ភ្នំពេញ ៖ បុរសម្នាក់បានរងរបួសធ្ងន់ បន្ទាប់ពីទើបចេញពីកន្លែងផឹកស៊ី ប្រញាប់ទៅរកទិញទឹកដោះគោឲ្យកូន ហើយបើកម៉ូតូបោះពួយវ៉ាជែងរថយន្តកុងតឺន័រ រួចជ្រុលទៅបុកម៉ូតូមួយគ្រឿងផ្សេងទៀតនៅគន្លងផ្លូវម្ខាង កាលពីវេលាម៉ោង៧និង៥៥នាទីយប់ថ្ងៃទី២៦ ខែមិថុនា ឆ្នាំ២០១៩ ស្ថិតតាមផ្លូវជាតិលេខ៣ ភូមិព្រៃព្រីងត្បូង២ សង្កាត់ចោមចៅ៣ ខណ្ឌពោធិសែនជ័យ ។
ភាគីម៉ូតូមួយគ្រឿងម៉ាកសង់កូរ៉េ ពណ៌បៃតង ពាក់ស្លាកលេខ ជ ៧២៦០ ពភ១ បើកបរដោយឈ្មោះ កាន់ បូរ៉េម ភេទប្រុស អាយុ២៩ឆ្នាំ មុខរបរកម្មករ មានទីលំនៅ ភូមិគោកមាស សង្កាត់ប្រទះឡាង ខណ្ឌកំបូល បានរងរបួសធ្ងន់ និងមានប្រពន្ធនៅភូមិថ្មគោល សង្កាត់ចោមចៅ២ ខណ្ឌពោធិសែនជ័យ ។
ចំណែកភាគីខាងម៉ូតូមួយគ្រឿងទៀតជិះគ្នា២នាក់ម៉ាកស៊ូរ៉ុស ពណ៌ខ្មៅ ពាក់ស្លាកលេខ តាកែវ ៣G-៣៥៨១ បើកបរដោយយុវជនម្នាក់មិនស្គាល់អត្តសញ្ញាណ និងយុវជនម្នាក់ទៀតជាអ្នករួមដំណើរ មិនស្គាល់អត្តសញ្ញាណ តែត្រូវបានគេដឹងថា យុវជនទាំង២នាក់ជាអ្នកប្រកបរបរធ្វើសាច់ក្រក មានទីលំនៅភូមិវត្តស្លែង សង្កាត់ពងទឹក ខណ្ឌដង្កោ បានរងរបួសស្រាលទាំង២នាក់ ។
តាមប្រភពព័ត៌មាននៅកន្លែងកើតហេតុបានឲ្យដឹងថា មុនកើតហេតុ គេឃើញបុរសម្នាក់បើកបរម៉ូតូមួយគ្រឿងម៉ាកសង់កូរ៉េ ពណ៌បៃតង ត្រូវបានសាច់ញាតិអះអាងថា ទើបតែចេញពីកន្លែងផឹកស៊ីនៅឯភូមិគោកមាស បើកបរម៉ូតូប្រញាប់ទៅរកទិញទឹកដោះគោឲ្យកូន ដោយបើកបោះពួយក្នុងល្បឿនលឿន តាមបណ្តោយផ្លូវជាតិលេខ៣ ពីត្បូងទៅជើង លុះមកដល់ចំណុចកើតហេតុខាងលើ បានបើកវ៉ាជែងរថយន្តកុងតឺន័រមួយគ្រឿង រួចក៏ជ្រុលទៅបុកម៉ូតូមួយគ្រឿងទៀតជិះគ្នា២នាក់ម៉ាក ស៊ូរ៉ុស ពណ៌ខ្មៅ កំពុងបើកបរក្នុងទិសដៅបញ្ច្រាសគ្នា បណ្តាលឱ្យអ្នកបើកបរម៉ូតូម៉ាកសង់កូរ៉េរងរបួសធ្ងន់ ចំណែកភាគីខាងម៉ូតូម៉ាកស៊ូរ៉ុស បានរងរបួសស្រាលទាំង២នាក់ ។
ក្រោយកើតហេតុ ជនរងគ្រោះម្នាក់ដែលរងរបួសធ្ងន់ត្រូវបានរថយន្តសង្គ្រោះរបស់អង្គភាព៧១១ ដឹកបញ្ជូនទៅកាន់មន្ទីរពេទ្យព្រះកុសុមៈ ។ ក្រោយពេលកើតហេតុ គេឃើញសាច់ញាតិភាគីទាំងសងខាងមកជុំគ្នា ទើបដឹងថា សុទ្ធតែជាអ្នកភូមិក្បែរខាង និងស្គាល់គ្នា ទីបំផុតសម្រេចយកម៉ូតូទៅជួសជុល និងព្យាបាលរបួសរៀងៗខ្លួន គ្មានខាងណាសងខាងណាឡើយ ដើម្បីបញ្ចប់រឿងនៅកន្លែងកើតហេតុតែម្តង ៕
ចែករំលែកព័តមាននេះ