រាជធានីភ្នំពេញ ៖ បណ្តាមេដឹកនាំប្រទេសជាសមាជិកអាស៊ាន បានបង្ហាញអំពីការព្រួយបារម្ភជុំវិញនិន្នាការកើនឡើងនៃគំនិតគាំពារនិយម និងការប្រឆាំងសាកលភាវូបនីយកម្ម ដែលនឹងប៉ះពាល់ដល់សេដ្ឋកិច្ចសាកលលោក។ នេះបើតាមសេចក្តីប្រកាសព័ត៌មានក្រសួងការបរទេស និងសហប្រតិបត្តិការបានបង្ហាញពីលទ្ធផលនៃកិច្ចប្រជុំកំពូលអាស៊ានលើកទី៣៤ នៅទីក្រុងបាងកក ប្រទេសថៃ កាលពីថ្ងៃទី២២ និងទី២៣ ខែមិថុនា ឆ្នាំ២០១៩ ក្រោមមូលបទ «ជំរុញភាពជាដៃគូសម្រាប់ចីរភាព» ។
សេចក្តីប្រកាសព័ត៌មានចេញផ្សាយនៅថ្ងៃទី២៤ ខែមិថុនាថា គណៈប្រតិភូកម្ពុជាដឹកនាំដោយ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយនៅក្នុងកិច្ចប្រជុំកំពូលថ្នាក់ដឹកនាំអាស៊ានបានសង្កត់ធ្ងន់លើសារសំខាន់នៃការជំរុញភាពជាដៃគូសម្រាប់ចីរភាព ដើម្បីសម្រេចបាននូវសហគមអាស៊ានមួយដែលយកចិត្តទុកដាក់ និងផ្ដោតលើប្រជាជន ដោយមិនបំភ្លេចនរណាម្នាក់។
នៅក្នុងបរិយាកាសតំបន់ និងសកលលោកដែលកំពុងផ្លាស់ប្ដូរយ៉ាងឆាប់រហ័ស ក៏ដូចជាការរីកចម្រើនយ៉ាងឆាប់រហ័សនៃបច្ចេកវិទ្យា នវានុវត្ត ឌីជីថល ថ្នាក់ដឹកនាំអាស៊ានបាន ឯកភាពលើកកម្ពស់កិច្ចសហប្រតិបត្តិការសន្តិសុខតាមប្រព័ន្ធអ៊ីនធើរណេតនានា និងការកសាងប្រព័ន្ធអ៊ីនធើរណេតមួយប្រកបដោយសុវត្ថិភាព សន្តិសុខ និងធន់រឹងមាំ ដែលគាំទ្រដល់សេដ្ឋកិច្ចឌីជីថលក្នុងតំបន់អាស៊ាន។
ប្រភពបានបញ្ជាក់ថា ៖ «ថ្នាក់ដឹកនាំបានបញ្ជាក់អះអាងពីការប្តេជ្ញាចិត្តក្នុងការបញ្ចប់កិច្ចចរចា ភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) នៅក្នុងឆ្នាំនេះ។ ថ្នាក់ដឹកនាំក៏បានបង្ហាញ អំពីការព្រួយបារម្ភជុំវិញនិន្នាការកើនឡើងនៃគំនិតគាំពារនិយម និងការប្រឆាំងសាកលភាវូបនីយកម្ម ដែលនឹងប៉ះពាល់ដល់សេដ្ឋកិច្ចសាកលលោក និងបង្កការគំរាមកំហែងដល់ពហុភាគីនិយម។
ជាមួយគ្នានោះដែរ ថ្នាក់ដឹកនាំបានកត់សម្គាល់ដោយការពេញចិត្តចំពោះការអនុម័តសេចក្តីប្រកាសចក្ខុវិស័យរបស់ថ្នាក់ដឹកនាំអាស៊ាន ស្តីពីភាពជាដៃគូសម្រាប់ចីរភាព និងឯកសារទស្សនទាន និងលក្ខន្តិកៈ សម្រាប់បណ្តាញសមាគមអាស៊ាននៃប្រទេសសមាជិកអាស៊ាន ក្នុងគោលបំណងលើកកម្ពស់ ការយល់ដឹង ជាសាធារណៈអំពីអាស៊ាន និងអត្តសញ្ញាណអាស៊ាន។ ថ្នាក់ដឹកនាំក៏បានបញ្ជាក់អំពីការព្រួយបារម្ភចំពោះការកើនឡើងយ៉ាងខ្លាំង និងឆាប់រហ័សនៃកាកសំណល់សំរាមក្នុងសមុទ្រ និងបានឯកភាពអនុម័តសេចក្តីថ្លែងការណ៍ទីក្រុងបាងកក ស្តីពីការប្រយុទ្ធប្រឆាំងកាកសំណល់សំរាមក្នុងសមុទ្រក្នុងតំបន់អាស៊ាន ។ថ្នាក់ដឹកនាំបានស្តាប់របាយការណ៍របស់មីយ៉ាន់ម៉ា ស្តីពីការវិវឌ្ឍថ្មីៗនៅក្នុងរដ្ឋរ៉ាខាញ និងបានឯកភាពជំរុញតួនាទីអាស៊ានបន្ថែមទៀត ដើម្បីគាំទ្រមីយ៉ាន់ម៉ា ក្នុងការផ្តល់ជំនួយមនុស្សធម៌ និងជួយសម្រួលដល់ដំណើរការមាតុភូមិនិវត្តន៍។ នៅក្នុងបរិបទនេះ កម្ពុជាបានផ្តល់វិភាគទានទឹកប្រាក់ចំនួនប្រាំបួនម៉ឺនដុល្លារសហរដ្ឋអាមេរិក ដើម្បីជួយដល់សកម្មភាពមនុស្សធម៌ក្នុងរដ្ឋរ៉ាខាញផងដែរ៕ (កែសម្រួលដោយ ៖ បុប្ផា)
ថ្នាក់ដឹកនាំបានស្តាប់របាយការណ៍របស់មីយ៉ាន់ម៉ា ស្តីពីការវិវឌ្ឍថ្មីៗនៅក្នុងរដ្ឋរ៉ាខាញ និងបានឯកភាពជំរុញតួនាទីអាស៊ានបន្ថែមទៀត ដើម្បីគាំទ្រមីយ៉ាន់ម៉ា ក្នុងការផ្តល់ជំនួយមនុស្សធម៌ និងជួយសម្រួលដល់ដំណើរការមាតុភូមិនិវត្តន៍។ នៅក្នុងបរិបទនេះ កម្ពុជាបានផ្តល់វិភាគទានទឹកប្រាក់ចំនួនប្រាំបួនម៉ឺនដុល្លារសហរដ្ឋអាមេរិក ដើម្បីជួយដល់សកម្មភាពមនុស្សធម៌ក្នុងរដ្ឋរ៉ាខាញផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ