រាជធានីភ្នំពេញ ៖ លោក ថោង ខុន រដ្ឋមន្ត្រីក្រសួងទេសចរណ៍បានអះអាងថា បន្ទាប់ពីមានការលើកឡើងនូវឱកាសវិនិយោគ ក្នុងវិស័យទេសចរណ៍នៅកម្ពុជារួចមកគណៈប្រតិភូចិនមកពីខេត្តជឺជាំង បានបង្ហាញគោលបំណងចង់មកវិនិយោគ បង្កើតតំបន់ទេសចរណ៍នៅកម្ពុជា…
រាជធានីភ្នំពេញ ៖ លោក ថោង ខុន រដ្ឋមន្ត្រីក្រសួងទេសចរណ៍បានអះអាងថា បន្ទាប់ពីមានការលើកឡើងនូវឱកាសវិនិយោគ ក្នុងវិស័យទេសចរណ៍នៅកម្ពុជារួចមកគណៈប្រតិភូចិនមកពីខេត្តជឺជាំង បានបង្ហាញគោលបំណងចង់មកវិនិយោគ បង្កើតតំបន់ទេសចរណ៍នៅកម្ពុជា ពិសេសសម្រាប់ទេសចរវ័យចំណាស់ ខណៈការតភ្ជាប់ជើងហោះហើរត្រង់ពី ខេត្តមួយនេះត្រូវបានបញ្ជាក់ថា នឹងបើកដំណើរការផ្លូវការនៅក្នុងឆ្នាំ២០១៩នេះ ។
ការលើកឡើងនេះត្រូវបានធ្វើឡើងក្នុងជំនួបពិភាក្សាការងាររវាងលោកថោង ខុន រដ្ឋមន្ត្រី ក្រសួងទេសចរណ៍ជាមួយគណៈប្រតិភូចិនមកពីខេត្តជឺជាំង ដឹកនាំដោយលោក ចាង សឺស្ស៊ី (Zhang Zexi) អនុប្រធានសភាប្រឹក្សាយោបល់ខេត្តជឺជាំង នៅទីស្ដីការក្រសួងទេសចរណ៍ កាលពីពេលថ្មីៗនេះ។
លោករដ្ឋមន្ត្រីថ្លែងថា គណៈប្រតិភូចិនមានការចាប់អារម្មណ៍យ៉ាងខ្លាំងចំពោះឱកាសវិនិយោគបង្កើតតំបន់ទេសចរណ៍ សម្រាប់ទេសចរវ័យចំណាស់នៅកម្ពុជា ដោយលោក ចាង សឺស្ស៊ី បានបញ្ជាក់ថា នៅខេត្តជឺជាំងសម្បូរទៅដោយប្រជាជនច្រើន ហើយនៅឆ្នាំ២០១៨ ទេសចរចិន នៅខេត្តជឺជាំងចេញដើរកម្សាន្តនៅក្រៅប្រទេសមានចំនួន២លាន៨សែននាក់ ក្នុងនោះមកកម្ពុជាប្រមាណ៨ម៉ឺននាក់ ។
លោក ចាង ចង់ អនុប្រធានសភាប្រឹក្សាយោបល់ខេត្តជឺជាំងបានឲ្យដឹងថា ភ្ញៀវទេសចរចិនមកពីខេត្តរបស់លោកនឹងមកទស្សនានៅកម្ពុជាកាន់តែច្រើនឡើងថែមទៀត ហើយនៅពេលរដូវត្រជាក់ម្ដងៗ ពួកគេចូលចិត្តស្នាក់នៅតំបន់លម្ហែរបស់ពួកគេ នៅតំបន់ភាគខាងត្បូង ប្រទេសចិន ដែលមានអាកាសធាតុក្ដៅស្រួល ជាងខេត្តជឺជាំង ។ ងាយស្រួលដល់ភ្ញៀវទេសចរចិនដែលមកទស្សនាប្រទេសកម្ពុជា ។ ដូច្នេះហើយបានជាលោក និងគណៈប្រតិភូមកពិភាក្សាជាមួយភាគីកម្ពុជា ដើម្បីបង្ហាញពី បំណងចង់មកវិនិយោគ ក្នុងការបង្កើតលំនៅដ្ឋានលម្ហែសម្រាប់ទេសចរចិនមកពីទីនោះ។
លោករដ្ឋមន្ត្រី ថោង ខុន ក៏បានបង្ហាញនូវការស្វាគមន៍យ៉ាងខ្លាំង ចំពោះគោលបំណងរបស់ភាគី ចិនខាងលើនេះ ហើយលោកថែមទាំងបានណែនាំពីឱកាសវិនិយោគជាមួយក្នុងវិស័យទេសចរណ៍ ពិសេសគឺការបង្កើតនៅតំបន់មាត់សមុទ្រនៃប្រទេសកម្ពុជា និងតាមបណ្ដោយទន្លេមេគង្គ ដែលហូរកាត់ប្រទេសកម្ពុជាជាង ៤០០គីឡូម៉ែត្រ មានទេសភាពស្រស់ត្រកាល និងអំណោយ ផលដល់ការស្នាក់នៅយូរ និងទស្សនាកម្សាន្តរបស់ភ្ញៀវទេសចរ។
ទន្ទឹមនោះលោកក៏បានស្នើឱ្យភាគីចិននៅខេត្តជឺជាំង ជួយជំរុញការបណ្ដុះបណ្ដាលភាសាចិន ដល់បុគ្គលិកជំនាញទេសចរណ៍ និងមគ្គុទ្ទេសក៍ទេសចរណ៍កម្ពុជា ដែលនិយាយភាសាចិន តាមរយៈការបង្កើតសាលាវិជ្ជាជីវៈជំនាញទេសចរណ៍នៅកម្ពុជា សំដៅសម្រេចឱ្យបាន ចំនួនបុគ្គលិកជំនាញ និងមគ្គុទ្ទេសទេសចរណ៍ ឆ្លើយតបនឹងចំនួន ទេសចរណ៍ ពិសេសទេសចរ ចិនដែលនៅតែកើនឡើងជាលំដាប់។
លោក ថោង ខុន ថែមទាំងបានស្នើឱ្យភាគីចិនជួយជំរុញការតភ្ជាប់ជើងហោះហើរត្រង់ ពីខេត្តជឺជាំង មកកម្ពុជាឱ្យបានឆាប់រហ័សផងដែរ ដើម្បីជំរុញកំណើនទេសចរពីខេត្តមួយនេះ ឱ្យបានកាន់ តែច្រើនឡើង។ ចំណុចនេះត្រូវបានលោក ចាង សឺស្ស៊ី ឆ្លើយតបវិញថា ខេត្តជឺជាំងរបស់លោកក៏បានខិតខំជំរុញការងារនេះដែរ ហើយនៅកំឡុងឆ្នាំ២០១៩នេះ ជើងហោះហើរត្រង់ពី ខេត្តជឺជាំងមកកម្ពុជា នឹងត្រូវដំណើរការឡើងជាផ្លូវការ។
ចំពោះឱកាសវិនិយោគ និងសំណើទាំងអស់របស់ភាគីកម្ពុជា គណៈប្រតិភូរបស់លោក ចាង នឹងពាំនាំយកទៅជម្រាបជូនរដ្ឋាភិបាលចិន និងបន្តពិភាក្សាជាមួយក្រសួង-ស្ថាប័នពាក់ព័ន្ធ ដើម្បីជួយដល់មិត្តកម្ពុជា ៕ កែសម្រួលដោយ ៖ សុឃាក់
ចែករំលែកព័តមាននេះ