រាជធានីភ្នំពេញ ៖ មនុស្សគ្រប់គ្នាសុទ្ធតែធា្លប់ឈឺក្បាលក្នុងពេលណាមួយនៃជីវិត ហើយជាហេតុធ្វើឱ្យយើងខកខានមិនបានទៅចូលរួមកម្មវិធីសំខាន់ៗ ឬកម្មវិធីកម្សាន្តផ្សេងៗ។ ថ្វីបើយើងខិតខំប្រឹងប្រែងថែរក្សាសុខភាពយ៉ាងណាក៏ដោយ ក៏យើងមិនអាចជៀសផុតពីការឈឺក្បាលបានដែរ។ តើកាលៈទេសៈដ៏ពិបាកណាមួយ ខាងក្រោមនេះដែលធ្លាប់ធ្វើឲ្យអ្នកឈឺក្បាល ?
១)- កិច្ចការស្រាវជ្រាវរបស់សាលា ៖
ជានិស្សិតពិតជាមានភាពតានតឹងច្រើនខ្លាំងណាស់ ។ ហើយវាកាន់តែអាក្រក់ជាងនេះទៀត នៅពេលដែលអ្នកកំពុងព្យាយាមធ្វើកិច្ចការស្រាវជ្រាវដ៏ធំមួយរបស់សាលា តែត្រូវរារាំងដោយ ការឈឺក្បាល ។ វាពិបាកក្នុងការធ្វើកិច្ចការណាស់ ព្រោះនៅពេលដែលអ្នកឈឺក្បាល អ្នកត្រូវការសម្រាក។
២)- ការប្រជុំធំៗ ឬការធ្វើបទបង្ហាញ៖
អ្នកសាកស្រម៉ៃមើលនៅពេលដែលអ្នកបានព្យាយាមយ៉ាងខ្លាំងក្នុងការរៀបចំបទបង្ហាញ ឬត្រៀមខ្លួនសម្រាប់ការប្រជុំដ៏ធំជាមួយអតិថិជន ស្រាប់តែនៅថ្ងៃដ៏សំខាន់នោះអ្នកឈឺក្បាលយ៉ាងខ្លាំង! ដូច្នេះហើយវាពិបាកខ្លាំងណាស់សម្រាប់អ្នកក្នុងការធ្វើបទបង្ហាញឱ្យបានល្អឥតខ្ចោះនៅពេលដែលអ្នកកំពុងតែឈឺក្បាល ។
៣)- ពេលប្រលងបញ្ចប់ ៖
អ្នកបានខិតខំយ៉ាងខ្លាំង ដើម្បីទទួលបានលទ្ធផលល្អក្នុងអំឡុងពេលសិក្សារបស់អ្នក ហើយអ្នកក៏បានត្រៀមខ្លួនរួចរាល់សម្រាប់ការប្រឡងបញ្ចប់ ។ អ្នកក្រោកពីព្រឹកព្រលឹមដើម្បីរំលឹក មេរៀនឡើងវិញ ដើម្បីឱ្យប្រាកដថាអ្នកចងចាំអ្វីដែលអ្នកបានរៀន ។ ប៉ុន្តែនៅពេលដល់ម៉ោងប្រឡង អ្នកក៏ឈឺក្បាលប្រកាំងដែលធ្វើឱ្យអ្នកពិបាកក្នុងការរំលឹកឡើងវិញពីអ្វីដែលអ្នកបានរៀនរួចហើយ។ តើអ្នកនឹងធ្វើដូចម្តេច បើមានរឿងបែបនេះកើតឡើង?
៤)- ពេលជួបម៉ាក់ប៉ារបស់សង្សារជាលើកដំបូង ៖
អ្នក និងសង្សាររបស់អ្នកបានមើលចិត្តគ្នា ហើយក៏បានត្រៀមខ្លួនរួចរាល់ដើម្បីជួបម៉ាក់ប៉ាទាំងសងខាង។ មិត្តស្រីរបស់អ្នកបានអញ្ជើញអ្នកមកញ៉ាំអាហារពេលល្ងាច នៅផ្ទះរបស់នាង ហើយអ្នកមានអារម្មណ៍អរផងភ័យផង។ បន្ទាប់មកស្រាប់តែអ្នកបែកញើសពេញខ្លួន និង មានអារម្មណ៍ថា ឈឺចាប់នៅផ្នែកខាងក្រោយនៃក្បាលរបស់អ្នក។ ដូច្នេះហើយអ្នកពិបាកក្នុងការបង្ហាញពីទឹកមុខសប្បាយរីករាយនៅចំពោះមុខម៉ាក់ប៉ារបស់នាងណាស់ !
៥) – ពេលធ្វើដំណើរកំសាន្ត៖
ទីបំផុតការសម្រាកពីការងារ ឬការសិក្សាបានមកដល់់ ហើយអ្នកសមនឹងទទួលបាននូវពេល វេលាសប្បាយរីករាយជាមួយខ្លួនឯង ជាមួយមិត្តភក្តិ ឬជាមួយគ្រួសារ។ ពិតជារំភើបណាស់ អ្នកបានរៀបចំវ៉ាលីស កក់សំបុត្រឡាន ឬសំបុត្រយន្តហោះរួចរាល់ហើយសម្រាប់ដំណើរកំសាន្ត។ ប៉ុន្តែបន្ទាប់ពីភ្ញាក់ពីគេងនៅថ្ងៃដំបូងនៃថ្ងៃឈប់សម្រាក អ្នកស្រាប់តែមានអាការៈឈឺក្បាល ហើយភាពសប្បាយរីករាយរបស់អ្នកក៏ចាប់ផ្តើមបាត់បង់តែម្តង។
សំណាងល្អហើយដែលមានវិធីងាយៗជាច្រើនដែលអ្នកអាចធ្វើដើម្បីកាត់បន្ថយការឈឺក្បាល។ វិធីដែលងាយជាងគេ គឺងូតទឹកក្តៅដើម្បីបន្ធូរការឈឺចាប់នៃសាច់ដុំ លេបថ្នាំប៉ារ៉ាសេតាម៉ុលណាដែលអាចកាត់បន្ថយការឈឺចាប់បានឆាប់រហ័ស និងមានប្រសិទ្ធភាពរយៈពេលវែង ទទួលទានទឹកឱ្យបានច្រើន ហើយសម្រាកឲ្យបានគ្រប់គ្រាន់់។
តើអ្នកបានរៀនអ្វីថ្មីនៅថ្ងៃនេះទេឭ ហើយតើអ្នកចាប់អារម្មណ៍ចង់ស្វែងយល់បន្ថែមទៀតទេ? សូមចុច Like និងតាមដានទំព័រហ្វេសប៊ុករបស់យើងនៅទីនេះ ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ