រាជធានីភ្នំពេញ៖ តារាចម្រៀងរ៉េប លោកនេនទុំ បានធ្វើឲ្យអ្នកគាំទ្រចាប់អារម្មណ៍ក្រោយពីលោកបានបង្ហាញភាពស្និទ្ធស្នាលប្លែក រួមទាំងបញ្ចេញសារប្រកាសស្នេហាជាមួយតារាសម្តែងស្រីហ្វី៊យ៉ាដា ។
នេនទុំ បានបង្ហាញវីដេអូរួមគ្នាមួយដោយបានឱបថើប និងប្រកាស ពេញៗមាត់ថាជាស្នេហាពិតដែលមានទាំងការសុំរៀបការផងដែរ។ ការប្រកាសនេះធ្វើឡើងគ្រាដែលនេន ទុំ និងហ្វ៊ីយ៉ាដា លេចមុខក្នុងការធ្វើដំណើរកម្សាន្តផ្អែមល្ហែមមួយកាលពីរាត្រីថ្ងៃទី១៩ ខែមិថុនា២០១៩ នៅមណ្ឌលកម្សាន្តមួយ ។ អ្វីដែលគេចាប់អារម្មណ៍ គឺឃើញនេនទុំបានបង្ហាញភាសាផ្អែមល្ហែម អមដោយការសុំកញ្ញាហ្វី៊យ៉ាដា រៀបការ ។ តារាប្រុសរូបនេះបញ្ជាក់ថា នៅទីនោះគឺមានទេសភាពស្អាតប្លែក ទើបនឹងបើកថ្មី និងមានទីតាំងអំណោយផលមួយចំនួនសម្រាប់គូស្នេហ៍ ។
នេនទុំបញ្ជាក់ថាមានអ្នកយល់ច្រឡំច្រើននៅក្នុងការផ្សាយផ្ទាល់លើហ្វេសផ្ទាល់ ។ លោកនិងកញ្ញាហ្វី៊យ៉ាដាបានស្គាល់គ្នាជាយូរដែរហើយ ក៏អញ្ជើញនាងចូលរួមសម្តែងតែម្តងទៅ មិនមានរឿងរ៉ាវស្នេហាអ្វីទេ ។
តារាសម្តែងឆ្នាសឆ្នើមថ្មីហ្វី៊យ៉ាដា វិញលើកឡើងថា នេះគ្រាន់តែជាការសម្តែងប៉ុណ្ណោះ។ ក្នុងឈុត ឆាកផ្អែមល្ហែមនេះនាងត្រូវនេនទុំថើបជាច្រើនលើកច្រើនសា ហើយនាងពិតជាអៀនខ្លាំង ប៉ុន្តែការសម្តែងត្រូវតែខិតខំឲ្យដូចការណ៍ពិតទើបមានអ្នកយល់ច្រឡំច្រើន ។ នាងរំពឹងថាការបកស្រាយនេះនឹងជួយជម្រះមន្ទិលរឿងរ៉ាវស្នេហាក្រៅឆាកដែលមានការលើកឡើងកន្លងមក ។
ហ្វី៊យ៉ាដាទើបតែប្រឡូកសិល្បៈមួយរយៈនេះប៉ុណ្ណោះ តែនាងទទួលបានការងារសម្តែងជាបន្តបន្ទាប់ដូចជារឿងភាគជាដើម ។ ក្រៅពីសម្តែងនាងក៏មានអាជីពជាអ្នកចម្រៀងប្រចាំភោជនីយដ្ឋាននាពេលយប់ ៕ (កែសម្រួលដោយ ៖ បុប្ផា)
ចែករំលែកព័តមាននេះ