរលង់ណាស់មកហើយ ។
ប្រាសាទឯកភ្នំ ធ្វើឡើងដើម្បីឧទិ្ទសថ្វាយដល់អាទិទេពនៃសាសនាព្រាហ្ម ឬព្រហ្មញសាសនា (លទ្ធិទេវរាជ) ហើយប្រាសាទនេះដែរ ត្រូវបានបាក់បែក និងស្រុតចុះខ្លះដោយសារបាតុភូតិធម្មជាតិរួមនិងអាយុៈកាលដល់ចំណាស់ផង រួមទាំងកត្តាសង្គ្រាម ជនទុច្ចរិតផង ប្រាសាទឯកភ្នំសាងសង់អំពីថ្មភក់ និងថ្មបាយក្រៀម អមដោយរចនាបថចម្លាក់ផ្សេង បែរមុខទៅទិសខាងកើតនិងទទឹងទៅទិសខាងលិចប្រវែង២៥ម៉ែត្រ មានបណ្តោយពីខាងជើងទៅទិសខាងត្រូងប្រវែង៤៩ម៉ែត្រ ក្នុងបរិវេណវត្តឯកភ្នំ មានចម្ងាយពីទីរួមខេត្តបាត់ដំបង១១គីឡូមែត្រ ស្ថិតនៅក្នុងភូមិតាគម ឃុំពាមឯក ស្រុកឯកភ្នំ ខេត្តបាត់ដំបង។
សព្វថ្ងៃនេះ ភ្ញៀវជាតិ និងអន្តរជាតិ បានចាប់អារម្មណ៍យល់ដឹងតាមឯកសារថា ជាតំបន់ទេសចរណ៍ប្រវត្តិសាស្ត្រមួយផងដែរ ដែលមានភ្ញៀវទេសចរទៅលេងកំសាន្តនៅទីនោះ មិនចេះដាច់ឡើយ ។ នៅជិតប្រាសាទឯកភ្នំ មានវត្តអារាមវ័យចំណាស់មួយ ដែលកើតឡើងនៅគ,ស ១៧៥៧ មានអាយុកាល២៤៤ឆ្នាំ ដោយមានភាពចាស់ទ្រុឌទ្រោមផង និងទទួលភាពខ្ទេចខ្ទាំខ្លាំងពីសម័យបនប្រល័យពូជសាសន៍ជាតិឯង ៣ឆ្នាំ ៨ខែ និង២០ថ្ងៃរបស់បន ប៉ុល ពត បានយកកន្លែងក្នុងវត្តនេះ ជាទីលានសម្លាប់មនុស្សទាំងថ្ងៃទាំងយប់ ហើយបន្តមកសង្គ្រាមរ៉ាំរ៉ៃ ក្នុងស្រុកបន្តបញ្ចប់សង្គ្រាមរួចមក ទើបបានកសាងថ្មីឆ្នាំ១៩៩១មកដល់ឆ្នាំ២០០១ ជំនាន់ព្រះចៅអធិការអៀម ឡុង , ព្រះតេជគុណ ប៉ុច ឈន និងព្រះតេជគុណឈួម បូ, ឧបាសិកាគង់ ជី (នៅអាមេរិក) និងពុទ្ធបរិស័ទក្នុង-ក្រៅប្រទេស ដែលធ្លាប់មានប្រវត្តិឆ្លងកាត់សម័យកាប់សម្លាប់នៅតំបន់នេះ រួបរួមគ្នាប្រមូលជាបច្ច័យកសាងព្រះវិហារថ្មីដើម្បីលុបលាងបាបកម្ម និងការបែបន់សម័យមានអាសន្ន បានថវិកាប្រមាណ១៦៥ ២៩៩ដុល្លា ជួយកសាងវិហារបានដល់បច្ចុប្បន្ន ។
នៅថ្ងៃទី១១ ខែកញ្ញា ឆ្នាំ២០០៥ សម្តេចបុត្រីមហាចក្រី សុរិនថន (បុត្រីស្តេចថៃ) បានយាងមកទតសិក្សាបន្ថែមអំពីប្រវត្តិសាស្ត្រ និងប្រភេទថ្មប្រាសាទឯកភ្នំនេះ ដែលមាន ១-ព្រះវិស្ណុផ្ទុំលើនាគអនន្តរ លក្ម្សីជាសក្កិគង់នៅចុងជើង ព្រះព្រហ្មគង់នៅលើផ្កាឈូក ដែលផុសចេញពីផ្ចិតព្រះវិស្ណុ, ២-ហនុមានទៅសួរសុខទុក្ខនាងសិតា នៅពេលនាងសិតាជាប់ឃុំនៅនគរលង្ការ , និង៣- រឿងកូរសមុទ្រទឹកដោះ ។
ពេលនោះ អ្នកសារព័ត៌មានក៏បានសម្ភាសន៍លោក ជុច ភឿន រដ្ឋលេខាធិការក្រសួងវប្បធម៌ ក្នុងការរកថវិកាមកជួយរៀបចំ លើកដាក់ជួសជុលបន្ថែមតួប្រាសាទ តែមិនបានទទួលលទ្ធផលអ្វីឡើយក្នុងរយៈពេលជាង១៤ឆ្នាំកន្លងមកនេះ ។
ក្នុងពេលមានបុណ្យទានតាមប្រពៃណីជាតិម្តងៗ មានមនុស្សមកពីគ្រប់ទិសទីតែងតែមកកំសាន្តលេងនៅប្រាសាទឯកភ្នំនេះ មិនដែលខានឡើយ ព្រោះគ្រប់ប្រជាជនទាំងអស់ តែងតែបានយល់ដឹងតៗគ្នាហើយមកកំសាន្តដោយផ្ទាល់ពិតជាមានការសប្បាយរីករាយជាក់ជាមិនខានឡើយ ។ (សម្រួលដោយយ៖ ស្រីណា)
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ