រាជធានីភ្នំពេញ ៖ បុរសម្នាក់ដែលស្រវឹងស្រា និងពាក់ព័ន្ធសារធាតុញៀន ហើយដេញវាយ និងគប់គេឯង ព្រោះខឹងថតរូប ក្នុងហេតុការណ៍គ្រោះថ្នាក់ចរាចរណ៍មួយ ដែលពោរពេញទៅដោយកម្លាំង សូម្បីប្រពន្ធឃាត់មិនស្តាប់ផងនោះ…
រាជធានីភ្នំពេញ ៖ បុរសម្នាក់ដែលស្រវឹងស្រា និងពាក់ព័ន្ធសារធាតុញៀន ហើយដេញវាយ និងគប់គេឯង ព្រោះខឹងថតរូប ក្នុងហេតុការណ៍គ្រោះថ្នាក់ចរាចរណ៍មួយ ដែលពោរពេញទៅដោយកម្លាំង សូម្បីប្រពន្ធឃាត់មិនស្តាប់ផងនោះ កាលពីព្រឹកថ្ងៃទី២៥ ខែមិថុនា ត្រូវបានសមត្ថកិច្ចនគរបាលខណ្ឌមានជ័យ បញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់ហើយ ។
បុរសនោះខាងលើមាន ឈ្មោះ ជួន ច័ន្ទដារី អាយុ៣៤ឆ្នាំ ស្នាក់នៅផ្ទះលេខ៥C ផ្លូវជាតិលេខ៤ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ នៅពេលចូលដល់តុលាការហាក់ដូចជាលែងខ្លាំងហើយ។
គួរបញ្ជាក់ថា បុរសរូបនោះត្រូវកម្លាំង សមត្ថកិច្ចនគរបាលខណ្ឌមានជ័យ ចាប់ខ្លួនកាលពីម៉ោង៩និង៤៥នាទីព្រឹកថ្ងៃទី២៣ ខែមិថុនា ខណៈរូបគេបង្កការអុកឡុក ស្រែកឡូឡា ដេញវាយនគរបាលចរាចរណ៍ដែលឈរគោលដៅ និងដេញវាយអ្នកកាសែតពេញផ្លូវ ពេលនគរបាលឃាត់រថយន្តឱ្យឈប់ ដើម្បីត្រួតពិនិត្យចរាចរនៅចំណុចភ្លើងស្តុបច្រមុះជ្រូកក្បាលថ្នល់ ស្ថិតក្នុងសង្កាត់ចាក់អង្រែលើ ខណ្ឌមានជ័យ ។ ហើយមុនកើតហេតុបុរសនេះ បានបើករថយន្តម៉ាកកាមរី ពណ៌ខ្មៅ ពាក់ស្លាកលេខភ្នំពេញ ២AB-៧៦៩១ មួយគ្រឿងតែម្នាក់ឯងតាមបណ្តោយផ្លូវលេខ ២៧១ រ៉េចង្កូតពេញផ្លូវ ឃើញដូច្នោះកម្លាំងសមត្ថកិច្ចនគរបាលចរាចរណ៍បានហៅឱ្យឈប់ដើម្បីសាកសួរ ។
ស្រាប់តែបុរសម្នាក់នោះចុះពីលើរថយន្តស្រែកឡូឡាដេញវាយគេឯងធ្វើឲ្យមានការភ្ញាក់ផ្អើល តែមិនបង្កឱ្យនរណាម្នាក់រងរបួសទេ ។ ក្នុងពេលនោះដែរ មានស្ត្រីដែលជាប្រពន្ធក៏ទៅដល់កន្លែងកើតហេតុ និងឃើញប្តីបញ្ចេញសកម្មភាពបែបនេះ ក៏បានជួយចាប់ និងហាមឃាត់ប្តីដែរ តែគេមិនស្តាប់ទៀតផង ។
ដោយមើលឃើញចរាចរកាន់តែកកស្ទះ កម្លាំងសមត្ថកិច្ចនគរបាលខណ្ឌមានជ័យ ចុះធ្វើអន្តរាគមន៍ជាបន្ទាន់ និងចាប់ឃាត់ខ្លួនបុរសនោះនាំទៅកាន់អធិការដ្ឋានដើម្បីធ្វើការសាកសួរ ។ នៅពេលសាកសួរទើបដឹងថា បុរសរូបនេះជាមនុស្ស ធ្លាប់ប្រើប្រាស់គ្រឿងញៀន ទើបបានជានៅពេលមានអាការៈផ្ទុះកំហឹងម្តងៗ ខឹងគេដូចកម្រោលចូលបែបនេះ ទោះយ៉ាងណាពេលចូលដល់តុលាការស្លូតលែងនិយាយស្តី ។
គួរបញ្ជាក់ទៀតថា ៖ មិនធម្មតាទេបុរសរូបនេះ បង្កឱ្យភ្ញាក់ផ្អើលយ៉ាងខ្លាំងនៅភ្លើងស្តុបច្រមុះជ្រូកក្បាលថ្នល់ (វីដេអូ)
(កែសម្រួលដោយ ៖ បុប្ផា)
ចែករំលែកព័តមាននេះ