វាជារឿងធម្មតាដែលមនុស្សជាច្រើនចង់សម្រេចគោលដៅដែលពួកគេបានកំណត់កាលពីដើមឆ្នាំឲ្យបានឆាប់ៗ ជាពិសេសនៅពេលដែលគោលដៅរបស់យោងពាក់ព័ន្ធទៅនឹងការបង្កើនប្រាក់ចំណូល ឬការចាប់ផ្តើមរកប្រាក់ចំណូល ។ ប៉ុន្តែមិនមែនមនុស្សគ្រប់គ្នាមានពេលវេលាដើម្បីស្វែងរកការងារក្រៅម៉ោងបន្ថែមទេ ជាពិសេសដូចជានិស្សិតជាដើមដែលត្រូវចំណាយពេលអង្គុយក្នុងថ្នាក់រៀនអស់ជាច្រើនម៉ោងក្នុងមួយថ្ងៃ ។ យ៉ាងណាក្តីមានការងារលើអ៊ីនធើណិតជាច្រើនដែលអនុញ្ញាតឲ្យយើងរកប្រាក់ចំណូលដោយមិនចាំបាច់ចេញពីផ្ទះ ។ ខាងក្រោមនេះ គឺជាការងារមួយចំនួនដែលអាចជួយឲ្យអ្នករកប្រាក់ចំណូលក្រៅបានដោយងាយ ៖
១. ការបង្រៀនគួរតាមអ៊ីនធើណែត
បច្ចុប្បន្ននេះការបង្រៀនមិនចាំបាច់ត្រូវការឲ្យអ្នកមានសញ្ញាប័ត្របញ្ជាក់ទេ អ្នកអាចរកប្រាក់ចំណូលបានដោយគ្រាន់តែបង្រៀនអ្នកដទៃពីអ្វីដែលអ្នកមានជំនាញលើ ឬអ្នកមានចំណេះដឹងច្រើនលើ ។ ជម្រើសនេះ គឺល្អបំផុតសម្រាប់អ្នកដែលចេះភាសាអង់គ្លេស ឬភាសាបរទេសដទៃទៀត ព្រោះមានគេហទំព័រជាច្រើនដែលកំពុងស្វែងរកគ្រួបង្រៀនភាសាបរទេសក្រៅម៉ោងដូចជា VIPKID និង Educaton First ជាដើម ។
សិស្សពូកែផ្សេងៗក៏អាចចាប់ផ្តើមរកប្រាក់ចំណូលបានដែរ ដោយគ្រាន់តែត្រូវការឲ្យពួកគេចំណាយពេលវេលា ដើម្បីផ្សព្វផ្សាយពីសេវាកម្មរបស់ខ្លួន ។ វាក៏ជាឱកាសសម្រាប់សិស្ស និងនិស្សិតក្នុងការរំលឹកមេរៀន និងចែករំលែកចំណេះដឹងជាមួយអ្នកដទៃដែលមិនអាចតាមទាន់ក្នុងថ្នាក់ដែរ ។
២. ធ្វើជាអ្នកដឹកជញ្ជូន
ក្នុងសម័យដែលមនុស្សជាច្រើនចូលចិត្តការទិញទំនិញតាមប្រព័ន្ធសង្គមដូចជា Facebook និង Instagram នេះតែងតែមានតម្រូវការអ្នកដឹកជញ្ជូនទំនិញហើយ ។ នេះជាមូលហេតុដែលបង្កឲ្យមានក្រុមហ៊ុនតូចៗជាច្រើនចាប់ផ្តើមបង្កើតអាជីវកម្មផ្តល់សេវាដឹកជញ្ជូនទូទាំងខេត្ត និងក្រុង ។
ប្រសិនបើអ្នកមិនមានទុនគ្រប់គ្រាន់ក្នុងការបើកអាជីវកម្មដោយខ្លួនឯងទេ នោះ អ្នកក៏អាចធ្វើជាអ្នកដឹកជញ្ជូនបានដែរ ។ វាមិនតម្រូវឲ្យអ្នកធ្វើការពេញម៉ោង ហើយអ្វីដែលអ្នកត្រូវចេះ គឺបើកបរម៉ូតូ និងស្គាល់ទីតាំងសំខាន់ៗក្នុងទីក្រុងតែប៉ុណ្ណោះ(អ្នកក៏អាចប្រើ Google Maps ដែរប្រសិនបើអ្នកមិនស្គាល់ច្បាស់) ។
៣. ផ្តល់សេវាកម្មថតវីឌីអូ
ប៉ុន្មានឆ្នាំថ្មីៗកន្លងមកនេះមើលឃើញមានកំណើននៃអាជីវកម្ម និងស្ថាប័ននានាដែលប្រើវិឌីអូដើម្បីផ្សព្វផ្សាយពីផលិតផល ឬសារសំខាន់ណាមួយលើប្រព័ន្ធសង្គម ព្រោះតែមនុស្សជាច្រើនប្រើប្រាស់ប្រព័ន្ធសង្គម ហើយវីឌីអូ គឺជាវិធីដែលងាយជាងគេក្នុងការបង្ហាញសារដែលមនុស្សគ្រប់គ្នាអាចយល់បាន។
ប្រសិនបើអ្នកមានសមត្ថភាពក្នុងការថតវិឌីអូដែលមានគុណភាពខ្ពស់នោះ អ្នកមិនខ្វះតម្រូវការសម្រាប់សេវាកម្មរបស់អ្នកឡើយ ៕
ចែករំលែកព័តមាននេះ