រាជធានីភ្នំពេញ៖ ថ្នាក់ដឹកនាំក្រសួងកសិកម្ម រុក្ខាប្រមាញ់និងនេសាទបានឲ្យដឹងថាកម្ពុជាបានចាប់ផ្តើមចរចាបើកទីផ្សារនាំចេញផ្លែស្វាយជាមួយប្រទេសនានា ក្នុងនោះជាមួយប្រទេសកូរ៉េបានសម្រេចតាំងពីថ្ងៃទី៨ ខែធ្នូ ឆ្នាំ២០១៥ មកម្លេះ ក៏ប៉ុន្តែដោយសារបញ្ហាមួយចំនួនធំបានរារាំងមិនអាចនាំចេញទៅទីផ្សារកូរ៉េបាន ។
ដោយមើលឃើញពីសក្តានុពលនៃការនាំចេញផ្លែស្វាយកម្ពុជាទៅកនា់ទីផ្សារបរទេសនោះ អគ្គនាយកដ្ឋានកសិកម្មបានចាប់ផ្តើមចរចាបើកទីផ្សារជាមួយប្រទេសនានា រួមមាន ប្រទេសកូរ៉េៈ បានសម្រេចតាំងពីថ្ងៃទី៨ ខែធ្នូ ឆ្នាំ២០១៥ ប៉ុន្តែកង្វះខាតហេដ្ឋារចនាសម្ព័ន្ធរូបវន្តម៉ាស៊ីនកម្ចាត់រុយចោះផ្លែដោយប្រើចំហាយទឹកក្តៅ គ្រប់គ្រងហានិភ័យ ដែលមិនអាចនាំចេញបានភ្លាមៗ។ នេះបើយោងតាមរបាយការណ៍របស់ក្រសួងកសិកម្ម រុក្ខាប្រមាញ់និងនេសាទ បបានឲ្យដឹងថាចេញផ្សាយកាលពីថ្ងៃទី ២២ ខែមិថុនាកន្លងទៅ។ ប្រភពដដែលបានបញ្ជាក់ថា ថ្មីៗនេះក្រុមហ៊ុន Hyundai Agro បានបញ្ចប់ការតម្លើងម៉ាស៊ីនកម្ចាត់រុយចោះផ្លែស្វាយដោយប្រើចំហាយទឹកក្តៅរួចរាល់ហើយកាលចុងខែមីនា ឆ្នាំ២០១៩ ។ «មន្ត្រីជំនាញនៃទីភ្នាក់ងារអនាម័យ និងភូតគាមអនាម័យកូរ៉េ ក៏បានចុះវាយតម្លៃកសិដ្ឋានចម្ការស្វាយនិងកន្លែងធ្វើប្រព្រឹត្តិកម្មអនាម័យសម្លាប់សមាសភាពចង្រៃដោយចំហាយទឹកក្តៅ ដើម្បីនាំចេញផ្លែស្វាយស្រស់កម្ពុជាទៅកាន់ប្រទេសកូរ៉េរបស់ក្រុមហ៊ុន Hyundai Agro។
ដូច្នេះតាមការរំពឹងទុក ក្រុមហ៊ុនមានផែនការនាំចេញផ្លែស្វាយស្រស់ពីកម្ពុជាទៅកូរ៉េលើកទី១ក្នុងខែតុលា ឆ្នាំ២០១៩ ខាងមុខនេះ»។ របាយការណ៍បានបញ្ជាក់ ។ ជាមួយគ្នានេះផងដែរ គេសង្កេតឃើញថាបច្ចុប្បន្ននេះប្រជាកសិករនៅតាមបណ្តាខេត្តមួយចំនួនដែលពីមុនមិនធ្លាប់មានការដាំដុះស្វាយ បានងាកមកធ្វើការដាំដុះស្វាយហើយគិតមកដល់សព្វថ្ងៃនេះកម្ពុជាមានផ្ទៃដីដាំស្វាយប្រមាណជាង៨ម៉ឺនហិកតា អាចប្រមូលផលបានក្នុងមួយឆ្នាំបានជាង១លានតោន ។ យោងតាមក្រសួងកសិកម្ម បានឲ្យដឹងថា បច្ចុប្បន្នផ្ទៃដីដាំដុះដំណាំស្វាយនៅទូទាំងប្រទេសកម្ពុជាមានជាង១០ម៉ឺនហិកតា ក្នុងនោះផ្ទៃដីប្រមូលផលមានចំនួន ៨០.១៧១ហិកតា និងទិន្នផលជាមធ្យមទទួលបាន ជាង១៥តោនក្នុងមួយហិកតាក្នុងមួយរដូវ ឬ ១,២តោនក្នុងមួយរដូវហើយការនាំចេញលេចចេញ។
ទាក់ទងនិងទីផ្សារផ្លែស្វាយពិសេសស្វាយកែវរមៀត បើតាមប្រធានសមាគមស្វាយកំពង់ស្ពឺបានឱ្យដឹងថាបន្ទាប់ពីចាប់ផ្តើមប្រមូលផលនិងនាំចេញកាលពីតុលា ឆ្នាំ២០១៨ រហូតមកដល់ពេលនេះខែឧសភាឆ្នាំ២០១៩នេះស្វាយកែវរមៀតខ្មែរបាននាំចេញទៅប្រទេសវៀតណាមសម្រាប់ផ្គត់ផ្គង់ទៅរោងចក្រចំនួន៣បានប្រមាណ១២.០០០តោន តែនៅឆ្នាំក្រោយសមាគមនឹងបង្កើនកុងត្រាឱ្យកើនដល់៥ម៉ឺនតោន រួមទាំងរោងចក្រនៅក្នុងស្រុកនិងរោងចក្រក្រៅស្រុក។ លោក អ៊ិន ឆៃវ៉ាន ប្រធានសមាគមស្វាយកំពង់ស្ពឺបានឱ្យដឹងថា «យើងអត់ហ៊ានទទួលកុងត្រាច្រើនពីរោងចក្រទៅតាមការចង់បានរបស់ពួកគេនោះទេ។ ព្រោះផលិតរបស់យើងពុំទាន់ប្រមូលស្វាយដែលមិនប្រើប្រាស់សារធាតុហាមឃាត់បានចំនួនច្រើននោះទេ បើទោះបីការផលិតរបស់យើងក្នុងមួយឆ្នាំៗវាមានពីចន្លោះ៧០ម៉ឺនតោន ទៅ១លានតោន ក៏ប៉ុន្តែយើងមិនអាចនាំចេញវាទាំងអស់បានទេ ដោយសារតែ៩៥% ជាស្វាយដែលមានសារធាតុហាមឃាត់ ហើយកន្លងមកសមាគមបានធ្វើការផ្សព្វផ្សាយអំពីសារធាតុហាមឃាត់នេះទៅឱ្យប្រជាកសិករបានដឹងអស់រយៈពេល២ទៅ៣ឆ្នាំមកហើយ»។
លោកលើកឡើងថា បច្ចុប្បន្ននេះ នៅគ្រប់បណ្តាខេត្តក្រុងទាំងអស់ប្រជាកសិករ មានភាពកក់ក្តៅក្នុងការដាំស្វាយនេះណាស់។ តួយ៉ាងនៅខេត្តកំពង់ស្ពឺកាលពីឆ្នាំ២០១៨មានតែ៤,៥ម៉ឺនហិកតា តែមកដល់ឥឡូវបានឈានទៅដល់៥ម៉ឺនទៅ៦ម៉ឺនហិកតា។ ការកើនឡើងនៃផ្ទៃដីដាំស្វាយនេះ លោកថាដោយសារប្រជាកសិករយល់ដឹងពីផលចំណេញនៃដំណាំស្វាយ៕ កែសម្រួលដោយ ៖ សុឃាក់
ចែករំលែកព័តមាននេះ