រាជធានីភ្នំពេញ ៖ រថយន្ដកុងតឺន័រ១គ្រឿង បើកបរក្នុងល្បឿនលឿនដូចហោះជ្រុលទៅបុករថយន្ដម៉ាកឡិចស៊ីសស៊េរីទំនើប HS 250h ដែលកំពុងបើកបរឆ្លងផ្លូវយ៉ាងពេញទំហឹង រួចជ្រុល និងបន្តទៅបុករ៉ឺម៉កលក់ភេសជ្ជៈ១គ្រឿងទៀត ដែលកំពុងចតលក់ដូរនៅលើចិញ្ចើមផ្លូវ…
រាជធានីភ្នំពេញ ៖ រថយន្ដកុងតឺន័រ១គ្រឿង បើកបរក្នុងល្បឿនលឿនដូចហោះជ្រុលទៅបុករថយន្ដម៉ាកឡិចស៊ីសស៊េរីទំនើប HS 250h ដែលកំពុងបើកបរឆ្លងផ្លូវយ៉ាងពេញទំហឹង រួចជ្រុល និងបន្តទៅបុករ៉ឺម៉កលក់ភេសជ្ជៈ១គ្រឿងទៀត ដែលកំពុងចតលក់ដូរនៅលើចិញ្ចើមផ្លូវ បណ្ដាលឲ្យធ្លាក់ចូលទៅក្នុងប្រឡាយទឹក ហើយមនុស្ស៣នាក់រងរបួសធ្ងន់ និងស្រាល ។ ហេតុការគ្រោះថ្នាក់ចរាចរណ៍នេះបានកើតឡើង កាលពីវេលាម៉ោង២និង១៥នាទីរសៀល ថ្ងៃទី២៧ ខែមិថុនា នៅលើកំណាត់ផ្លូវ៥០ម៉ែត្រកែងផ្លូវបេតុងច្រកចូលក្នុងភូមិព្រែកថ្លឹង សង្កាត់ជើងឯក រាជធានីភ្នំពេញ ។
តាមប្រភពព័ត៌មានបានឲ្យដឹងថា ជនរងគ្រោះដែលរងរបួសធ្ងន់ និងស្រាលនោះមិនត្រូវបានស្គាល់អត្តសញ្ញាណនៅឡើយទេ និងត្រូវបានបញ្ជូនទៅកាន់មន្ទីរពេទ្យ ដើម្បីសង្គ្រោះបន្ទាន់ភ្លាមៗដែរ ។
នៅមុនពេលកើតហេតុរថយន្ដកុងតឺន័របើកបរក្នុងល្បឿនលឿនធ្វើដំណើរក្នុងទិសដៅពីកើតទៅលិចក្នុងល្បឿនលឿនដូចហោះ លុះពេលទៅដល់ត្រង់ចំណុចកើតហេតុបានវាក់ជាមួយរថយន្ដស៊េរីទំនើប១គ្រឿងម៉ាកឡិចស៊ីស ពណ៌ខ្មៅ ពាក់ស្លាកលេខ កណ្ដាល 2D-8789 ។ ដែលបើកបរដោយស្ត្រីម្នាក់ និងមានកូនស្រីម្នាក់ រួមដំណើរជាមួយផង ដែលកំពុងធ្វើដំណើរក្នុងទិសដៅពីកើតទៅលិច បន្ទាប់មកបានបត់ឆ្វេងឆ្លងផ្លូវ ក្នុងបំណងចូលទៅក្នុងភូមិព្រែកថ្លឹង ។
ប្រភពដដែលបានបន្តថា ខណៈនោះដោយសារតែរថយន្តកុងតឺន័របើកលឿនហួសហេតុពេកទើបជាន់ហ្វ្រាំងមិនជាប់ ហើយក៏ជ្រុលទៅបុកចំពាក់កណ្ដាលខ្លួនរថយន្ដឡិចស៊ីស បណ្ដាលឲ្យរងការខូចខាតមួយចំហៀង និងរងរបួសអ្នកជិះក្នុងរថយន្ដនោះទាំងពីរនាក់ម្ដាយ និងកូនតែម្ដង ។ បន្ទាប់មករថយន្ដកុងតឺន័រខាងលើបានជ្រុលបន្តទៅបុករ៉ឺម៉កលក់ភេសជ្ជៈដែលដាក់លក់នៅលើចិញ្ចើមផ្លូវ បណ្ដាលឲ្យធ្លាក់ចូលទៅក្នុងទឹកប្រឡាយ ហើយអ្នកលក់ភេសជ្ជៈក៏បានរងរបួសដែរ រីឯរថយន្តបង្កក៏ធ្លាក់ចូលទៅក្នុងប្រឡាយទឹកដូចគ្នាដែរ ប៉ុន្តែសំណាងល្អមិនក្រឡាប់ ។
ក្រោយពីកើតហេតុអ្នកបើកបរថយន្ដបង្កចុះពីរថយន្ដរួចរត់គេចខ្លួនបាត់ស្រមោល ចំណែកជនរងគ្រោះត្រូវរថយន្ដពេទ្យដឹកយកទៅសង្គ្រោះបន្ទាន់ភ្លាមៗ ដោយឡែកកម្លាំងនគរបាលការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញចុះធ្វើការវាស់វែង និងនាំយករថយន្តទាំង២គ្រឿង និងរ៉ឺម៉កលក់ភេសជ្ជៈទៅរក្សាទុករង់ចាំការដោះស្រាយតាមផ្លូវច្បាប់៕ កែសម្រួលដោយ ៖ សុឃាក់
ចែករំលែកព័តមាននេះ