ខេត្តកំពង់ចាម ៖ កុមារាកុមារីនៅតាមបណ្តាខេត្តមាន ត្បូងឃ្មុំ ព្រៃវែង ក្រចេះ កំពង់ធំ ត្រូវបានបញ្ជូនមកសម្រាកព្យាបាលនៅមន្ទីរពេទ្យខេត្ត ដោយកើតជំងឺគ្រុនឈាមក្នុងនោះមនុស្សចាស់ក៏មានដែរ ។…
ខេត្តកំពង់ចាម ៖ កុមារាកុមារីនៅតាមបណ្តាខេត្តមាន ត្បូងឃ្មុំ ព្រៃវែង ក្រចេះ កំពង់ធំ ត្រូវបានបញ្ជូនមកសម្រាកព្យាបាលនៅមន្ទីរពេទ្យខេត្ត ដោយកើតជំងឺគ្រុនឈាមក្នុងនោះមនុស្សចាស់ក៏មានដែរ ។ គ្រែដេកនៅជាន់ក្រោម និងជាន់លើពេញអស់ដោយបានដាក់ហៀរនៅអគារខាងក្រោយរហូតចូលខ្ទង់រយនាក់ ។ តាមការសង្កេតពីមួយខែទៅមួយខែជំងឺនេះហាក់ដូចមិនមានការថមថយនោះទេ គឺមានការកើនឡើងជាលំដាប់ផងដែរ ។
លោកសាស្ត្រាចារ្យ យិន ស៊ីណាត ប្រធានមន្ទីរពេទ្យខេត្តកំពង់ចាមមានប្រសាសន៍ឲ្យដឹងនៅរសៀលថ្ងៃទី២៥ មិថុនានេះថា ផ្អែកតាមតួរលេខនៅក្នុងខែមករា មានជំងឺគ្រុនឈាមចំនួន២៧នាក់ ខែកុម្ភៈ ចំនួន២២នាក់ ខែមីនាចំនួន៣៩នាក់ ខែមេសាចំនួន៧២នាក់ ខែឧសភាចំនួន១៥៥នាក់ នៅដើមឆ្នាំ២០១៩នេះ បើតាមតូរលេខបណ្តោះអាសន្នក្នុងខែមិថុនា អាចមានរហូតដល់ទៅជាង៤០០ករណី។ លោកសាស្ត្រាចារ្យ យិន ស៊ីណាត មានប្រសាសន៍បន្តថា ដោយសារមើលឃើញពីកំណើនជំងឺគ្រុនឈាមមានការកើនឡើងគួរឲ្យព្រួយបារម្ភនោះទើបនៅថ្ងៃទី២៥ មិថុនា ២០១៩ ដោយមានការណែនាំពីលោកប្រធានមន្ទីរសុខាភិបាលខេត្តបានហៅមន្ត្រីបម្រើការងារនៅតាមមន្ទីរពេទ្យមកពីបណ្តាស្រុកក្រុងក្នុងខេត្តកំពង់ចាមមកទទួលការបណ្តុះបណ្តាលបំប៉នចំណេះដឹងបន្ថែម ពីបច្ចេកទេសក្នុងការព្យាបាលអ្នកជំងឺគ្រុនឈាម ដែលមករកសេវាព្យាបាលនៅតាមមណ្ឌលសុខភាព និងមន្ទីរពេទ្យបង្អែកស្រុកឲ្យមានប្រសិទ្ធភាពមានការជឿទុកចិត្តជាសះស្បើយត្រឡប់ទៅផ្ទះវិញ ។
ជំងឺគ្រុនឈាមមិនមែនកើតឡើងតែចំពោះក្មេងៗនោះទេ សូម្បីតែមនុស្សចាស់ចំនួនជាង១០ករណីត្រូវបានមកសម្រាកព្យាបាលនៅមន្ទីរពេទ្យខេត្តមិនមានបង្កគ្រោះថ្នាក់ដល់ជីវិតនោះទេ ហើយកាលពីខែឧសភាកន្លងទៅ មានក្មេងចំនួន២នាក់បានស្លាប់ផងដែរ ។ លោកសាស្ត្រាចារ្យ យិន ស៊ីណាត ប្រធានមន្ទីរពេទ្យខេត្តមានប្រសាសន៍បន្ថែមថា បើប្រៀបធៀបរយៈពេលចំនួន៥ខែដូចគ្នានឹងឆ្នាំ២០១៨ កន្លងទៅជំងឺគ្រុនឈាមចំនួន៣១៣ករណី មានការកើនឡើងរហូតដល់ទៅជាង១០០ករណី ។ ប្រសិនបើមានកូនចៅរស់នៅតំបន់ឆ្ងាយក្នុងករណីប្រើប្រាស់ថ្នាំបញ្ចុះកំដៅមិនចុះក្នុងរយៈពេល២ទៅ៣ថ្ងៃ មេត្តាប្រញាប់នាំកូនមករកសេវាមណ្ឌលសុខភាព ឫមន្ទីរពេទ្យនៅកៀកបំផុត ដើម្បីជួសឈាមមើលសង្ស័យក្រែងមានជំងឺគ្រុនឈាម ។
ដោយសារតែសន្ទុះជំងឺគ្រុនឈាមចូលមកសម្រាកព្យាបាលនៅមន្ទីរពេទ្យខេត្តកំពង់ចាម មានការកើនឡើងជាលំដាប់នោះរហូតដល់ទៅពង្រីកអគារនៅផ្នែកខាងក្រោយបន្ថែម ហើយការព្យាបាលនូវតែមានគុណភាពដដែល ហើយកំពុងតែជួបកង្វះខាតសេរ៉ូម សម្រាប់គ្រុនឈាមផងដែរ ។សូមឲ្យមាតាបិតាត្រូវចេះសំអាតបរិស្ថានជុំវិញផ្ទះឲ្យបានស្អាតកុំឲ្យមានសំបកដូង សំបកកំប៉ុង សំបកកង់រថយន្តដែលជាជំរកមូសខ្លាពងបង្កកំណើត ត្រូវប្រមូលដុតចោលឫជីកដីកប់ ៕ កែសម្រួលដោយ ៖ សុឃាក់
ចែករំលែកព័តមាននេះ