រាជធានភ្នំពេញ ៖ ផ្ទះលក់ចាបហួយជនជាតិវៀតណាមម្នាក់ ត្រូវបានឆ្លងចរន្តអគ្គិសនី បណ្តាលឲ្យឆាបឆេះរងការខូចខាតស្ទើរទាំងស្រុង បង្កអោយមានការភ្ញាក់ផ្អើល កាលពីវេលម៉ោង១២និង២៨នាទីរំលងអធ្រាត្រឈានចូលថ្ងៃទី២៥ ខែមិថុនា ឆ្នាំ២0១៩ នៅបុរីអាកាសចរណ៍ទល់មុខប្រលានយន្តហោះអន្តរជាតិភ្នំពេញ ស្ថិតនៅភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ ។
ម្ចាស់ផ្ទះមានឈ្មោះ លី សុខា ហៅក្រៅឈ្មោះ ឡង ភេទស្រី អាយុ៤៣ឆ្នាំ មុខរបរលក់ចាប់ហួយ ជាជនជាតិវៀតណាម ស្នាក់នៅផ្ទះកើតហេតុខាងលើមានប្តីឈ្មោះ គុំ ផាត ហៅក្រៅ តុង អាយុ៤៤ឆ្នាំ មុខរបរជាងសំណង់ ជាជនជាតិវៀតណាម រស់នៅផ្ទះកើតហេតុខាងលើ ។ បើតាមប្រភពព័ត៌មានពីប្រជាពលរដ្ឋនៅជិតកន្លងកើតហេតុបាននិយាយប្រាប់ថា នៅមុនពេលកើតហេតុដោយលឺសំឡេងផ្ទុះខ្សែភ្លើងលាន់ឮសូរ ដូចកាំជ្រួចនឹងអណ្តាតភ្លើងឆាបឆេះភ្លាមៗយ៉ាងសន្ធោសន្ធៅ ។
ចំណែកស្ត្រីជាម្ចាស់ផ្ទះមានឈ្មោះ លី សុខា ហៅក្រៅ ឡង ដែលជា ជនជាតិវៀតណាមបាន បញ្ជាក់ប្រាប់លោកមេប៉ុស្តិ៍ កាកាបទី២បានអោយដឹងថា គាត់នឹងក្រុមគ្រួសាររបស់គាត់ជាជនជាតិវៀតណាមបានជួលផ្ទះខាងលើក្នុងតម្លៃ២៥០ដុល្លារក្នុងមួយខែ ដើម្បីលក់ដូរឥវ៉ាន់ ។ គាត់បានបញ្ជាក់ទៀតថា នៅមុនពេលកើតហេតុនៅវេលាម៉ោង១១យប់ មុនពេលកើតហេតុគាត់បាននាំគ្នាចូលដេកនៅជាន់ទី១ ហើយដោយក្រុមគ្រួសាររបស់គាត់មានប្រមាណ៦នាក់រួមនឹងកូនស្រីប្រុសតូចៗ២នាក់ លុះនៅវេលាម៉ោងកើតហេតុដោយលឺសំឡេងនៅខាងក្រោមស្មានថា ចោរលួចអីវ៉ាន់របស់គាត់ ហើយគាត់បានដឹងខ្លួនចេញមកមើលខាងក្រៅដោយមានផ្សែង នឹងអណ្តាតភ្លើងឆាបឆេះតែម្ដងនៅពេលនោះក្រុមគ្រួសាររបស់គាត់ចុះទៅក្រោមមិនរួចពួកគាត់បានដើរសសៀរតាមសំយាបផ្ទះរបស់ខ្លួន ឆ្លងទៅផ្ទះគេផ្សេងទៀត ដោយផ្ទះនាក់ជិតខាងដែលបើកខារ៉ាអូខេ មិនទាន់បិទហើយបានសុំគេចុះតែម្តង ។
ស្ត្រីរងគ្រោះខាងលើបានបញ្ជាក់ប្រាប់ថា សម្ភារនៅក្នុងផ្ទះគាត់មានម៉ូតូចំនួន២គ្រឿង និងអីវ៉ាន់លក់ចាប់ហួយឆេះខូចខាតទាំងស្រុងនៅជាន់ខាងក្រោម ។ សមត្ថកិច្ចបានបញ្ជាក់ប្រាប់ថា រថយន្ដពន្លត់អគ្គិភ័យនៃស្នងការនគរបាលរាជធានីភ្នំពេញបានមកដល់ចំនួន៦គ្រឿងបានបាញ់ពន្លត់អស់ចំនួន៤គ្រឿងប្រើអស់រយៈពេលចំនួនមួយម៉ោងកន្លះ ។
ក្រោយពេលកើតហេតុសមត្ថកិច្ចខាងពន្លត់អគ្គិភ័យនៃស្នងការនគរបាលរាជធានីភ្នំពេញបានបញ្ជាក់ប្រាប់ថា ករណីអគ្គិភ័យខាងលើមូលហេតុមកពីឆ្លងចរន្តអគ្គិសនី ៕
ចែករំលែកព័តមាននេះ