រាជធានីភ្នំពេញ ៖ លោកជា សុផារ៉ា ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូប នីយកម្មសំណង់ និងសុរិយោដី បានមានប្រសាសន៍ណែនាំឱ្យមន្ត្រី មុននឹងអនុញ្ញាតឱ្យសាងសង់សំណង់ ត្រូវតែពិនិត្យលិខិតបើកការដ្ឋានបញ្ចប់ការដ្ឋាន ពិសេស សម្រាប់រដ្ឋបាលថ្នាក់ក្រោមជាតិ មេត្តាអនុវត្តតាមក្រមសំណង់ និងបទដ្ឋានបច្ចេកទេស ។ ក្នុងកិច្ចប្រជុំជាមួយម្ចាស់សំណង់ និងក្រុមហ៊ុនម៉ៅការ សាងសង់នៅខេត្តព្រះសីហនុ កាលពីថ្ងៃទី២៥ មិថុនាលោកជា សុផារ៉ា បានលើកឡើងថា រាល់សំណង់ដែលសង់គ្មានច្បាប់ ចាប់ពីពេលនេះទៅ គឺអាជ្ញាធរជាដើមបណ្តឹង ត្រូវដាក់ពាក្យបណ្តឹងទៅព្រះរាជអាជ្ញា ។
លោកបានលើកឡើងទៀតថា យើង បង្កើតគណៈកម្មការ ដើម្បីចុះត្រួតពិនិត្យរាល់សំណង់ ហើយគោលដៅនៃការត្រួតពិនិត្យសំណង់ គឺ បងប្អូនត្រូវរៀបចំត្រៀមឯកសារបង្ហាញថា ការ design គ្រឿងបង្គំរបស់សំណង់ មានបទដ្ឋានបច្ចេកទេសយ៉ាងណា ដោយឲ្យវិស្វករ ត្រៀមឯកសារមកបង្ហាញដល់គណៈកម្មកា ដើម្បីងាយស្រួលក្នុងការសហការ ចូលរួមកែលម្អ សំណង់តាមស្តង់ដារបច្ចេកទេសឡើងវិញ ។
លោកបានបញ្ជាក់ថា គណៈកម្មការរបស់យើងចុះទៅដល់ក្នុងជំហានដំបូង ក្នុងមួយសប្តាហ៍ មិនរំខានពេលវេលានោះទេ។ដូច្នេះ សូមបងប្អូនទាំងអស់ មេត្តាត្រៀមឯកសារ កុំមានទម្លាប់ថា គណៈកម្មការចុះទៅ ហុចស្រោមសំបុត្រ សូមឱ្យបងប្អូនធ្វើតាមជំនាញ ព្រោះយើងមាន៨ គណៈ កម្មការដែលចុះត្រួតពិនិត្យលើការងារសំណង់នេះ ។
ម្យ៉ាងទៀត ក្នុងពេលបំពេញបេសកកម្ម សូមបងប្អូនយល់ថា ការចុះទៅនេះ គឺអនុវត្តតាមជំនាញ និងវិជ្ជាជីវៈប្រកបទៅដោយក្រមសីលធម៌ត្រឹមត្រូវ ដើម្បីទាក់ទាញវិនិយោគនៅក្នុងខេត្តព្រះ សីហនុកាន់ច្រើននិងកាន់តែល្អថែមទៀត ។លោក សង្ឃឹម ជឿជាក់ទៅលើរដ្ឋបាលថ្នាក់ក្រោមជាតិ និងមន្ត្រី ថ្នាក់ជាតិ ទាំងអស់ ចូលរួមគាំទ្រនៅក្នុងដំណើរការនេះឱ្យបានល្អប្រសើរ ៕ (សម្រួលដោយ៖ ស្រីណា)
ចែករំលែកព័តមាននេះ