ប្រទេសឥណ្ឌា៖ អាជ្ញាធរមូលដ្ឋានកាលពីថ្ងៃទី២៤ មិថុនា ២០១៩ បានប្រកាសពីតុល្យការថ្មីមួយដោយប្រាប់ថា កុមារជាង១៥០នាក់ហើយបានត្រូវស្លាប់ ដោយសារជំងឺរលាកខួរក្បាលដ៏សាហាវដែលឆ្លងរាតត្បាតក្នុងរដ្ឋក្រីក្រប៊ីហារ នាភាគខាងជើងឥណ្ឌា។
យោងតាមតុល្យការផ្លូវការចុងក្រោយថា កុមារ១៥២នាក់បានត្រូវស្លាប់ដោយសារជំងឺរលាកខួរក្បាលធ្ងន់ធ្ងរ ក្នុងស្រុកនានានៃរដ្ឋប៊ីហារ ក្នុងនោះ១៣១នាក់ក្នុងមន្ទីរពេទ្យ២នៃក្រុងMUZAFFARPUR ជាចំណុចកណ្ដាលនៃបាតុភូតផ្ទុះជំងឺរលាកខួរក្បាល ក្នុងតំបន់ក្រីក្របំផុតនេះដែលកំពុងជួបប្រទះនឹងរលកធាតុអាកាសក្ដៅបំផុត។
យោងតាមការសិក្សាខាងវិទ្យាសាស្ត្រនានាថា ការស្លាប់របស់កុមារទាំងនេះ អាចទាក់ទិននិងជាតិពុលដែលមាននៅក្នុងផ្លែគូលេន ដែលបណ្ដាកុមារគ្មានអាហារគ្រប់គ្រាន់ នាំគ្នាបរិភោគ ហើយវាបំផ្លាញដល់ផលិតកម្មជាតិស្ករក្នុងសរីរាង្គ រួចបណ្ដាលឲ្យមានការខ្វះជាតិស្ករធ្ងន់ធ្ងរក្នុងខ្លួន។
ករណីប្រហាក់ប្រហែលគ្នានោះកើតមានរៀងរាល់ឆ្នាំក្នុងតំបន់នោះ រវាងខែឧសភានិងខែកក្កដា ជាដំណាក់កាលនៃការប្រមួលផលគូលេន ខណៈតំបន់MUZAFFARPURមានចម្ការគូលេនជាច្រើន។ កុមាររងគ្រោះមានគ្រុនក្កៅខ្លាំងយ៉ាងលឿន សន្លប់និងក្អួតខ្លាំង។ ក្នុងករណីជាច្រើនបើគ្មានការព្យាបាលភ្លាមៗឬបន្ទាន់កុមារនឹងត្រូវស្លាប់៕ (កែសម្រួលដោយ ៖ (បុប្ផា)
ចែករំលែកព័តមាននេះ