ប្រទេសវេណេស៊ុយអេឡា ៖ យោងតាមរដ្ឋាភិបាលវេណេស៊ុយអេឡាថា ការប៉ុនប៉ងធ្វើរដ្ឋប្រហារយោធាថ្មីមួយក្នុងប្រទេសត្រូវបានកម្ទេច។
រដ្ឋមន្ត្រីគមនាគមន៍វេណេស៊ុយអេឡាលោកJORGE RODRIGUEZ អះអាងកាលពីថ្ងៃទី២៦មិថុនាថា រដ្ឋប្រហារយោធានោះប៉ងធ្វើឃាតប្រធានាធិបតី លោកនីកូឡាស់ម៉ាឌូរ៉ូត្រូវបានគ្រោងធ្វើ្វើនាថ្ងៃទី២៣និង២៤មិថុនា។ ដោយនិយាយយោងដល់សេចក្ដីរាយការណ៍ របស់បណ្ដាភ្នាក់ងាររដ្ឋាភិបាលដែលបន្លំខ្លួន ចូលក្នុងការប៉ុនប៉ងធ្វើរដ្ឋប្រហារនេះ លោកJORGE RODRIGUEZថ្លែងទៀតថា យើងបានចូលរួមក្នុងរាល់កិច្ចប្រជុំសម្ងាត់ ដើម្បីរៀបចំធ្វើរដ្ឋប្រហារ ផ្ដួលរំលំមេដឹកនាំសង្គមនិយម។ រដ្ឋប្រហារចូលរួមដោយពួកយោធាសកម្មនិងយោធាចូលនិវត្តន៍ ត្រូវបានគេគ្រោងធ្វើរវាងថ្ងៃទី២៣មក២៤មិថុនា។
លោកបន្តថាប្រទេសកូឡុំប៊ី សីុលីនិងសហរដ្ឋអាមេរិកសង្ស័យចូលរួមក្នុងការប៉ុនប៉ងធ្វើរដ្ឋប្រហារនោះ។ លោកបានចោទប្រកាន់ជាពិសេសដល់ប្រធានាធិបតីកូឡុំប៊ីនិងសីុលី ព្រមទាំងទីប្រឹក្សាសន្តិសុខជាតិអាមេរិក លោកJOHN BOLTONថា ចូលរួមក្នុងការប៉ុនប៉ងធ្វើឃាតលោកម៉ាឌូរ៉ូ។
វេណេស៊ុយអេឡាជាប្រទេសនាំប្រេងចេញសំខាន់មួយ កំពុងជួបប្រទះនឹងវិបត្តិសេដ្ឋកិច្ចនិងនយោបាយធ្ងន់ធ្ងរបំផុត និងការបែកបាក់គ្នាខ្លាំងនាំឲ្យមានការលូកដៃ ពីសំណាក់បរទេស ពិសេសសហរដ្ឋអាមេរិកដែលប៉ុនប៉ងធ្វើ្វើអន្តរាគមន៍យោធាមួយក្នុងប្រទេសនោះទៀតផង។ ប្រទេសនេះកំពុងស្ថិតក្នុងកណ្ដាប់ដៃដែក រវាងលោកនីកូឡាស់ម៉ាឌូរ៉ូនិងមេដឹកនាំប្រឆាំង លោកJUAN GUAIDO ចាប់តាំងពីមេខ្លោងប្រឆាំងរូបនេះប្រកាសខ្លួនឯង ជាប្រមុខរដ្ឋស្ដីទីពីថ្ងៃទី២៣មករាមក។ ការបះបោរយោធាមិនបានសម្រេច ប្រឆាំងលោកនីកូឡាស់ម៉ាឌូរ៉ូ ធ្លាប់មានរួចហើយកាលពីថ្ងៃទី៣០មេសា តែត្រូវបរាជ័យ។
លោកJORGE RODRIGUEZក៏ចោទប្រកាន់អតីតប្រមុខសើុបការណ៍យោធាវេណេស៊ុយអេឡា ឧត្ដមសេនីយCRISTOPHER FIGUERA ដែលរត់ភៀសខ្លួនចូលកូឡុំប៊ិ ក្រោយការប៉ុនប៉ងធ្វើរដ្ឋប្រហារមិនសម្រេច កាលពីថ្ងៃទី៣០មេសា ប្រឆាំងលោកម៉ាឌូរ៉ូ ហើយមកដល់អាមេរិកកាលពីថ្ងៃទិ២៤មិថុនា ថា បានប្រមូលយកប្រាក់ជាច្រើនរយពាន់ដុល្លារ ដើម្បីយកមកផ្គត់ផ្គង់ដល់ប្រតិបត្តិការធ្វើរដ្ឋប្រហារថ្មី។ លោកម៉ាឌូរ៉ូបានចោទប្រកាន់ឧត្ដមសេនីយរូបនោះថា ជាភ្នាក់ងារម្នាក់របស់CIA។
ចំណែកប្រទេសរុស្ស៊ីវិញបានដកបណ្ដាអ្នកឯកទេស ដែលជួយហ្វឹកហ្វឺនក្នុងការប្រើប្រាស់ថែរក្សាបណ្ដាសម្ភារបច្ចេកទេស ឲ្យវិលត្រឡប់មកកាន់ប្រទេសវិញ។ តាមស្ថានទូតរុស្ស៊ីប្រចាំក្រុងការ៉ាកាស់ថា ពួកអ្នកបច្ចេកទេសទាំងនោះចាកចេញពីក្រុងការ៉ាកាស់មកកាន់ក្រុងមូស្គូ នាថ្ងៃទី២៦មិថុនា៕ (កែសម្រួលដោយ ៖ បុប្ផា)
ចែករំលែកព័តមាននេះ