រាជធានីភ្នំពេញ ៖ កម្ពុជាត្រៀមធ្វើជាម្ចាស់ផ្ទះប្រកួតកីឡាហែលទឹកជ្រើសរើសជើងឯកយុវជនអាស៊ីអាគ្នេយ៍ លើកទី៤៣ ឆ្នាំ២០១៩ដែលនឹងប្រព្រឹត្តទៅនៅពហុកីឡដ្ឋានមរតកតេជោ ចាប់ពីថ្ងៃទី២៨-៣០ មិថុនា។ លោក ហែម គីរី…
រាជធានីភ្នំពេញ ៖ កម្ពុជាត្រៀមធ្វើជាម្ចាស់ផ្ទះប្រកួតកីឡាហែលទឹកជ្រើសរើសជើងឯកយុវជនអាស៊ីអាគ្នេយ៍ លើកទី៤៣ ឆ្នាំ២០១៩ដែលនឹងប្រព្រឹត្តទៅនៅពហុកីឡដ្ឋានមរតកតេជោ ចាប់ពីថ្ងៃទី២៨-៣០ មិថុនា។
លោក ហែម គីរី អគ្គលេខាធិការសហព័ន្ធខ្មែរកីឡាហែលទឹកបានឱ្យដឹងថា ការប្រកួតនេះធ្វើឡើងដោយមានបណ្ដាប្រទេសនៅក្នុងតំបន់អាស៊ីអាគ្នេយ៍ចំនួន១១ចូលរួម សរុបអត្តពលិកមានចំនួន៤០៦នាក់ក្នុងនោះកីឡាការិនីមានចំនួន២៩០នាក់ ។ លោកបន្តថា ព្រឹត្តិការណ៍នេះធ្វើឡើងក្នុងក្របខណ្ឌអាយុចាប់ពី១៣ដល់១៨ឆ្នាំមានរយៈពេល៣ថ្ងៃ ។
ថ្ងៃទី១មានវិញ្ញាសាហែលរបៀបសេរីផ្នែកនារីអាយុក្រោម១៨ឆ្នាំចម្ងាយ១០០x៤, វិញ្ញាសាហែលសេរីបុរស-នារីអាយុ១៦-១៨ឆ្នាំចម្ងាយ៤០០ម៉ែត្រ និងវិញ្ញាសាហែលសេរីបុរសអាយុ១៤-១៥ឆ្នាំចម្ងាយ៤០០ម៉ែត្រ។ ថ្ងៃទី២មានវិញ្ញាសាហែលរបៀបសេរីផ្នែកនារីចម្ងាយ៤០០ម៉ែត្រ អាយុ១៤-១៥ឆ្នាំ ហែលសេរីផ្នែកបុរស-នារីអាយុក្រោម១៣ឆ្នាំចម្ងាយ៤០០ម៉ែត្រ និងហែលរបៀបកង្កែបផ្នែកបុរសអាយុ១៦-១៨ឆ្នាំ។
ថ្ងៃទី៣ដែលជាថ្ងៃចុងក្រោយ មានវិញ្ញាសា ហែលកង្កែបចម្ងាយ៥០ម៉ែត្រទាំងអស់ ដែលមានផ្នែកបុរសអាយុក្រោម១៣ឆ្នាំ អាយុ១៤-១៥ឆ្នាំ និងផ្នែកនារីអាយុ១៤-១៥ឆ្នាំនិងអាយុ១៦-១៨ឆ្នាំ។
មន្ត្រីសហព័ន្ធកីឡាហែលទឹករូបនេះបានបន្តទៀតថា សម្រាប់ការទទួលធ្វើជាម្ចាស់ផ្ទះប្រកួតកីឡាហែលទឹកជ្រើសរើសជើងឯកយុវជនអាស៊ីអាគ្នេយ៍លើកទី៤៣លើកនេះ កម្ពុជាក៏បានត្រៀមលក្ខណៈគ្រប់គ្រាន់ដើម្បីបម្រើដល់ការប្រកួតឱ្យមានលក្ខណៈស្តង់ដា ។ ម្យ៉ាងវិញទៀត ការប្រកួតនេះគឺជាឱកាសដ៏ល្អមួយសម្រាប់កម្ពុជា ឆ្ពោះទៅស៊ីហ្គេមលើកទី៣២ឆ្នាំ២០២៣ផងដែរ។ វាជាពេលវេលាដ៏សំខាន់បំផុតក្នុងការជំរុញដល់កីឡាករថ្នាលក្នុងការស្វែងរកនូវបទពិសោធន៍បន្ថែមទៀត ៕ (កែសម្រួលដោយ ៖ បុប្ផា)
ចែករំលែកព័តមាននេះ