រាជធានីភ្នំពេញ ៖ បន្ទាប់ពីក្រសួងសាធារណៈការនិងដឹកជញ្ជូន ដាក់អោយដំណើរការនូវការចុះបញ្ជីយានយន្តតាមប្រព័ន្ធអនឡាញ គេកត់សម្គាល់ឃើញថា ត្រឹមរយៈពេលតែ១ឆ្នាំ ក្រសួងទទួលបានការចុះបញ្ជីយានយន្តតាមប្រព័ន្ធថ្មីនេះបានចំនួន ជាង៥លានគ្រឿង ដែលភាគច្រើនជាងគេគឺ ទោចក្រយានយន្ត ។
នេះបើតាមការឲ្យដឹងរបស់លោក ស៊ុន ចាន់ថុល ទេសរដ្ឋមន្ត្រី និងរដ្ឋមន្ត្រីក្រសួងសាធារណៈការនិងដឹកជញ្ជូន លោក ស៊ុន ចាន់ថុល បានមានប្រសាសន៍ថា « ក្នុងចំណោមយានយន្តទាំងជាង៥លាននោះ មានទោចក្រយានយន្តរហូតដល់ជាង៤លានគ្រឿង ហើយរថយន្តវិញ គឺទទួលបានជាង១លានគ្រឿងដែលចុះបញ្ជីតាមប្រព័ន្ធអនឡាញ » ។ លោកបានបន្តថា ការចុះបញ្ជីរតាមប្រព័ន្ធអនឡាញនេះ ទើបតែដាក់ឱ្យអនុវត្តន៍បានជាង១ឆ្នាំតែប៉ុណ្ណោះ ហើយការចុះបញ្ជីតាមប្រព័ន្ធនេះ គឺជារបៀបថ្មីរបស់ក្រសួង ដែលមានភាពងាយស្រួល សម្រាប់ប្រជាពលរដ្ឋកម្ពុជា ក្នុងការទិញផ្លាកលេខ រឺចុះបញ្ជីយកលេខណាមួយទៅប្រើប្រាស់នោះ ពលរដ្ឋមិនចាំបាច់រត់ការច្រើនដូចកាលពីមុន និងមិនត្រូវការចំណាយក្រៅផ្លូវការអីដែរ ពោលគឺតម្លៃសេវាកម្មនៅក្នុងប្រព័ន្ធស្រាប់ ។
លោក អូតា ម៉ាសាយ៉ា ប្រធានទីប្រឹក្សាគម្រោង JICA/MVRI ក៏បានអោយដឹងដែរថា ដោយសារតែវឌ្ឍនភាពនៃការកើនឡើងនូវចំនួនយានយន្ដយ៉ាងឆាប់រហ័ស ប្រទេសកម្ពុជា បានប្រឈមមុខនឹងកត្តាជាច្រើន ជាពិសេស បញ្ហាគ្រោះថ្នាក់ចរាចរណ៍ ។ បញ្ហានេះ ទីប្រឹក្សាគម្រោង JICA/MVRI នឹងធ្វើកិច្ចសហការជាមួយកម្ពុជា ក្នុងការដោះស្រាយ ដោយការប្រើនូវបទពិសោធន៍ល្អៗ និងចំណេះដឹងរបស់ជប៉ុន ធ្លាប់បានធ្វើកន្លងមក ដូច្នេះ គម្រោងនេះ នឹងធ្វើឲ្យប្រសើរឡើង នូវប្រព័ន្ធចុះបញ្ជី និងត្រួតពិនិត្យ លក្ខណៈបច្ចេកទេសយានជិនិះ និងដោះស្រាយបញ្ហា ដែលទាក់ទងទៅនឹងប្រព័ន្ធព័ត៌មានវិទ្យា ដូចជា ការធ្វើ ប្រព័ន្ធសុវត្ថិភាព និងម៉ាស៊ីនផ្ទុកទិន្នន័យ ជាដើម។
លោក Sugano Yuichi ប្រធានតំណាងការិយាល័យទីភ្នាក់ងារកិច្ចសហប្រតិបត្តិការអន្តរជាតិជប៉ុនហៅកាត់ថា JICA ប្រចាំកម្ពុជាដែលបានគាំទ្រ និងផ្ដល់នូវជំនួយបច្ចេកទេសសម្រាប់ការចុះបញ្ជីតាមអនឡាញនេះដែរ បានលើកឡើងថា JICA បានចាប់ផ្ដើមគម្រោង MVRI នេះដែលមានឈ្មោះថា គម្រោងទំនើបកម្មប្រព័ន្ធចុះបញ្ជី និងត្រួតពិនិត្យ លក្ខណៈបច្ចេកទេសយានយន្ដ ដូច្នេះ គម្រោងនេះ មាន៣ផ្នែកសំខាន់ ដែលធ្វើឲ្យមានភាពប្រសើរឡើងលើការចុះបញ្ជីយានជំនិះ ការត្រួតពិនិត្យលក្ខណៈបច្ចេកទេសយានជំនិះ និងការគាំទ្រផ្នែកព័ត៌មានវិទ្យា ។
លោក ពៅ ម៉ាលី រដ្ឋលេខាធិការក្រសួងសាធារណៈការនិងដឹកជញ្ជូន បានមានប្រសាសន៍ថា ការចុះបញ្ជីនិងទូទាត់ ការចំណាយមកកាន់ក្រសួងសាធារណៈការនិងដឹកជញ្ជូនវិញ តាមរយៈប្រព័ន្ធអនឡាញនិងបច្ចេកវិទ្យាថ្មីនេះ នឹងត្រូវបានកាត់បន្ថយការជួបផ្ទាល់រវាងមន្ត្រីនិងម្ចាស់យានយន្ត ដូច្នេះវានឹងកាត់បន្ថយបានច្រើននូវ ការចំណាយក្រៅផ្លូវការ ជាពិសេសអំពើពុករលួយដែលរដ្ឋាភិបាលក៏បាននិងកំពុងធ្វើការយ៉ាងសកម្មផងដែរ ។
បើតាមអ្នកនាំពាក្យក្រសួងសាធារណៈការ និងដឹកជញ្ជូន លោកវ៉ា ស៊ឹមសូរិយា បានអោយដឹងផងដែរថា ក្រសួងក៏បាននិងកំពុងរៀបចំឱ្យមានការទិញផ្លាកលេខពិសេសៗ ដែលម្ចាស់យានយន្តចង់បានផងដែរ ហើយការងារនេះកំពុងប្រជុំរកដំណោះស្រាយជារួមមួយរវាងអន្តរក្រសួង ដើម្បីចេញជាសេចក្តីសម្រេចមួយ ឱ្យពលរដ្ឋដែលចង់ទិញផ្លាកលេខពិសេសៗ អាចជ្រើសរើសផ្លាកលេខដែលខ្លួនចង់បាន ។
គួរបញ្ជាក់ថា រដ្ឋាភិបាលកម្ពុជាក៏បានកំណត់ផងដែរពីការផ្លាស់ប្តូរប្រើសាច់ប្រាក់សុទ្ធ ងាកមកប្រើការទូទាត់តាមប្រព័ន្ធឌីជីថល ដើម្បីជំរុញដល់ដំណើរការសេដ្ឋកិច្ចឌីជីថល អោយកាន់តែមានភាពរីកលូតលាស់ ដូចបណ្ដាប្រទេសជឿនលឿនលើពិភពលោក ៕ កែសម្រួលដោយ ៖ សុឃាក់
ចែករំលែកព័តមាននេះ