រាជធានីភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអះអាងថា រយៈកាលចុងក្រោយនេះបញ្ហាបទល្មើសគ្រឿងញៀន គឺខ្មែរនាំចេញទៅថៃច្រើនជាងថៃនាំចូលមកខ្មែរ…
រាជធានីភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអះអាងថា រយៈកាលចុងក្រោយនេះបញ្ហាបទល្មើសគ្រឿងញៀន គឺខ្មែរនាំចេញទៅថៃច្រើនជាងថៃនាំចូលមកខ្មែរ ខណៈរយៈកាលជាង១០ឆ្នាំមុនថៃបាននាំចូលគ្រឿងញៀន មកខ្មែរ ច្រើនជាងខ្មែរ នាំចូលទៅថៃ ថ្លែងក្នុងពិធីប្រកាសចូលកាន់តំណែងអភិបាលខេត្តព្រះវិហារ ។
សម្តេច ស ខេង បានលើកឡើងក្នុងពិធីប្រកាសចូលកាន់មុខតំណែ ងអភិបាលនៃគណៈអភិបាលខេត្តព្រះវិហារ នៅថ្ងៃទី២៧ ខែមិថុនានេះយ៉ាង ដូច្នេះថា គ្រឿងញៀន ដែលចូលមកដល់កម្ពុជា គឺតាមរយៈច្រកព្រំដែន (ព្រះវិហារ ស្ទឹងត្រែង រតនៈគិរី ) ដែល អាជ្ញាធរមានសមត្ថកិច្ចបានបង្ក្រាបបានជាបន្តបន្ទាប់កន្លងមក តែទោះមានការបង្ក្រាប យ៉ាងណាក្ដីក៏បញ្ហាគ្រឿងញៀននេះ នៅមិនទាន់បង្ក្រាបអស់នៅឡើយ ។ ជាមួយគ្នានោះដែរ សម្ដេចអំពាវនាវឲ្យអាធរមានសមត្ថកិច្ច ទាំងប្រជាពលរដ្ឋ ត្រូវដាក់ខ្លួនឲ្យឆ្ងាយពីគ្រឿងញៀន ដោយកុំពាក់ព័ន្ធ និងគ្រឿងញៀន ហើយអាជ្ញាធរ មិនត្រូវនៅពីក្រោយ ដើម្បីធ្វើជាខ្នងបង្អែកឲ្យអ្នករកស៊ីគ្រឿងញៀន (នគរបាល កងទ័ព មន្ត្រីរាជការទាំងអស់) ហើយវិស័យឯកជននានា ក៏ដូចជា ប្រជាពលរដ្ឋ មិនត្រូវគាំទ្រ ឬធ្វើជាបង្អែកឲ្យអ្នករកស៊ីគ្រឿងញៀនឡើយ ។
សម្ដេចក៏បានបញ្ជាឲ្យអាជ្ញាធរ មានសមត្ថកិច្ច ទាំងអស់ ត្រូវបង្កើន សមត្ថភាពចុះ ប្រតិបត្តិការ តាមច្រកព្រំដែននានា ទប់ស្កាត់ កុំឲ្យគ្រឿងញៀន ចូលមកកម្ពុជា បានទៀត ។ ជាមួយគ្នានោះដែរសម្តេច ស ខេង បានថា មានប្រជាជន រាប់ម៉ឺនគ្រួសារ បានរងគ្រោះដោយសារបញ្ហាគ្រឿងញៀន ហើយក្រុមគ្រួសារ ក៏បានមានអារម្មណ៍ សោកសៅ (វេទនា) មិនចាញ់ អ្នកដែលបានប្រព្រឹត្តបទល្មើសគ្រឿងញៀនឡើយ ។ ក្នុងឱកាសនោះដែរសម្តេចក៏បានឲ្យអាជ្ញាធរមានសមត្ថកិច្ចពិសេសក្នុងខេត្តព្រះវិហារផ្ទាល់ ត្រូវបង្ក្រាប់បទល្មើសគ្រឿងញៀនឲ្យបានឲ្យមានប្រសិទ្ធភាព និងទប់ស្កាត់ឲ្យខាន តែបាននូវការសារាចរណ៍ចែកចាយគ្រឿងញៀន នៅតាមទីជនបទ និងពិសេសនៅតាម សាលារៀន (មធ្យមសិក្សាឡើងទៅ) ហើយលោកគ្រូ អ្នកគ្រូ ដែលបង្រៀនសិស្ស នៅតាមវិទ្យាល័យ ត្រូវតែជួយមើលថែ គ្រប់គ្រងសិស្ស ឲ្យបានម៉ត់ចត់ ព្រោះឪពុកម្ដាយ របស់សិស្ស មិនបានមើលថែ បានឌិតដល់ឡើយ ព្រោះអាណាព្យាបាលសិស្ស ដឹងតែកូនរបស់ពួកគាត់ទៅរៀន តែកូនគាត់ទៅប្រព្រឹត្ត បទល្មើសអ្វីមួយនោះ គឺពួកគាត់ មិនបានដឹងឡើយ ។
សម្តេចបញ្ជាក់ថា៖«អាណាព្យាបាលត្រូវមានការពង្រឹងការគ្រប់គ្រងកូនចៅរបស់ខ្លួន ឲ្យបានល្អ ។ ពាក់ព័ន្ធគ្រឿងញៀននេះជម្រាបថា កាលពីថ្ងៃទី២៦ ខែមិថុនា កន្លងមកនេះ កម្ពុជាបានដុតកម្ទេចចោលគ្រឿងញៀនចោលសរុបជាង២តោន ៕ កែសម្រួលដោយ ៖ សុឃាក់
ចែករំលែកព័តមាននេះ