រាជធានីភ្នំពេញ៖ អ្នកនាងទូច ស្រីល័ក្ខ បានបង្ហាញផលមិនល្អមួយចំនួនពីការបើកកកាយរឿងរ៉ាវគ្រួសារជាសាធារណៈតាមហ្វេសប៊ុក ពិសេសនាងនាងចាត់ទុកថា «មិនមានចំណេញ និងមិនបានអ្វីមកវិញឡើយ»។ ការបង្ហាញជាទស្សនៈរបស់អ្នកនាងទូច ស្រីល័ក្ខ នាពេល ថ្មីៗកន្លងមកនេះបន្ទាប់ពីនាងមើលឃើញវាបានកើតឡើងជាបន្តបន្ទាប់ ។
ការធ្វើអធិប្បាយរបស់ទូច ស្រីលក្ខ បានកើតឡើងក្រោយពេលមានការហែកហួរគ្នាផ្អើលមហាជនរវាងលោកថៃ នរៈសត្យា និងអតីតភរិយាអ្នកស្រីងិន ម៉ានីយ៉ា ដោយជម្លោះបានផ្ទុះឡើងតាមហ្វេសប៊ុក។ ដោយមិនសម្តៅទៅលើករណីអ្នកណាម្នាក់ ប៉ុន្តែទូច ស្រីល័ក្ខ គ្រាន់តែបង្ហាញហានិភ័យមួយចំនួន
ចំពោះអ្នកមានវិបត្តិស្នេហា មិនគួរបើកបង្ហាញនៅលើហ្វេសប៊ុកនោះឡើយ ។
ទូច ស្រីលក្ខ បានសរសេរបង្ហោះនៅលើហ្វេសប៊ុកថា «មនុស្ស ម្នាក់ៗកើតមកមិនដូចគ្នាទេ ខ្លះស្រលាញ់គ្នាជាប្តីប្រពន្ធជិត២០ឆ្នាំ រៀបការមានកូនមានចៅ បានលាក់ទុក្ខជាច្រើនរឿងក្នុងចិត្ត ដោយមិនចង់ទម្លុះចេញមកក្រៅឲ្យបុគ្គលណាដឹង ព្រោះសម្លឹងគិតពីអនាគតកូននៅថ្ងៃខាងមុខ និងមុខមាត់កិត្តិយសក្រុមគ្រួសារ ។
ចុះបើយើងរក្សាបញ្ហារបស់ខ្លួនយើងបាន១០ឆ្នាំជាង ចុះយើងមិនរក្សាបញ្ហា និងទុកបន្តទៀតទៅចុះ ចាំបាច់អីមកហែកហួរគ្នាតាម Facebook គ្រាន់តែដើម្បីឲ្យគេដឹង សួរថាមុខមាត់កូនចៅ និងកិតិ្តយសដែលប្រឹងសាងជាង២០ឆ្នាំវារលាយដោយសារការចង់បង្ហាញឲ្យគេដឹងតាមរយៈបណ្តាញសង្គមហ្នឹង តើមែនទេ ? សួរថាចុងបញ្ចប់បានអីមកវិញ ? មានតែភាពអាម៉ាស់ ! ធ្វើឲ្យកូនបាក់ទឹកចិត្ត ពិបាកនឹងទទួលយកពេលពួកគាត់ដើចេញទៅខាងក្រៅ !
ចាំពាក្យថាបើខ្មោចងាប់ហើយមិនបាច់គាស់ខ្មោចឲ្យងើបវិញទេ ដំណោះស្រាយមានច្រើន Facebook គេបង្កើតមកធ្វើឲ្យយើងយល់ដឹងច្រើនពីសង្គមពិត ។ ចូរកុំយក Facebook មកបើកកកាយរឿងជីវិតខ្លួនឲ្យគ្រប់គ្នាដឹងសឹងតែទាំងអស់ពេក បើគិតថាមិនអាច គួរកុំ វាអាចប៉ះពាល់ច្រើនសម្រាប់ខ្លួនឯង ទី១ចំណេញ ទី២បង់ខាត »៕ (កែសម្រួលដោយ ៖ បុប្ផា)
ចែករំលែកព័តមាននេះ