ខេត្តស្ទឹងត្រែង ៖ កាលពីព្រឹកថ្ងៃទី២៤ មិថុនា ឆ្នាំ២០១៩ អាជ្ញាធរខេត្តស្ទឹង ត្រែងបានផ្ញើសារលិខិតរំលែកទុក្ខដល់ក្រុមគ្រួសារនៃសពជនរងគ្រោះចំនួន២នាក់នៅស្រុកសៀមប៉ាង ដែលបានបាត់បង់ជីវិតក្នុងឧបទ្ទវហេតុបាក់អាគារកំពុងសាងសង់កម្ពស់៧ជាន់នៅខេត្តព្រះសីហនុ កាលពីព្រឹកថ្ងៃទី ២២…
ខេត្តស្ទឹងត្រែង ៖ កាលពីព្រឹកថ្ងៃទី២៤ មិថុនា ឆ្នាំ២០១៩ អាជ្ញាធរខេត្តស្ទឹង ត្រែងបានផ្ញើសារលិខិតរំលែកទុក្ខដល់ក្រុមគ្រួសារនៃសពជនរងគ្រោះចំនួន២នាក់នៅស្រុកសៀមប៉ាង ដែលបានបាត់បង់ជីវិតក្នុងឧបទ្ទវហេតុបាក់អាគារកំពុងសាងសង់កម្ពស់៧ជាន់នៅខេត្តព្រះសីហនុ កាលពីព្រឹកថ្ងៃទី ២២ មិថុនា ២០១៩។
យោងតាមរបាយការណ៍បញ្ជីឈ្មោះអ្នកស្លាប់ និងអ្នករបួសក្នុងព្រឹត្តការណ៍ស្រុតបាក់អាគារខាងលើបានបង្ហាញថា ជនរងគ្រោះដែលរស់នៅខេត្តស្ទឹងត្រែងមានចំនួន៤នាក់ ក្នុងនោះ២នាក់បានស្លាប់បាត់បង់ជីវិត និង២នាក់ទៀតបានរងរបួស រួមមាន១- ឈ្មោះចន រឿន ភេទប្រុស អាយុ១៨ឆ្នាំ ជាកម្មករសំណង់ រស់នៅភូមិ ស្រែឬស្សី ឃុំស្រែសំបូ ស្រុកសៀម ប៉ាង បានស្លាប់ ២-ឈ្មោះ ឡៃ តៃ ភេទប្រុស អាយុ២០ឆ្នាំ ជាកម្មករសំណង់ រស់នៅភូមិស្រែឬស្សី ឃុំស្រែសំបូ ស្រុកសៀមប៉ាងបានស្លាប់ និង៣-ឈ្មោះ រី ប្រុស ភេទប្រុស អាយុ២០ឆ្នាំ បានរងរបួស និង៤-ឈ្មោះចន ពៅ ភេទប្រុស អាយុ២០ឆ្នាំ បានរងរបួស ។
តាមរបាយការណ៍បញ្ជីឈ្មោះនេះដែរ ជនរងគ្រោះដែលបាត់បង់ជីវិត និងរងរបួសបានទទួលប្រាក់ឧបត្ថម្ភពីសម្តេចតេជោតាមរយៈមន្ត្រីខេត្តរួចរាល់អស់ហើយដែរ។
ក្នុងឱកាសប្រកបដោយទុក្ខដ៏ក្រៀមក្រំនេះ ក្នុងនាមថ្នាក់ដឹកនាំខេត្ត លោក ម៉ុម សារឿន ព្រមទាំងមន្ត្រីរាជការទាំងអស់នៃខេត្តស្ទឹងត្រែង បានចូលរួមរំលែកនូវមរណៈទុក្ខ ដោយក្តីស្រណោះ អាឡោះអាល័យ និងក្តីសង្វែគជាទីបំផុតជាមួយក្រុមគ្រួសារនៃសពពលរដ្ឋរងគ្រោះទាំងពីរផងដែរ។
លោក ម៉ែន គង់ នាយករងរដ្ឋបាលសាលាខេត្ត និងជាអ្នកនាំពាក្យសាលាខេត្តបានបញ្ជាក់នាព្រឹកថ្ងៃទី២៤មិថុនា២០១៩ ឱ្យដឹងថា លោក ប្រធានក្រុមប្រឹក្សាខេត្ត រួមជាមួយកាកបាទក្រហមសាខាខេត្តស្ទឹងត្រែង និងមន្ត្រីរាជការគ្រប់លំដាប់ថ្នាក់បាននាំយកគ្រឿងឧបភោគបរិភោគ រួមមានអង្ករ និងសភារៈប្រើប្រាស់មួយ ចំនួនជូនគ្រួសារនៃសព ក្នុងនោះក៏មានថវិកាកាកបាទក្រហមកម្ពុជាថ្នាក់ជាតិចំនួន៥លានរៀល គ្រឿងឧបភោគបរិភោគ និងសភារៈប្រើ ប្រាស់មួយចំនួនផងដែរ ។
លោកបន្តថា ថវិការបស់កាកបាទក្រហមសាខាខេត្តស្ទឹងត្រែងជូនក្នុងមួយគ្រួសារទទួលបាន១លានរៀល និងថវិការបស់រដ្ឋបាលសាខាខេត្តជូនក្នុងមួយគ្រួសារទទួលបាន១លានរៀល រួមនឹងថវិការឧបត្ថម្ភរបស់
សម្តេចតេជោ ហ៊ុន សែន ជូនក្នុងមួយគ្រួសារ៤៩លានរៀល សរុបក្នុងគ្រួសារសពនីមួយៗទទួលបានថវិកា៥៦លានរៀល៕ (កែសម្រួលដោយ ៖ ធីតា)
ចែករំលែកព័តមាននេះ