រាជធានីភ្នំពេញ៖ ធ្លាប់ជាតារាចម្រៀងចែងចាំងមួយដួង តែពេលនេះផាន់ ម៉ូនីកា បាននៅកាន់តែឆ្ងាយពីអាជីពនេះ បន្ទាប់ពីនាងរៀបការរួចមក ។ ការបោះបង់អាជីពនេះបានធ្វើឲ្យអ្នកគាំទ្រសោកស្តាយ តែនាងមិនអាចបំពេញបំណងពួកគេវិលត្រឡប់វិញបាន ។…
រាជធានីភ្នំពេញ៖ ធ្លាប់ជាតារាចម្រៀងចែងចាំងមួយដួង តែពេលនេះផាន់ ម៉ូនីកា បាននៅកាន់តែឆ្ងាយពីអាជីពនេះ បន្ទាប់ពីនាងរៀបការរួចមក ។ ការបោះបង់អាជីពនេះបានធ្វើឲ្យអ្នកគាំទ្រសោកស្តាយ តែនាងមិនអាចបំពេញបំណងពួកគេវិលត្រឡប់វិញបាន ។
អតីតតារាចម្រៀងប្រចាំផលិតកម្មសាន់ដេផាន់ ម៉ូនីកា បានបញ្ជាក់កាលពីពេល ថ្មីៗកន្លងមកថា នាងសោកស្តាយដែលមិនអាចបន្តអាជីពសិល្បៈបាន ដ្បិតដំណើរជីវិតឯកជនរបស់នាងមមាញឹកនឹងរបរក្រៅសិល្បៈ ។
ផាន់ ម៉ូនីកា បានសាងកេរ្តិ៍ឈ្មោះក្នុងផលិតកម្មសាន់ដេលេចធ្លោ ដោយក្នុងអំឡុងពេលនោះមានការពេញនិយមពីបណ្តាអ្នកគាំទ្រយុវវ័យ ។ នាងបានឃ្លាតឆ្ងាយអាជីពសិល្បៈបន្ទាប់ពីសម្រេចចិត្តរៀបការជាមួយកូនថៅកែលក់ខោអាវទំនើប ។ កាន់តែនៅឆ្ងាយពីអាជីពចាស់នៅពេលនាងមានកូន ដោយពេលនេះនាងមានកូន២នាក់ហើយ ។ នាងបានបើកហាងខោអាវលំដាប់យុវវ័យកំពុងតែកាក់កប ។
ផាន់ ម៉ូនីកា បានរៀបរាប់ថា«ខ្ញុំមិនអាចបន្តសិល្បៈបានទេ នាងខ្ញុំសុំអធ្យាស្រ័យអ្នកគាំទ្រផងមកពីនាងខ្ញុំមានកូន ហើយត្រូវមើលថែគ្រួសារមុខរបរឲ្យល្អដែលមមាញឹករាល់ថ្ងៃទើបមិនអាចងាកមកវិញបាន ។ ចិត្តស្រឡាញ់ដដែលបើមានពេលនាងខ្ញុំនឹងផលិតចម្រៀងខ្លួនឯងបង្ហោះតាមយូធូប ខ្លះៗដើម្បីឱ្យ មិត្តអ្នកគាំទ្របានស្តាប់កម្សាន្ត ។ ម្យ៉ាងនាងខ្ញុំឡើងសាច់ធាត់ជាងមុនផង កាន់តែមិនចង់ ដោយទុកឲ្យ ប្អូនៗរលកក្រោយប្រឹងប្រែងសាងឈ្មោះសិល្បៈម្តង ដើម្បីលើកស្ទួយបន្តទៀត »។
ទោះជាយ៉ាងណាក្តីផាន់ ម៉ូនីកា និយាយថានាងនឹងយកពេលជួយសង្គមផ្នែកសប្បុរសធម៌ ដូចជាជួយជនក្រីក្រ ជួយអ្នកសិល្បៈទីទ័លដើម្បីលើកទឹកចិត្តគ្នាដោយធ្វើបែបនេះគឺនាងមានអារម្មណ៍រីករាយជាទីបំផុត ៕ (កែសម្រួលដោយ ៖ បុប្ផា)
ចែករំលែកព័តមាននេះ