ខេត្តកំពង់ធំ ៖ គ្រោះថ្នាក់ចរាចរណ៍រវាងរថយន្តមួយគ្រឿងបុកជាមួយម៉ូតូមួយគ្រឿងក្នុងទិសដៅផ្ទុយគ្នា បណ្តាលឱ្យប្តីប្រពន្ធ២នាក់ស្លាប់នៅនឹងកន្លែងកើតហេតុ រីឯអ្នកបើកបររថយន្តបានរត់គេចខ្លួនបាត់។
ហេតុការណ៍ដ៏រន្ធត់ខាងលើនេះបានកើតឡើងកាលពីវេលាម៉ោង៣និង៣០នាទីរសៀលថ្ងៃទី២៤ ខែមិថុនា ឆ្នាំ២០១៩ នៅលើកំណាត់ផ្លូវជាតិលេខ៦២ ភូមិកូនត្នោត ឃុំជ័យ ស្រុកកំពង់ស្វាយ ខេត្តកំពង់ធំ ។
លោកវរសេនីយ៍ឯក ខេន ឈុនគ័រ អធិការនគរបាលស្រុកកំពង់ស្វាយបានឱ្យដឹងថា ភាគីខាងរថយន្តមួយគ្រឿងម៉ាកលីប័ររ៉ូ ពណ៌ស ពាក់ស្លាកលេខ កំពង់ធំ ២A-២៨៣១ (បើកបរទឹសពីជើងទៅត្បូង) បើកបរដោយបុរសម្នាក់មិនស្គាល់អត្តសញ្ញាណ បានរត់គេចខ្លួនបាត់ ។
ចំណែកភាគីខាងម៉ូតូមួយគ្រឿងជិះគ្នា២នាក់ប្តីប្រពន្ធម៉ាកហុងដាឌ្រីម ធុនC125 ពណ៌ខ្មៅ ពាក់ស្លាកលេខ កំពង់ចាម ១G-៦២៥៨ (បើកបរទឹសដៅពីត្បូងទៅជើង) បើកបរដោយបុរសជាប្តីឈ្មោះ ហុិត សៀងហ៊ាន អាយុ២៨ឆ្នាំ មុខរបរកសិករ បានស្លាប់នៅនឹងកន្លែងកើតហេតុ និងអ្នករួមដំណើរជាប្រពន្ធឈ្មោះ ប៉ក់ ច្រឹប អាយុ២២ឆ្នាំ មុខរបរកសិករ បានស្លាប់នៅកន្លែងកើតហេតុ ។ ជនរងគ្រោះទាំង២នាក់ប្តីប្រពន្ធ រស់នៅភូមិរពាក់ ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ ។
លោកអធិការនគរបាលស្រុកកំពង់ស្វាយបានបញ្ជាក់ថា មូលហេតុជាបឋមបង្កឡើងដោយអ្នកបើកបររថយន្ត បើកបរវ៉ាជែងក្នុងស្ថានភាពគ្រោះថ្នាក់ បានជ្រុលចង្កូតទៅបុកម៉ូតូដែលកំពុងបើកបរក្នុងគន្លងផ្លូវផ្ទុយគ្នា ។ ក្រោយពីធ្វើការវាស់វែងរួច ម៉ូតូ និងរថយន្តត្រូវបានយកទៅរក្សាទុកនៅអធិការដ្ឋាននគរបាលស្រុកកំពង់ស្វាយដើម្បីដោះស្រាយនៅពេលក្រោយ ចំណែកសពជនរងគ្រោះទាំង២នាក់ប្តីប្រពន្ធត្រូវបានប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ