យើងធ្លាប់តែលឺថាមានគម្រោងជាច្រើន កំពុងតែលើកឡើងថា នឹងយកអាគុយរថយន្តអគ្គិសនីចាស់ៗមកប្រើប្រាស់ឡើងវិញ ដើម្បីបំភ្លឺផ្ទះនិងភ្លើងតាមដងផ្លូវ។ តែពេលនេះ ក្រុមហ៊ុនរបស់អាមេរិកគ្រោងយកអាគុយទាំងនោះមកផ្គត់ផ្គង់អគ្គិសនីពេញមួយស្តាតទាត់បាល់តែម្តង។
ក្រុមហ៊ុនយក្សថាមពលអេតុន (Eaton) កំពុងតែប្រើប្រាស់ប្រព័ន្ធ xStorage របស់ខ្លួនរួចហើយ ដើម្បីផ្គត់ផ្គង់ថាមពលអគ្គីសនីសម្រាប់កីឡដ្ឋាន Johann Cruyff Arena ដែលជាកន្លែងពហុកីឡដ្ឋានអាចផ្ទុកអ្នកទស្សនាបានដល់ទៅ៥៥០០០នាក់។ បច្ចុប្បន្ននេះ ក្រុមហ៊ុនកំពុងចរចាជាមួយកីឡដ្ឋាន៦ផ្សេងទៀតនៅទ្វីបអឺរ៉ុប ដើម្បីពង្រីកប្រព័ន្ធរបស់ខ្លួន។ នេះគឺជាការរាយការណ៍ពី Reuters នៅសប្តាហ៍នេះ។
នៅពេលដែលអាគុយរបស់រថយន្តអគ្គិសនីចាស់ទៅ វាមិនអាចផ្គត់ផ្គង់ដល់រថយន្តបានទេ។ តែវាអាចយកមកប្រើប្រាស់ជាមួយនឹងអ្វីៗផ្សេងទៀតរហូតបានដល់ទៅ១០ឆ្នាំខាងមុខទៀត។
ជាមួយនឹងការលក់រថយន្ដអេឡិចត្រូនិចដែលកំពុងកើនឡើង ការស្វែងរកមធ្យោបាយប្រើប្រាស់ថាមពលអេឡិចត្រូនិច កំពុងក្លាយជាអាជីវកម្មរីកចម្រើនមួយជាមួយនឹងក្រុមហ៊ុនអេតុន ដែលធ្វើឱ្យក្រុមហ៊ុននេះមានការជឿទុកចិត្តលើផែនការរបស់ខ្លួន ក្នុងការអនុវត្តនៅស្តាតផ្សេងៗទៀត។
ក្រុមហ៊ុនដែលមានមូលដ្ឋាននៅរដ្ឋអូហៃយ៉ូ បាននិយាយថា ដំណោះស្រាយ xStorage របស់ខ្លួន ដែលប្រើអាគុយប្រភេទ lithium-ion ពីរថយន្ត Leaf របស់ Nissan អាចជួយសន្សំសំចៃថ្លៃចំណាយរបស់អតិថិជនដល់ទៅ២០% បើប្រៀបធៀបទៅនឹងអាគុយថ្មី ។
យោងតាមប្រភពព័ត៌មានថ្មីៗនេះ ការរៀបចំនៅឯ Johann Cruyff Arena អាចផ្តល់ថាមពលយ៉ាងពេញលេញដល់ទីលានមួយម៉ោង ក្នុងកំឡុងព្រឹត្តិការណ៍សំខាន់មួយឬបីដង បើសិនជាឧបករណ៍ដូចជាគ្រឿងបរិក្ខារផ្ទះបាយត្រូវបានផ្តាច់ចេញពីប្រព័ន្ធ។
ប្រព័ន្ធ xStorage របស់បានប្រើប្រាស់អាគុយចាស់ៗចំនួន២៥០អាគុយ និង អាគុយថ្មីៗចំនួន៣៤០អាគុយ ដែលសុទ្ធតែយកមកពី Nissan ទាំងអស់។ ក្រុមហ៊ុន Renault និង BMW ក៏កំពុងស្វែងរកមធ្យោបាយផ្សេងៗ ដើម្បីអាចឱ្យអាគុយរថយន្តរបស់ខ្លួន អាចយកទៅប្រើប្រាស់ពេលចាស់ទៅផងដែរ៕
ប្រភព ៖ digitaltrends , កែសម្រួលដោយ ៖ សំណាង
ចែករំលែកព័តមាននេះ