ខេត្តកំពត ៖ សេចក្តីរាយការណ៍បានឲ្យដឹងថា ករណីអគារលំបាក់នៅខេត្តព្រះសីហនុដែលមាន២នាក់ប្តីប្រពន្ធស្លាប់ទាំងពីរនាក់ដែលរស់នៅភូមិត្រពាំងវែង ឃុំដងទង់ ស្រុកដងទង់ ខេត្តកំពត ហើយបានបន្សល់ទុកកូនស្រីកំព្រាពីរនាក់ទៀត យ៉ាងខ្លោចផ្សាបំផុត ហើយករណីរលំបាក់អគារខាងលើនេះដែរបានកើតឡើង កាលពីថ្ងៃទី២២ ខែមិថុនានេះ ។
សេចក្តីរាយការណ៍បានបន្តថា គ្រួសារខាងលើមានប្ដីឈ្មោះ ចាន់ ឆូយ អាយុ៣៧ឆ្នាំ និងប្រពន្ធឈ្មោះ ជុំណាវី អាយុ៣៤ឆ្នាំ ។ ទាំងពីរនាក់ប្ដីប្រពន្ធត្រូវបានស្លាប់ ដោយអគាររលំបាក់សង្កត់លើ តែទោះជាយ៉ាងណាក្តីក៏សពទាំងពីរនាក់ប្ដីប្រពន្ធត្រូវបានដឹកមកកាន់ស្រុកកំណើតគឺនៅភូមិត្រពាំងវែង ឃុំដងទង់ ស្រុកដងទង់ ខេត្តកំពតហើយដែរ ។ ចំណែកកូនស្រីពីរនាក់ដែលកូនស្រីច្បងឈ្មោះ យន់ លីហ្សា អាយុ១៤ឆ្នាំ រៀនបានថ្នាក់ទី៨ និងកូនទី២ ឈ្មោះ យន់ផាន់ណា អាយុ១២ឆ្នាំ រៀនថ្នាក់ទី៥ ។
ដោយឡែក យន់ ផាន់ណា ជាកូនប្អូនបាននិយាយទាំងក្ដុកក្ដួលអួលដើម.ក ថា ចាប់ពីពេលនេះពិតជាមិនឃើញមុខម្ដាយឪពុកទៀតទេ… ។ ចំណែកឯយន់ លីហ្សា ក៏បាននិយាយរៀបរាប់ពីដំណើរឪពុកម្ដាយរបស់គេបានស្លាប់ចោលដែរ បណ្ដាំឪពុកម្ដាយរបស់គេកាលនៅរស់ គឺអោយកូនៗខំរៀនសូត្រ ព្រោះឪពុកម្ដាយចេញទៅរកលុយ ដើម្បីគ្រួសារយើង… ។
រីឯម្ដាយជនរងគ្រោះដែលមានឈ្មោះ នាង អៀម អាយុ៦៤ឆ្នាំ បាននិយាយរៀបរាប់ថាកូនប្រុសស្រីទាំងពីរនាក់នេះ បានទៅធ្វើការសំណង់នៅកំពង់សោម រយៈពេល៦ឆ្នាំហើយដែលបានសន្សំប្រាក់យកមកធ្វើផ្ទះ ដោយចៅតូចៗនេះរស់នៅជាមួយគាត់ជាជីដូន រហូតដល់ឪពុកម្ដាយរបស់គេមានគ្រោះថ្នាក់ ។ ជីដូនចាស់រូបនេះជាស្ត្រីមេម៉ាយផងនោះ បាននិយាយថាថវិកាដែលជាអំណោយរបស់សប្បុរសជនត្រូវបានផ្ញើទុកនៅធានាគារអស់ហើយ ហើយកូនៗកំព្រាឪពុកម្ដាយបានថ្លែងអំណរគុណដល់សម្ដេចតេជោ ហ៊ុន សែន ផងដែរ និងថ្នាក់ដឹកនាំទាំងអស់ជួយគិតគូរដល់ឪពុកម្ដាយរបស់គេ ដែលបានបាត់បង់ជីវិតដោយឧបទ្ទហេតុអគារបាក់រលំនៅខេត្តព្រសីហនុ ៕ កែសម្រួលដោយ ៖ សុឃាក់
ចែករំលែកព័តមាននេះ