ខេត្តព្រៃវែង ៖ នៅស្រុកកំណើតឯខេត្តព្រៃវែង ក្រុមគ្រួសារបាននាំគ្នាជួលអាចារ្យព្លុក និងសង់រោងបុណ្យរួចជាស្រេច ដើម្បីចាំទទួលសពកូនដែលរងគ្រោះជាប់នៅក្រោមគំនរអគារដែលបាក់រលំកាលពីប៉ុន្មានថ្ងៃមុន នៅឯខេត្តព្រះសីហនុ ដោយម្នាក់ៗគិតថា ជនរងគ្រោះមិនអាចនៅមានជីវិតនោះទេ ព្រោះជាប់នៅក្រោមគំនរថ្ម២-៣ថ្ងៃទៅហើយ ។
នៅទីបំផុត ពិធីបុណ្យសពក៏ប្រែជាខក ខាន ហើយរោងបុណ្យសពត្រូវបានរុះចេញវិញ ជំនួសដោយសំឡេងសើចសប្បាយលាយឡំនឹងក្តីរំភើបឥតឧបមា រហូតអួលដើមកនិយាយមិនចេញ ដោយសារតែម្ចាស់ដើមបុណ្យម្តាយកម្មករវ័យក្មេង កាក់ គា បានទទួលដំណឹងថា កូន ប្រុសរបស់គាត់នៅមានជីវិត មិនទាន់ស្លាប់ទេ ។
កម្មករដែលរងគ្រោះ ជាប់នៅក្រោមគំនរបាក់បែកនៃសំណង់អគារកម្ពស់៧ជាន់ដែលរលំនោះ ត្រូវបានក្រុមអ្នករុករកប្រទះឃើញ នារសៀលថ្ងៃទី២៤ ខែមិថុនា និងបាននាំយកទៅកាន់មន្ទីរពេទ្យខេត្តភ្លាមៗដើម្បីជួយសង្គ្រោះ ។
ព័ត៌មាននេះ បានបញ្ជូនទៅប្រាប់ក្រុមគ្រួសារសាច់ញាតិរបស់ជនរងគ្រោះទាំង២នាក់ នាល្ងាចថ្ងៃដដែល ខណៈដែលឪពុកម្តាយជនរងគ្រោះ កំពុងរៀបចំធ្វើរោងបុណ្យចាំទទួលសពកូនទៅហើយ ធ្វើឱ្យទាំងឪពុកម្តាយ និងសាច់ញាតិជនរងគ្រោះទាំងអស់ ម្នាក់ៗរំភើបរហូតនិយាយលែងចេញ។
រោងបុណ្យសពដែលធ្វើខក ត្រូវបានសង់ឡើងនៅនឹងផ្ទះជនរងគ្រោះទាំង២នាក់ ដែលទី១-ស្ថិតនៅក្នុងភូមិក្រូច ឃុំកន្សោមអក ស្រុកកំពង់ត្របែក ធ្វើឡើងដើម្បីចាំទទួលសពជនរងគ្រោះឈ្មោះ រស់ ស៊ីថា ហើយត្រូវបានរំសាយទៅវិញនៅល្ងាចថ្ងៃដដែល ។
ឯរោងទី២ ស្ថិតនៅភូមិត្រពាំងស្រែ ឃុំស្តៅកោង ស្រុកបាភ្នំ ធ្វើឡើងចាំទទួលសពជនរងគ្រោះឈ្មោះ កាក់ គា អាយុ១៨ឆ្នាំ និងបានរំសាយទៅវិញនៅល្ងាចថ្ងៃដដែលនោះដែរ ។
ចែករំលែកព័តមាននេះ