រាជធានីភ្នំពេញ ៖ រដ្ឋមន្ត្រីក្រសួងសុខាភិបាលលោកម៉ម ប៊ុនហេង បានជំរុញឲ្យប្រធានមន្ទីរគ្រប់រាជធានី -ខេត្ត បង្កើនការយកចិត្តទុកដាក់ប្រើប្រាស់រថយន្ដគ្លីនិកចល័តចុះផ្ដល់សេវាសុខាភិបាលជូនពលរដ្ឋនៅតាមមូលដ្ឋានឲ្យបានត្រឹមត្រូវ ។ ការជំរុញរបស់លោករដ្ឋមន្ត្រីក្រសួងសុខាភិបាលនេះ បន្ទាប់ពីមានករណីរថយន្តសង្គ្រោះបន្ទាន់មួយចំនួនមានទាំងគ្លីនិកឯកជន និងរថយន្តសង្គ្រោះបន្ទាន់របស់រដ្ឋមិនសូវអើពើរចំពោះអ្នកជំងឺដែលជួបគ្រោះថ្នាក់ ពិសេសនោះអ្នកក្រីក្រ កាលពីពេលកន្លងមក ។
យោងតាមលិខិតរបស់រដ្ឋមន្ត្រីក្រសួងសុខាភិបាលផ្ញើជូនលោក លោកស្រីប្រធានមន្ទីរសុខាភិបាលរាជធានី-ខេត្ត កាលពីថ្ងៃទី១៩ ខែមិថុនា ឆ្នាំ២០១៩ បានឲ្យដឹងថា ក្រសួងសុខាភិបាលបានបែងចែករថយន្តគ្លីនិកចល័ត (Mobile clinic) ដែលជាជំនួយឥតសំណងរបស់សាធារណៈប្រជាមានិតចិនជូនមន្ទីរសុខាភិបាលរាជធានីខេត្តសម្រាប់ប្រើប្រាស់ក្នុងការផ្ដល់សាវាសុខាភិបាលជូនប្រជាពលរដ្ឋនៅតាមមូលដ្ឋាន ។
ប្រភពបានគូសបញ្ជាក់ថា «ដើម្បីបង្កើនប្រសិទ្ធភាពក្នុងការផ្តល់សេវាឲ្យកាន់តែខិតជិតប្រជាពលរដ្ឋ ក្រសួងសុខាភិបាលស្នើដល់លោក លោកស្រីប្រធានចាត់ចែងរៀបចំប្រើប្រាស់រថយន្ដគ្លីនិកចល័តចុះពិនិត្យព្យាបាលជំងឺជូនប្រជាពលរដ្ឋទៅតាមពេលវេលាសមស្របរបស់មន្ទីរសុខាភិបាល រាជធានី-ខេត្តនីមួយៗ ហើយត្រូវយកចិត្តទុកដាក់ពិនិត្យ ថែទាំរថយន្ដ និងសម្ភារបរិក្ខាពេទ្យក្នុងរថយន្ដជាប្រចាំស្របតាមលក្ខណៈបច្ចេកទេស» ៕ កែសម្រួលដោយ ៖ សុឃាក់
ចែករំលែកព័តមាននេះ