ប្រទេសបារាំង-ថៃ ៖ កាលពីថ្ងៃទី២៥មិថុនាតុលាការបារាំងមួយ បានប្រកាសពីការកាត់ទោសដាក់គុក៤ឆ្នាំនិងពិន័យជាប្រាក់៧៥.០០០អឺរ៉ូ ប្រឆាំងអតីតមេដឹកនាំក្រុមហ៊ុនអាកាសចរណ៍ថៃ ONE TWO GO ដែលយន្តហោះមួយរបស់ក្រុមហ៊ុននេះធ្លាក់ កាលពីឆ្នាំ២០០៧បណ្ដាលឲ្យមនុស្ស៩០នាក់ស្លាប់។
ក្នុងចំណោមជនរងគ្រោះទាំងនោះ ជនជាតិបារាំង៩នាក់បានស្លាប់កាលពីថ្ងៃទី១៦កញ្ញាឆ្នាំ២០០៧ ក្នុងគ្រោះថ្នាក់ធ្លាក់យន្តហោះធុនប៊ូអុីងMD-82 របស់ក្រុមហ៊ុនធូរថ្លៃONE TWO GO ដែលធ្លាក់ជាមួយមនុស្សជិះក្នុងនោះ១៣០នាក់ ពេលហោះមកពីក្រុងបាងកកហើយចុះនៅព្រលានយន្តហោះភូកេតបាឡៃ ពេលមានខ្យល់និងភ្លៀងខ្លាំង។
ក្នុងសវនា២ថ្ងៃតុលាការក្រុងប៉ារីសមួយ បានកាត់ទោសប្រធានក្រុមហ៊ុនអាកាសចរណ៍ថៃONE TWO GOសម័យកាលនោះ លោកUDOM TANTIPRASONGCHAI ដាក់គុក៤ឆ្នាំនិងពិន័យ៧៥.០០០អឺរ៉ូ ពីបទសម្លាប់មនុស្សនិងបង្ករបួសស្នាមធ្ងន់ធ្ងរ។ ក្រោយការកាត់ក្ដីនោះប្រឆាំងមេដឹកនាំរបស់ក្រុមហ៊ុនបរទេសមួយ រដ្ឋអាជ្ញាលោកLOS RASCHEL បានស្នើដល់តុលាការឲ្យបញ្ជូនសារខ្លាំងបំផុតមួយ។
លោកថានោះជាការកាត់ទោសសំខាន់មួយសម្រាប់បណ្ដាជនរងគ្រោះ ហើយក៏ជាទិវាសំខាន់មួយសម្រាប់មជ្ឈដ្ឋានអាកាសចរណ៍ដែរ។ គេមិនត្រូវបណ្ដោយឲ្យមាននីទណ្ឌភាពឡើយ ទោះជាបទល្មើសកើតមានច្រើនឆ្នាំកន្លងមកក្ដី។
តុលាការបារាំងនោះគូសបញ្ជាក់ពីការខុសឆ្គងនិងការសម្រេចចិត្តខុស របស់អ្នកបើកយន្តហោះពេលចុះ៕ (កែសម្រួលដោយ ៖ បុប្ផា)
ចែករំលែកព័តមាននេះ